Read Falam Chin THUSIMTU 4 Bible Online

THUSIMTU 4 - Falam Chin bible

THUSIMTU 4

¹Cui hnuah leilung tlunih hremnak a tuartu pawl thuhla ka ruat. Hremnak tuartu pawl ih mitthli ka hmu; zohman hnemtu an nei si lo! Mi hremtu pawl cu an kut sungah thil ti theinak an nei ih, an hrem mi pawl cu zohman bawmtu an nei lo.

²A thi cia mi pawl an thih zo ruangah a nunglai mi pawl hnakin mi vanṭha an si, tiah ka ruat.

³Annih hnakin mi vanṭha sawn cu leilung tlunih thil ṭha lo tuah mi hmuahhmuah a hmu hrih lotu le a suak hrih lotu pawl an si.

⁴Cule minung in harsazet ih hna a ṭuan ih thil a ti suak thei mi hmuahhmuah khal hi ziang ruangah a si tile: a minung pi hleih duh ah le laan a duh ruangah a si, ti ka hmu. Hi khal hi thulolak a si ih thli dawi rero vek a si.

⁵“Mi aa cu hnaṭuan loin a kut a bom ih a netnak ahcun rawl loin a thi,” an ti.

⁶Kei cun, “Harsazet hnaṭuan ih thulolak si thotho ding suumpi khat neih hnak cun thinlung nuamte ih zate khat lawng neih a ṭha sawn,” ka ti.

⁷Nun sungih zianghman lo a si mi pakhat ka hmu lala.

⁸Mi pakhat cu fapa a nei lo, unau khal a nei lo; amah lawngin a um ih milian si duh ah cat baang loin hna a ṭuan; a sinan a lennak ah a lung a kim dah lo. “Zo hrangah so hiti lawmmam in hna ka ṭuan ih nunnomnak tikcu hman neilo ih ka um?” ti khal a ruat dah lo. Hi khal hi thulolak a si ih a nuamlo zet mi nunnak a si.

⁹Mi pahnih cu pakhat hnakin an ṭha deuh, ziangahtile an hnaṭuan man tam deuh an ngah.

¹⁰Pakhatkhat an tluk pang asile a dang pakhat in a tho. Sikhalsehla mi pakhat lawng cu a tluk pang asile zaangfakza a si, tho tu zohman a nei lo.

¹¹Cui tlunah mi pahnih an it tlang tikah cun an khua a hlum. Sikhalsehla mi pakhat lawng cu ziangtinso a khua a hlum thei ding?

¹²Mi pakhat lawng cu neh a ol-te; a sinan pahnih cu an ṭang thei zet ding; hridai zangthum hrual cu olte in a cat dah lo.

¹³A tar ih a aa mi siangpahrang, midang ih ruahnak ṭha pek mi khal a saang duh nawn lomi hnak cun tleirawl farah mifim a ṭha sawn.

¹⁴Thawnginn ihsin a suak mi khal siangpahrang a si thei, a ram sungah farah zonzai in a rak suak mi sihmansehla!

¹⁵Hi leitlun ih a um mi minung hmuahhmuah ih thu ka hun ruatih siangpahrang airawltu mino pakhat cu hmunkhat khatah a um ti ka thei.

¹⁶Siangpahrang ih uk mi cu minung siar cawk lo an si ko ding. Sikhalsehla a thih tikah cun a rak tuah mi thil ruangah a parah zohman lungawi an um cuanglo ding. Hi khal hi zianghmanlo a si ih thli dawi rero vek thotho a si.