Read Falam Chin THUSIMTU 12 Bible Online

THUSIMTU 12 - Falam Chin bible

THUSIMTU 12

¹Na nolai ah a lo Seemsuahtu thei aw, Harsatnak in a lo man hlan le, Kum le tikcu a ra her ih, “Thin nomnak zianghman ka nei nawn lo,” na ti hlanah hin.

²Ni le thlapi le arsi an thim hlan le, Khawdur in ruah hlir a rak ken hlanah hin.

³Cutikah himnak a lo pe ṭheu tu na baan kha an ṭhia pei ih a cak mi na ke tla an ṭawnṭai ding. Na rawl khainak dingah na ha a maltuk dingih na mit a malh ding ruangah fiangtein khua na hmu thei nawn lo ding.

⁴Na hna a set dingih lamzin ih thawmvang khal na thei lo ding. Fangrial thawm le awn-mawi an tum mi khal na thei thei ceu ding; a sinan vate ai hman in na ihthatnak ihsin an lo ṭhangter thei ding a si.

⁵Hmunso kha na ṭih dingih suah va vak kha na hrangah ṭihnung a si ding. Na ṭuak a par dingih na feh tikah na ṭhawn thei ceu dingih hiarnak na rak neih mi hmuahhmuah an hlo ding. Kannih cu kumkhua kan umnak ding inn ah kan feh dingih khuasung lamzin ah ṭahnak aw thawm a um ding.

⁶Ngun cikcin kha a cat dingih sui mei-inn a tlu dingih a kuai ding. Tikhur ih hri kha a cat dingih ti thannak beel a kuai ṭheh ding.

⁷Kan ruangpi cu leivut ah a kir sal dingih kan thlarau cu in petu Pathian hnenah a kir sal ding.

⁸Thulolak, thulolak, ziang hmuahhmuah thulolak an si, tiah Thusimtu in a ti.

⁹Thusimtu cun a fimnak thawn a theih mi cu mipi hnenah a zirh vivo. Ṭongṭhimnak a phunphun a theih mi kha a zingzoi ih a fiangter vivo.

¹⁰Thu kha mi ngai nuam zawng in a sim ih, a ngan mi thu cu thudik a si.

¹¹Mifim pawl ih ṭongkam cu tuukhal pa in tuu khalhnak ih a hman mi fungzum vek a si. Thufim khawlkhawm mi cu hngetzet ih khen mi tlawngkhen vekin a hmun ringring. Kan zate ih tuukhal a si mi Pathian in in pek mi an si.

¹²Ka fapa, ralring ṭul mi a um lai: Cabu ngan rero hi cem ni a neilo, ca zoh ringring khal hi taksa in a tuar lo.

¹³Hi thu hmuahhmuah ih tlunah sim ding pakhat lawng a um. Pathian ṭihzah awla a daan thlun aw. Pathian in milai a tuah sannak cu himi hrangah a si.

¹⁴Pathian cun ziang hmuahhmuah kan tuah mi parah thu a ṭhen ding; a ṭha siseh, a sia siseh, a thupte ih kan tuah mi par tiangin thu a ṭhen ding a si.