Read Falam Chin THUSIMTU 10 Bible Online

THUSIMTU 10 - Falam Chin bible

THUSIMTU 10

¹Thothe thi in rimhmui rim a siat ter; Malte aatnak in fimnak tumbik a phiat thei.

²Mifim ruahnak cu vorhlam ah a feh, Mi aa ruahnak cu kehlam ah a peeng.

³Lamzin a feh lai hmanah ruahnak a nei lo, Mikip hnenah a aatnak a phuang vivo.

⁴Bawi pakhat na parih a thin a heng tikah, Na hnaṭuan in suak hlah. Tangdornak in palhnak tampi a damter.

⁵Ni hnuai ah thil ṭha lo ka hmuh mi a um, Uktu amai palhnak ruangah a si;

⁶Mi aa pawl in upa hnaṭuan an ṭuan ih, Milian pawl cu hmun nauta an co.

⁷Sal pawl cu rang parah an to ih, Bawi pawl sal bangin an ke ih an feh ka hmu.

⁸Khur a laitu cu a sungah amah a tla ding, Phar a bal tu cu rul in a cuk ding.

⁹Lungto a laitu cu hliamnak a tong ding. Thing hau tu hrangah ṭihnungza a um.

¹⁰Hreitlung a bil zetih a taat ta lo a si ahcun, Thazaang tampi a hman a ṭul; Fimnak nei sehla a hlawh a tling deuh ding.

¹¹Dawi aat hlanah rul in mi a cuk ahcun, Rul dawithiamtu um cu ziangso a ṭhahnem?

¹²Mifim cu a ṭongkam in zaangfah a hlawh, Mi aa cu amai hmurka in a siatsuah.

¹³Thuphan pipi a kaa sungin a suak ih A ṭong netnak cu aatnak pittawp a si.

¹⁴Mi aa cu a ṭong a tam; A sim dingmi thu khal zohman in an thei lo. Amaió hnu ah ziang a cang ding ti sim theih a si lo.

¹⁵Mi aa cun thi hrulh in hna a ṭuan, Khawpi fehnak lamzin hman a thei lo.

¹⁶Ram uktu siangpahrang mi note a si ih, An hotu pawl zan vaar puai an tuah; Cui ram cu hmailam ruahsan ding a neilo.

¹⁷Asinain ram siangpahrang miphun u a si ih, Mi pacang thu relthiam a si ih tlunah, Ram sung hotu pawl caan hmantein tirawl an ei ih, Supnak nei in zu khal an rit lonak ram cu, Mi vannei ram an si.

¹⁸Daithlan ruangah innbo a cim, Zaangzel ruangah inn a zun.

¹⁹Rawl cu mi hnih tertu a si, sabit cu mi lungawiter tu a si, Asinain tangka lo cun ziang hman ti thei a si lo.

²⁰A thupte hman in siangpahrang va cam hlah. Na ihnak khaan hmanah milian va rel sia hlah, Ziangahtile thli lak vate in na aw cu a zampi dingih Thla nei in na ṭong cu an va sim ding.