Read Falam Chin THUFIM 28 Bible Online

THUFIM 28 - Falam Chin bible

THUFIM 28

¹Mi ṭha lo cu zohman ih dawi loin anmahte an tlan; Sikhalsehla midingfel cu kiosa vekin an ral a ṭha.

²Ram pakhat a sual tikah uktu pakhat hnu pakhat an thleng aw vivo; Sikhalsehla ram pakhatkhat in mifim le thuruatthiam hruaitu a neih ahcun cuih ram cu a cak ih reipi a hmun.

³Mi farah pawl a hrem ih harsatnak a petu ram uktu cu, Lo rawl a siatsuahtu ruah takzet thawn an bang aw.

⁴Daan ziangsiar loih na um ahcun mi ṭha lo lam ṭang na si; Asinain daan na thlun ahcun mi ṭha lo pawl dodaltu na si.

⁵Mi sualral pawl cun thudik hi ziangvek a si ti an thei lo; Asinain BAWIPA a biatu pawl cun fiangtein an thei.

⁶Thinlung tluangtlam loih milian si hnakin, Tluangtlam zetih mifarah si a ṭha sawn.

⁷Daan a thlunmi tlangvalpa cu mi fimvar a si; Mi-hrong a va komtu cu a pa ih mithmai baaltertu a si.

⁸Midang hnen ihsin tangka ṭhang le a miat in milian na si ahcun, Na lennak cu mifarah pawl a zaang- fahtu hnen a thleng leh ding.

⁹Daan na thlun lo asile na thlacamnak cu Pathian thinhengtertu sawn a si.

¹⁰Mi tluangtlam pakhat khi nungsual dingih na bum a si ahcun, Nangmah le nangmah cuih sualnak ah cun na awk aw ding. Zianghman sualnak a nei lomi cu laksawng ṭha an co ding.

¹¹Milian pawl in anmah le anmah khi mifimzet ah an ruat aw ṭheu; Asinain mi ih thinlung a theitu mifarah pakhat khi a fim sawn.

¹²Mi ṭha pakhat uktu bawi a hung si tikah mi tampi an lung a awi; Asinain mi ṭha lo uktu ih an can tikah misenpi cu an relh thluh.

¹³Na sualnak thuh na tum ahcun na hlawhtling dah lo ding; Na sualnak cu phuang in hlonhlo aw, Pathian in a lo zaangfah ding.

¹⁴BAWIPA cu kumkhua in ṭihzah awla na thin a nuam ding; Na lung a ruh ahcun na nunnak a siatral ding.

¹⁵Mi uk ṭha lo pawl ih hnuai ah farah pawl cu ṭantu an nei lo; Cuih mi uktu cu kiosa huuk rero le vom heer vak rero vekin ṭih a nung.

¹⁶Thinlung ruahnak nei cuca lomi uktu cu uktu ṭha lozet a si; Ding lonak a huatu cun caan reipi ram a uk ding.

¹⁷Laithattu cu amah ih thlankhur zamrang zetih a lai rerotu a si. Kham ding a si lo.

¹⁸Tlaitluang awla na him ding, Na lungput a tluan lo ahcun rinlopi ah khur sungah na tla ding.

¹⁹Lothlo milaw zet cun ei ding tampi a nei; Tikcu caan a lak ih a cemraltertu cu kumkhua in a farah ding.

²⁰Rintlak mifel cun a nuam le a famkim mi nunnak a nei; Asinain zamrangih len a duh ahcun hremnak a tuar ding.

²¹Mi thleidan neih cu a ṭha lo; Sikhalsehla thuṭhentu hrekkhat cun nawhthuh fate meen duh ah thu an rel sual ṭheu.

²²Mi duhham pawl in zamrangih len an duh tuk ruangah, Farahnak an hnenah a thleng zik ti khi an thei nawn lo.

²³Mi pakhat ih mawhnak va rem sak awla, Neh hnuah cun na porh rero hnakin a lung a awi sawn ding.

²⁴A nu le pa ih thilri ruk in ‘Sual a si lo’ tiih a ruattu cu rukru thawn an dang aw lo.

²⁵Duhhamnak cun harsatnak a suahter; BAWIPA rinsan awla na hlawk sawn ding.

²⁶Mah ruahnak lawngih ṭan cu aat-hna a si; Na hnakih a fimdeuhmi pawl ih zirhnak khi thlun awla na him ding.

²⁷Mi farah pawl khi thil va ṭhen awla na hlawhsam dah lo ding; Mi farah pawl na dungtun ahcun mitampi in an lo cam ding.

²⁸Mi ṭha lo pawl bawi an can tikah mipi cu an relh thluh; Sikhalsehla mi ṭha lo pawl an nau tik ahcun miding pawl in ram an uk sal ding.