Read Falam Chin THUSIMTU 9 Bible Online

THUSIMTU 9 - Falam Chin bible

THUSIMTU 9

¹Hi thil hmuahhmuah hi napi-in ka ruatih miding le mifim le an thil tuah mi hmuahhmuah cu Pathian ih kut sungah a um a si. Duhdawtnak le huatnak an neih mi khal a kut sungah a um. Ka hmailam ah ziang a um ti zohman in an thei lo.

²Mi hmuahhmuah tlunah khawlairel bangrep in a thleng. Miding siseh, misual siseh, miṭha siseh miṭha lo siseh, mithiang siseh mithianglo siseh, thawinak a petu siseh thawinak a pe lotu siseh, an ton mi a bangrep ṭheh a si. Miṭha cu misual hnakin a miat cuanglo. Thukam tu cu thukam lotu hnakin a miat cuanglo.

³Cumi cu khuaza vanrang hnuai ih thil ṭha lobik a si. Mi hmuahhmuah hrangah khawlairel bangrep a thleng. Minung thinlung cu an nun sungah aatnak le ṭhatlonak in a khat. Cui hnuah mithi pawl hnenah an feh a si.

⁴Asinain minung hnenih siarcih mi pawl hrangah cun ruahsannak a um lai, ziangahtile a thi mi kiosa hnak cun a nung mi uico a ṭha sawn.

⁵A nungmi pawl cun thi leh ding, ti tal an thei; a sinan a thi cia pawl cun zianghman an thei nawn lo. An hrangah laksawng a um nawn lo; pum hngilh ih hngilh an si.

⁶An mi duhdawtnak, an mi huatnak le an tumtahnak pawl cu an thihpi ṭheh zo a si. Leilung tlunih hnaṭuannak sungah tel theinak zianghman an nei nawn lo.

⁷Va feh awla na rawl cu thin nuamzet in ei aw, na sabitti cu lungawizet in in aw! Pathian in na tuah mi cu a lo lungkimpi zo a si.

⁸Na hnipuan kha vaar ter ringring awla na lu khal hriak thih ringring aw.

⁹Vanhnuai ih tikcu tawite Pathian in nunnak a lo pek mi sungah hin na duh mi na nupi thawn nuamzet in um uh, ziangahtile leilung tlun na nun sungah hin cumi cu na hnaṭuan man laksawng a si.

¹⁰Na ton mi hnaṭuan hmuahhmuah cu na thazaang neih mi hmuahhmuah in tuah aw; ziangahtile na thlennak ding Sheol ahcun hnaṭuannak siseh, ruahnak siseh, theihnak siseh, fimnak siseh zianghman a um nawn lo.

¹¹Ni hnuai ahhin thildang pakhat ka hmu lala: tlan zuamnak ah micak bik in a neh cuanglo, raldonak ah ralṭhabik in a neh cuanglo. Mifim lawngin rawl a ngah cuanglo, mi fimthiam lawng milian an si cuanglo, thilthiam hnen lawngah hlawhtlinnak a um cuanglo; a tikcu a kim tikah cun vansiatnak in an zate in a man a si.

¹²Milai in a tikcu caan a thei dah lo. Nga cu sur in an kaih vek le vate cu thang in an awk vekin milai khal cu rinlopi ah siatsuahnak an parah a thleng a si.

¹³Ni hnuai ah fimnak tahṭhim tlak pakhat ka hmu ih cucu a thupizet tiah ka ruat.

¹⁴Khua pakhat a um ih khuasung mi cu an malte; siangpahrang a cakzet mi in a do ih a kulh ṭheh tlunah cuih khua a lak theinak ding napi in a zuam.

¹⁵Cui khawsung ah mifarah a sinan mifimzet pakhat a um; cupa lawngin a fimnak thawn cuih khua cu a humsuak thei ding naón zohman in cupa cu an ciing lo.

¹⁶Curuangah, “Fimnak cu cahnak hnakin a ṭha sawn,” ka ti. Asinain mifarah pa ih fimnak cu zianghman ah an siarlo ih a ṭongkam cu zohman in an ngai duh lo.

¹⁷Mi aa pawl an tonkhawmnak hmun ah an hotu pa a au reronak aw ngai hnak in mifim ṭongkam neem ngai a ṭha sawn.

¹⁸Fimnak cu ral hriamnam hnakin a ṭha sawn ih misual pakhat in thilṭha tampi a siatsuah thei.