Read Falam Chin THUFIM 4 Bible Online

THUFIM 4 - Falam Chin bible

THUFIM 4

¹Ka faale tla, nan pa ih a lo zirh mi pawl hi ṭhate in ngai uhla, Theihthiamnak nan neih theinak dingah cing ṭha uh.

²Ka lo zirh mi cu a ṭhat ruangah cingkeng ring ring uh.

³Ka nu le ka pa ih fapa neihsun ka si ih, Ka sentet lai ihsin,

⁴Ka pa in hiti in nun i sim, “Ka sim mi thu kha cingkeng ringring awla, Ziangtik hmanah hngilh hlah aw. Ka sim bangin tuah awla na nung ding a si.

⁵Fimnak le theihfiangnak kha la awla, Ka simmi thu hi ziangsiar loin dungtun hlah.

⁶Fimnak kha tlansan hlah awla a lo kilveng ding, Duhdawt awla himdamte in a lo humhim ding.

⁷Fimnak neih cu na tuah thei mi thil thupi bik a si, Na neihmi hmuahhmuah hman man sehla fimnak cu nei aw.

⁸Fimnak cu duh awla a lo khaisaang ding, Pomhnget awla upatnak a lo pe ding.

⁹Amah cu na lu parah a mawi mi pangpar rual a si ding ih, Na sunlawinak sui lukhuh a si ding.”

¹⁰Ka fapa, ka thu hi ngai aw, Ka sim mi hi thungai thlak in ruat awla na nunkhua a sau ding.

¹¹Nundaan ṭha ka lo hmuh zo ih, Fimnak tla ka lo zirh zo.

¹²Fimkhur zet ih na feh asile na lamtluan ah zianghman in a lo kham thei lo ding ih, Na tlan tik khal ah na bah lo ding.

¹³Na zir mi pawl hi kaihnget awla, ṭhatein kilkhawi aw. Na nunnak a si.

¹⁴Mi ṭha lo pawl ih fehnak ah khan feh hlah aw; Mi siava pawl ih nunzia kha cawng hlah.

¹⁵Tuah hrimhrim hlah! Mi ṭha lo pawl hnenin tlan awla, Pialsan awla feh vivo aw.

¹⁶Misual pawl cu thilsual ziangtal an tuah lo ahcun an itthat thei lo, Mi pakhatkhat tal an tuahmawh lo ahcun an ih a hmu lo.

¹⁷Sualnak cu saang bangin an ei ih, Mi tuahmawhnak cu zu bangin an in.

¹⁸Sikhalsehla miding pawl ih lamzin cu, Zing khawvang ihsin sun tiang a tleu sinsin mi tleunak bangtuk a si.

¹⁹Mi ṭha lo pawl lamzin cu zanthim bangtuk a si, Ziang kan pal ih kan ril ti khal an thei lo.

²⁰Ka fapa, ka lo sim mi thu hi ṭhatein ngai awla, Ka ṭongkam hi ṭhatein thlun aw.

²¹Na hnen ihsin ziangtik hmanah hloter hrimhrim hlah, Ciing ringring awla na lung sungah felte in ret aw.

²²A theithiamtu hmuahhmuah hrangah an nunnak a si ih, A hmutu hrangah an taksa harhdamnak a si.

²³Ralringte in khua ruat aw, Ziangahtile na ruah mi in na nunnak a siamrem ding.

²⁴A dik lomi thu zianghman rel hlah, ṭong hawizawng lo le thuphan va sim hlah.

²⁵Hmailam dingtein zoh awla rinsan aw zet in feh aw; Na ningzak in leisin bih aw hlah.

²⁶Na tuah ding mi kha ṭhatein khuakhang cia awla, Cutin na tuah mi pawl cu felte in na tuah suak vivo ding.

²⁷Thil ṭha lo kha hrial awla hmailam ah dingtein feh aw, Lamzin dik ihsin kal khat hman pial hlah aw.