Read Falam Chin THUSIMTU 6 Bible Online

THUSIMTU 6 - Falam Chin bible

THUSIMTU 6

¹Leilung tlunih thil ṭha lo pakhat ka hmuh mi cu minung hrangah a ritzet mi a si:

²Mi pakhat hnenah Pathian in lennak, thilri le mi ih upatnak tla a pek ih a thinlung in a duh mi hmuahhmuah neih lomi zianghman a nei lo; sikhalsehla a thilri pawl nunnuam zetih hman theinak cu Pathian in a pek lo; midang sawn in nuamzet in an hmang. Hihi thil mawilo le thil ṭha lozet a si.

³Mi pakhat in faate zakhat khal nei sehla, kum reipi nungin mi sanṭhazet khal sisehla, a neih mi thilri pawl nunnuam in a hmang theilo-ih thinlung hnangamnak zianghman a ngah lo a si ahcun anih hnakin a thi cia in a suak mi naute a ṭha sawn.

⁴Cui naute cu suahsan nei lo, thim lakih a liam mi a si ih ziangtik hmanah a hmin a lang dah lo;

⁵ni khal a hmu dah loih zianghman theih mi a neilo naón, thin nuamlo pa hnak cun daiteón colhnak a ngah a si.

⁶Mi pakhat cu kum thawngkhat nungin sanhnih nolh hmansehla thinlung hnangamnak a neih lo ahcun ziangso a ṭhathnem? Zozo khal an fehnak ding cu a hmunkhat ṭheh a si lo maw?

⁷Milai in a pumpi hrang lawngah hna a ṭuan, a sinan a tawk thlang ti a um dah lo.

⁸Ziangtin so mifim cun mi aa hnakin sawtnak a neih deuh cuang? Mi farah pa cu nun ding zia thei hmansehla ziangso a ṭhahnem?

⁹Curuangah thinlung vakvai ih um ter rero hnakin na mithmai ih a um mi thilri parih lungkimnak neih hi a ṭha sawn. Cukhal cu thulolak a si ih thli kaih tum vek a si.

¹⁰Thil a um cia mi cu hminsak cia ṭheh an si ih ziangvek thil an si ti cu theih cia a si. Minung cun amah hnakih a cak deuh mi cu a dodal thei lo ding.

¹¹Ziangahtile tam deuh ṭong tikah sullam a neilo deuhdeuh. Cuti a si ahcun ziangtinso milai hrangah sawtnak a um cuang ding?

¹²Milai nunnak hrangah thilṭha cu, leilung tlun caan tawite a nun sungah le phenthlam bangin a liam cing mi a nunnak sungah hin zoso a thei thei ding? Zo in so a thih hnuah leitlun ah ziang a cang ding ti a thei ding?