Read Falam Chin THUFIM 25 Bible Online

THUFIM 25 - Falam Chin bible

THUFIM 25

¹A tanglamih thu pawl khal hi Solomon ih thufim an si ih, Judah siangpahrang Hezekiah ih milai pawl in an ngan sinmi a si.

²Pathian ih sunlawinak cu thil a thuh hi a si; Sikhalsehla siangpahrang pawl ih sunlawinak cu thil an phuan hi a si.

³Siangpahrang in ziang a ruat ti cu kan thei thei lo; A saangzetmi van le a thukzetmi tipithuanthum bangtuk in, kan theih ban lomi a si.

⁴Ngun khi a eek thianter awla, sosu thiam in thil mawizetah a ser ding.

⁵Siangpahrang hnenih ruahnak ṭha lo a petu kha dawi hlo uhla, A uknak cu dingthluk lairelnak thawn a hnget ding.

⁶Siangpahrang hmaiah upat va cuh hlah, Mi upa pawl ih umnak hmun khal ah va ding hlah.

⁷Ziangahtile hitawk ah hung to aw ti cu, Nangmah hnakin a upa sawnmi tonak kian aw ti hnakin a ṭha sawn.

⁸Thil na hmuh mi kha zamrang tukin thuṭhennak zungah va sim hlah; Ziangahtile tetti dangin na palhnak a langter sal asile ziangso na tuah ding?

⁹Na innhnen thawn nan ruahnak a bang aw thei lo asile nanmahte in remnak tuah uh; Cule nan thuthup kha va phuang hlah.

¹⁰Na phuang pang asile mi in thu na thuh thei lo kha an thei dingih, na ningzahnak a cem dah nawn lo ding.

¹¹A caan a si laite ih ṭongmi ṭongkam cu, Ngun kheng sungih sui thingrah bangtuk a si.

¹²Mifimzet nunsimtu ih simmi thu cu a ngai duhtu hrangah, Sui zunghruk le sui hlawnthil bangtuk a si.

¹³Palai fel cu a thlahtu hrangah thinlung daitertu a si; Rawl lak caan ni ling laifangih rialti bangtuk a si.

¹⁴Thil ka lo pe ding tiah thu mi a kam ih a pe dah lotu cu, Ruah tel lo khawdur le tidai keng lo thli bangtuk a si.

¹⁵Thinsaunak thawn uktu bawi hman kha lem a theih; Awkaa nem in thinlung hak hman a nemter thei.

¹⁶Na ṭulzat hnak in tam deuh khuaitizu ei hlah; Tamtuk na ei asile na luak ding.

¹⁷Na innhnen kha leng tamtuk hlah, Na len tamtuk asile a lo ning ding ih a lo hua ding.

¹⁸A dik lo in mi sualpuhnak cu, Mi a that theimi talhtum, ralnam le conkiang vek a si.

¹⁹Harnak caan ah rinsan tlak lomi rinsan cu, Ha hnin thawn rawl khai le ke-awl thawn feh bangtuk a si.

²⁰Riahsia thinhar mi hnenih hla va sak cu, Khawsik ni ih puanhlum phoih le, Hma parih cite phulh bangtuk a si.

²¹Na ral a ril a rawng asile ei ding rawl pe aw; A ti a haal asile in ding tidai pe aw.

²²Cutiih na tuah asile a luthlung ah meiling na ret a si ding. Bawipa in ṭhatman a lo pe ding.

²³Saklam thli in ruah a ratpi bangtuk in, Mi relsiatnak in thinhennak a suahpi.

²⁴A phunzai ringring mi nupi thawn innpi sungih umtlang hnakin, Inn luanglu kelkawmte ih um a ṭha sawn.

²⁵Ram hlatpi ihsin thuthang ṭha theih cu, Dangcaar tihal laifangih tidai daite in bangtuk a si.

²⁶Miding in mi ṭha lo pa nehnak a coter a si ahcun, Thihsii rawi mi tikhur, a si lole cerhti baal vek a si.

²⁷Khuaitizu tamtuk ei cu a ṭha lo; Cuvekin mi hnen ihsin thangṭhatnak tamtuk ngah tum cu a ṭha lo.

²⁸Mah ih thinhengnak a sup thei lotu cu, Khawkulhnak hauhruang a cim ih a siatmi khua bangtuk a si. Olte in ral an lut ding.