Read Falam Chin THUFIM 9 Bible Online

THUFIM 9 - Falam Chin bible

THUFIM 9

¹Fimnak in a inn a sak zo ih a ṭhuam pasarih kha a phun.

²Puai tuahnak hrangah ṭilva a that, A sabitti ah rimhmui a rawi ih cabuai khal a hung zo.

³Khawsung hmun saangbik ihsin au dingah A hnen-um nunau pawl a thlah ih,

⁴“Ruahnak mal deuh pawl hmuahhmuah hitawk ah hin ra uh,” an ti. Mi aa deuh pawl hnenah,

⁵“Ra uhla ka saang ra ei uh, Ka rawi cia mi sabitti ra in uh.

⁶Aatnak cu tanta uhla nung thlang uh, Fimnak lamzin kha thlun uh,” tiah a ti.

⁷Mi puarthau pa nun na sim ahcun a lo hmuhsuam ding. Mi ṭha lo pa na mawhthluk ahcun hriamhma na tuar ding.

⁸Mi puarthau ziangtik hmanah nun va sim hlah, Nun na simnak ruangah a lo hua ding. Asinain mifim nun na sim ahcun a lo upat ding a si.

⁹Mifimpa nun sim aw, a fim sin ding; Midingpa thu sim aw, a thiamnak a tam sin ding.

¹⁰Pathian ṭih cu fimnak hramthoknak a si. A Thiang Mipa na theih ahcun theihthiamnak fimnak na nei.

¹¹Fimnak in na san a sauter ding.

¹²Fimnak na neih ahcun ṭhathnemnak a lo pe ding, Fimnak na hnon ahcun harnak tuartu nangmah na si ding.

¹³Aatnak cu a kam a tam ih ruahnak zianghman a nei lo, Ningzah nei lo ṭongtam nunau vek a si.

¹⁴A inn sangka ah a to, Asilole khuasung hmun saangbik ah a to ih,

¹⁵Maió hnaṭuannak thu ruat phah ih lamzin a feh mi pawl kha,

¹⁶“Ruahnak nei lo mi pawl, hitawk lam ah ra uh,” a ti. Mi aa pa hnenah,

¹⁷“Firmi tidai cu a thlum deuh ih, Firmi saang cu a thaw deuh,” a ti.

¹⁸A inn ih a fehtu pawl an thi ih, A innsung lut ngah zotu pawl cun, Mithi khua thukpi ah kan um ti kha an thei lo.