Read Falam Chin THUFIM 23 Bible Online

THUFIM 23 - Falam Chin bible

THUFIM 23

¹Uktu bawi thawn rawl na ei tikah, Na hmaiah zoso a um ti kha ṭhatein zoh aw.

²Rawlphammi na si ahcun sup aw deuh aw.

³A lo pekmi rawl thawthaw kha hahio hlah; Ziangahtile an lo bumnak rawl a si thei.

⁴Na nunnak siatsuah aw tiangtiang in lennak va hawl hlah; A colh hna thiam in fim aw.

⁵Ziangruangah tile na paisa cu mit ṭhep karah a hlo theimi a si; Thla bun hruak in mupi bangin a zuanghlo ding.

⁶Tirhfaakmi ih rawl va ei hlah, Rawl thaw a lo domi khal va hahio hlah.

⁷Ziangruangah tile a thinlung put bangtuk in a nunzia cu a si: “In aw, ei aw,” a lo ti ding; Sikhalsehla cumi cu a thinlungtak in a lo timi a si lo.

⁸Na eimi hmuahhmuah kha na luak sal ṭheh ding ih, Na faknak awkam hmuahhmuah khal thulolak a si ṭheh ding.

⁹Mi aa theih ah thu sim hlah, Ziangahtile fimnak thu na relmi kha a nautat ding.

¹⁰Hlanlai ih tuahciami ramri kha ṭhawn hlah; Nu le pa nei lo pawl ih lo khal va long hlah.

¹¹Ziangahtile BAWIPA cu a cakmi anmah ṭantu a si ih, Thukhingkhainak hmunah an lamah a ṭang ding ih an thu a simsak ding.

¹²A lo zirhtu pawl thu kha ṭhatein ngai awla, Fimnak kha na zir thei zat in zir aw.

¹³Nauhak nunsim loin um hlah, Fung in na thawi ruangah a thi lo ding.

¹⁴A nunnak kha thihnak ihsin na run ngah sawn ding.

¹⁵Ka fapa, na fim asile ka lung a awizet ding.

¹⁶Fimnak thu na sim ka theih tikah ka lung a nuam ngaingai ding.

¹⁷Misual pawl kha va daw hlah, Na nun sung BAWIPA ṭihzah in um sawn aw.

¹⁸Cutin na um asile na hmailam a tleu ding ih, na ruahsannak a hlo lo ding.

¹⁹Ka fapa, ngai aw, fim awla, Lamzin dik kha thlun ringring aw.

²⁰Zu le sa a phaam mi pawl va kom hlah.

²¹Ziangahtile zu phaam le sa phaam pawl cu an farah ding; Na tikcu le caan kha ei le ih lawngin na cemter a si ahcun, A rei hlanah puansia na sin ding.

²²A lo hringtu na pa ih thu ngai aw; Amah um hlah sehla na seem lo ding. Na nu kha a tar tikah nautat hlah.

²³Thutak kha lei awla zuar nawn hlah; Fimnak, thuzirhnak le theihnak tla kha lei awla zuar nawn hlah.

²⁴Miding mi ih pa cu a lung a awi nasa ding; Fapa fim hringtu cu a fapa parah a lung a awi ding.

²⁵Na nu le na pa lungawiter aw, Nangmah a lo hringtu na nu cu lungawi in um seh.

²⁶Ka fapa, na thinlung taktein i ngai aw; Ka nundaan hi zohṭhim aw.

²⁷Hlawhhlangnu cu khur thukpi a si; Nunau uire cu thihnak thang a si.

²⁸Fifir bangin mi an bawh ih, Mi tampi an siatsuah ih mi zuangzam ah an canter.

²⁹Zoso thinpit le vansaang in a um ṭheu? Zoso a riah a sia ṭheu? Zoso mi thawn a to aw ṭheu? Zoso a phunzai ṭheu? Zoso a thu um loin hma a tuar ṭheu? Zoso mit sen remrem in a um ṭheu?

³⁰Zu a in ringringmi pawl an si.

³¹Khuathai sungah senzet le tleuzet in a um ih, In tikah dang sungah naalzet in a lut ding a bangmi zu kha zoh hlah.

³²A netnak ahcun rul bangin mi a cuk ih, Tursia nei rulha bangin mi a cuk ṭheu.

³³Na mit in thil phundang na hmu ding ih, ṭhatein khua na ruat thei lo ding ih fiangtein na ṭong thei lo ding.

³⁴Cutik ahcun tipithuanthum laifang ih a itmi pa bangtuk le, Lawng puanzarnak ṭhuam zim ih a itmi pa bangtuk na si ding.

³⁵In thawi naón a na lo, In vua naón ka thei lo, Ziangtikah ka tho ding ih, A dang in ding ka hawl hrih ding, tiah na ti ding.