Read Falam Chin SOLOMON HLA 6 Bible Online

SOLOMON HLA 6 - Falam Chin bible

SOLOMON HLA 6

¹Nunau lakih mimawi hleice, Na ngai mi cu khui ah a feh? Kan lo hawlpi theinak dingah, A fehnak lam in sim hnik.

²Lung ka duh val a hmuan ah kal, Balsam zihmui thing tla a ciinnak ah. Lili pangpar tla khawm phah in, A hmuan sungah tuurual a kil.

³Lung ka duh bik, ka ta a si, Kei khal a ta ka si, Lili pangpar lakah a tuurual tla a khal.

⁴Lungtak ka duh, Jerusalem khua bang na mawi, An sim Tirzah khawpi bangin duh na nung ce; Hi khua pawl bang na mawinak in, Lungmolh thawthawt lo tiang i tuah.

⁵Na mit a dang zoh thlang hram aw, Caang thiam lo in i kaih taang tak. Gilead tlang in merual tlan bang, Na sam thlairem zam sialso hai.

⁶Meh le kholhfai mi tuuhmul bangin, Na ha tianrem vaarte in an fai; A beuh um lon rem thliahthli hai.

⁷Na lu khuhnak puan naal phen in, Na biang note a lang cemci.

⁸A duh ahcun siangpahrang in, Nupi sawmruk, nusuun sawmriat va nei ko seh. Lengdawh note siar cawk lo in neita ko seh.

⁹Hmanseh kei cun pakhat lawngte duh in ngai ing, Cu nute cu thuro bang duhnung a si. A nuih fa neih hman ih neihsun, A duh hleimi fanu a si. A zohtu hmuah nunau tla in an fak cio thluh; Siangpahrang nupi, nungai, nusun, hman in amah faknak hla an sak cio a si.

¹⁰Zing khawtleu bang mit-men mawite zo a si ta? A mawi sersi, a pan veuvi; Ni le thla iang in a tle mawi.

¹¹Ṭhuangkung lakah ka ra thleng zo, Phaivun rawn ih zanthing note, Sabit parih hnah no cerh le, Taleti par ra zoh dingah.

¹²Raldo dingih rangleng mawngtu, Daite ih a um thei lo bangin, Ngai awknak in i thirter thluh.

¹³Lam aw, lam aw, Shulam leengdawh; Na lam lai cu kan lo zoh ding. I zohtu pawl tlar le tlar lakih ka lam hi, Ziangruangah maw a zoh nan duh?