Read Falam Chin THUSIMTU 2 Bible Online

THUSIMTU 2 - Falam Chin bible

THUSIMTU 2

¹Ka thinlung tein, “Atu cun nomnak ka tep ve hnik pei; thil dang ruat loin nomnak lawnglawng ka ti ve hnik pei,” tiah ka ti. Asinain cu khal cu zianghman a rak si lo.

²Hnihnak hi aat a si! Nomnak khal hi ziangso a ṭhahnem?

³Milai in leilung tlun kum malte an nun sungah hin thilṭha an tuah ding mi ka hmuhsuak theinak dingah, fimnak lamzin thlun in ka tha tho tertu ah zu ka in ih, cuticun thuṭha cu ka thinlung in ka hawl.

⁴Thil thupi zetzet ka tuah: Ka hrangah inn ka sak ih, sabit hmuan ka tuah;

⁵pangpar hmuan le thingkung ciinnak hmuan nuam ka tuah ih rah a phunphun a rah mi thingkung tam zet ka phun.

⁶Thingkung ṭhang lai pawl ti toihnak ah tiah tili tla ka tuah;

⁷Ṭuangsuak sal ka nei ih cuih tlunah salnu le salpa tampi ka lei beet. Ka neih mi caw le tuu pawl cu ka hlanih Jerusalem ih a rak um mi zo ih neih mi hnak khalin a tam deuh.

⁸Siangpahrang pawl le ramṭhen pawl hnen ihsin sui le ngun ka khawm ciamco. Hlasa tu ah nunau siseh mipa siseh ka ret; mipa in nuam an ti ṭheu mi nusun khal tampi ka nei.

⁹Jerusalem ah ka hlanih siangpahrang a rak ṭuantu hmuahhmuah hnakin ka lian deuh ih ka nasa deuh. Cule ka fimnak khal amah keel a si.

¹⁰Ka mit in thilṭha a hmuh mi hmuahhmuah ka ngah ṭheh. Ka thinlung in nomnak a duh mi hmuahhmuah ka co ṭheh. Ka hnaṭuannak ihsin thinlung nomnak ka ngah ih cumi cu ka ṭuan man ka ngah mi laksawng a si.

¹¹Hi thil hmuahhmuah hi ka ruatih ka tuah mi le ka ṭuan mi hmuahhmuah ka ngaihtuah tikah, zohhnik uh, zianghman an si lo; thli dawi rero vek lawnglawng an si ti fiangtein ka thei. Vanrang hnuai milai hrangah hin thil ṭhahnem zianghman a um lo a si.

¹²Cule fimnak le aatnak le fimlonak pawl hi ka khingkhai ih ka hun tahṭhim. Siangpahrang ih a tuah cia mi dah ti lo a hnu ih a ra mi cun zianghman tuah thei mi dang a neih cuang lo.

¹³Cuti ih ka khingkhai hnuah tleunak in thimnak cu a laan vekin fimnak in aatnak cu a laan a si, ti ka thei.

¹⁴Mifim cun a lu ah mit a nei, a sinan mi aa cu khawthim lakah a feh. Cule an pahnih tlunah mi hmuahhmuah hnenih a tlung mi khawlairel cu a tlung thotho ding ti ka hmu.

¹⁵Cutikah keimah te in, “Mi aa ton mi hi ka tong ve ding sikhawh, ka fim hi ziangso a ṭhathnemnak a um cuang?” tiah ka ti. Hi khal hi zianghmanlo thotho a si.

¹⁶Mi aa an theih nawn lo vek thotho in mifim khal an thei nawn ve hai lo ding. Hmailam ahcun kan zate in hngilh ṭheh kan si ding. A si, mi aa vekin mifim khal a thi ve thotho.

¹⁷Curuangah nunnak hi ka hua, ziangahtile vanhnuai ih thil hmuahhmuah cu riahsiatnak thleng tertu men an si. Thil hmuahhmuah hi thulolak an rak si. Thli ka rak dawi rero men a si.

¹⁸Vanhnuai ih ka tuah mi le ka hnaṭuan mi hmuahhmuah hi ka hua; ka nehhnu ih ka airawltu hnenah ka taanta thluh ding ti ka thei cia a si!

¹⁹Cupa cu mifim a si ding le mi aa a si ding hman zoso a thei! Ziang a va si hmanah ka fimnak le ka hnaṭuannak ihsin a suak mi rah hmuahhmuah cu amai uk mi an si ding fawn! Cukhal cu thulolak men a si.

²⁰Leilung tlunih ka hnaṭuan mi le ka thil ti mi hmuahhmuah ka ngaihtuah vivo tikah beidong in ka um. Nasazet ih hna ka ṭuan rero kha ka siir aw.

²¹Ziangahtile zianghman a ṭuanlotu hnenah fimnak le theihnak le thiamnak thawn hna a ṭuantu in a neih mi hmuahhmuah a taanta ṭheh ding a sihi! Hi khal hi zianghmanlo a si ih thil ṭha lozet a si.

²²Rethei le zonzai in a nunsung hmuahhmuah ni hnuai ah hna a ṭuan ih ziangso a ngah?

²³A nunsung hmuahhmuah cu tuarnak le helhkamnak hlir an si. Zan khalah a thinlung a nuam cuang lo. Hi khal hi thulolak a si ko.

²⁴Minung hrangah cun ei le in le a hnaṭuan ihsin nomnak a ngah mi kha a ṭhabik a si. Cumi khal cu Pathian kutsung ihsin a ra mi an si ti ka hmu zo.

²⁵Ziangahtile amah tel locun zoso a ei a in thei dingih a nuam aw thei ding?

²⁶A si, amah a lungawi tertu hnen ahcun fimnak le thiamnak le lungawinak a pek. Asinain misual hnenah cun, Pathian lungawi tertu hnen ih pek sal thluh leh dingin, phurh ding le khawm ding ṭuanvo a pek a si. Cukhal cu thulolak a si; thli dawi rero bangtuk a si.