Read Falam Chin THUFIM 29 Bible Online

THUFIM 29 - Falam Chin bible

THUFIM 29

¹Na nuncan an lo remtinte na lung a hak asile, Ni khatkhat ah thosal thei nawn loin na siatralta ding.

²Uktu mi ṭha an si ahcun ram sung mi an nun a nuam; Asinain uktu mi ṭha lo an si ahcun an ram mi pawl an zonzai.

³Fimnak duhtu fapa cun a pa ih lung a awiter. Hlawhhlangnu hnenih paisa hmang raltu cu mi aa a si.

⁴Siangpahrang in dingnak thawn ram a uk asile an ram a hngetkhoh; Asinain sumsaw lawng a ruat asile a ukmi ram a siatral ding.

⁵Na innhnen pawl a hleifuan ih na porh asile, Na hrangah thang na kam thawn a bang.

⁶Midik mitluangtlam pawl an lungawi thawsuak ih an um laiah, Mi ṭha lo pawl cu an sualnak thang ah an awk aw.

⁷Mi ṭha in mi farah pawl ih sinak an theih sak; Asinain mi ṭha lo pawl cun cuvek an theih sak thei lo.

⁸Midang zawn a ruat lotu cun khawpi buainak an thlenter; Mifim pawl cun thubuai an daiter.

⁹Mifim in mi-aa taza a cuai tikah, Mi-aa pa cun a hnihsan ih napi in a camriam.

¹⁰Mi thisen suah a poisa lo mi cun, Miding mi ṭha pohpoh khi a hua; Asinain mi tluangtlam cun miding ih nunnak a hum sak.

¹¹Mi-aa pawl cun an thinhennak khi hmakhatte-ah an langter; Asinain ruahnak a neimi pawl cu an thin a sau ih an sup aw.

¹²Ram uktu in a dik lomi thuthang a zum asile, A hnaṭuan upa pawl hmuahhmuah cu thuphanper an si ding.

¹³Mi farah siseh, mi farah hremtu siseh, Thil bangrep ih an neihmi a um; BAWIPA in khawhmuhnak mit a pek veve.

¹⁴Siangpahrang bawipa in mi farah pawl ih covo a hum sak ahcun, Reipi ram sungmi a uk ding.

¹⁵Nauhak hrangah cun nuncan rem le daan ṭha thlunter hi thil ṭha a si; Nauhak pakhat amah ih thuthu ih a nun ahcun a nu ningzaktertu a si ding.

¹⁶Mi ṭha lo pawl an lal tikah sualnak a karh zai; Asinain miding pawl in cuih mi ṭha lo pawl an nau vivo kha an hmu ding.

¹⁷Na fapa kha daan ṭha thlunnak ah nunsim awla, Amah ih ruangah na hmai a hngal ringring ding; Anih cun ziangtik khalah na ningzahnak a suahter lo ding.

¹⁸Pathian ih hmuhsaknak a um lo ahcun, Mipi cu an vaivuan ṭheh. Pathian ih daan a thluntu cu mi lungawi an si.

¹⁹Hnen-um pakhatkhat, hmurka ih va biak men cun a nuncan na rem thei lo ding; Na sim duhmi cu a thei ding naón na thu cu zianghman a siar lo ding.

²⁰Ruat hmaisa loih a ṭongtu hnakin, Ruat ciamciamih a ṭongtu mi-aa hrangah ruahsannak a tam sawn.

²¹Na hnen-um ih duhmi hmuahhmuah khi a seenlai ihsin na rak pek ringring a si ahcun, Nikhat khat na neihmi hmuahhmuah a lo lak sak thluh leh ding.

²²Thinbahlak pawl cun tawhawknak le buainak tampi an suahter.

²³Puarthau hngalhngawnnak hin siatralnak ah a lo thlenter ding; Asinain tangdorte ih na um ahcun mi ih upat na co ding.

²⁴Fifir ih rualpi cu a hrangah ral ṭihnung bik a si; Thuṭhennak zungah thudik a sim asile hremnak a tuar ding; Thudik a sim lo asile Pathian in a camsiat ding.

²⁵Midang ih an lo ruahdan poisa tukih um khi ṭihnungza a si; Asinain BAWIPA na rinsan ahcun phan ding a um lo.

²⁶Mi hmuahhmuah in anmah uktu bawi ih mithmai ṭha co cu an duh thluh; Asinain BAWIPA ih hnen lawnglawng in a dingmi thuṭhennak cu na co ding.

²⁷Mi ṭha in mi ṭha lo an hua; Mi ṭha lo in mi ṭha an hua ve.