Read Falam Chin ISAIAH 1 Bible Online

ISAIAH 1 - Falam Chin bible

ISAIAH 1

¹Amoz fapa Isaiah in, Judah siangpahrang Uzziah, Jotham, Ahaz le Hezekiah pawl san ah, Judah le Jerusalem hrangih Pathian ṭongkam a theih mi cu hiti in a si.

²BAWIPA in, “Maw lei le van, ka ṭongmi hi thei uh. Ka cawm mi ka faate pawl in in dodal a si.

³Caw in a neitu an thei; laak khalin an bawipa ih rawl peknak kuang an thei. Asinain ka minung Israel cun cutluk hman an thei lo. Zianghman an thei bembem lo a si,” a ti.

⁴Maw Israel, nannih misual, mimawh, thilṭha lo lawnglawng a tuah ih nawhthuh a ei mi minung pawl, nan cemthla a si. Nan sualnak in a lo dirhthlak a si. BAWIPA, Israel ih Pathian thianghlim cu nan dungtun a si.

⁵Ziangruangah ral nan tho ringring? Nasa sinsin ih hrem nan duh maw si? Maw Israel, na lu cu hma in a khatih na thin le na lung cu natnak a tuar.

⁶Na kezim ihsin na luthlung tiang a dam mi khui hmanah a um lo. A pem mi le a dup mi le a bauh mi hlir in a khat a si. Na hma pawl cu kholhfai mi a si lo, tuam mi khal a si lo. Sii hnih mi khal a si lo.

⁷Nan ram cu siatsuah ṭheh a si ih a ṭhing reprep; nan khua pawl cu meisa in a kaangṭheh zo. Nan mithmuh rori ah miphundang pawl in nan ram cu an lakih an siatsuah ṭheh a si.

⁸Jerusalem khua lawnglawng a taang ih anih khal cu ral ih kulh ṭheh mi khawpi a si; sabit hmuan ih hmuan kiltu deu le fanghma hmuan ih sak mi thlam vekin bawmtu le ṭantu neilo khawpi a si.

⁹Cungnungbik BAWIPA in mi hrekkhat pawl zuah hlah sehla, Sodom le Gomorrah khua vekin a hloral ta mi khawpi a si zo ding.

¹⁰Maw Jerusalem, na minung le na uktu pawl cu Sodom le Gomorrah minung le uktu bangtuk an si. Na hnenih BAWIPA ṭongkam hi ngai ṭha hnik. Kan Pathian ih a lo zirh mi hi ruat ṭha hnik.

¹¹BAWIPA in, “In pek ringring mi thawinak pawl hi ka duhzet ah maw nan ruat? Thawinak ih nan ur mi tuu pawl le nan ṭilva thau zetzet pawl hi ka khop zo. Nan caw, nan tuu le nan me thisen pawl hi ka ningtuk zo!

¹²In biak tikah hipawl rak keng dingah zoso a lo fial? Ka Biakinn sung ra hnaihnok tu dingah zoso a lo sawm?

¹³Nan thil pek mi pawl hi zianghman ah a ṭhahnem lo. Rimhmui nan pek mi pawl hi ka fih a si. Nan Thla Thar Puai pawl, nan Sabbath pawl le nan pumkhawmnak pawl hi ka tuar thei nawn lo. Nan sualnak in a siatsuah ṭheh zo a si.

¹⁴Nan Thla Thar Puai le nan ulh mi nan puai pawl hi ka hua. Ka hrangah thilrit an si ih ka tuar thei nawn lo a si!

¹⁵Baan pharh in thla nan cam hman ah ka lo zoh lo ding. Ziangtluk tam ih nan cam khalle ka lo ngaisak lo ding; ziangahtile nan kut cu thisen in a khat a si.

¹⁶Thiangfai in kholh aw uh; ka mithmuh ih nan tuah rero mi thilsual pawl hi tuah nawn hlah uh. A si, thilṭha lo tuah cu baang thlang uh;

¹⁷Thilṭha tuah zir uh. A dikmi hawl uhla, hremnak a tuartu pawl bawm uh. Nu le pa neilo ngakṭah pawl bawm uhla nuhmei pawl ṭan uh!

¹⁸BAWIPA in, “Ra uhla kan ruat tlang hnik pei. Nan sualnak cu sen-eu bangin sen hmansehla, vur bangin ka lo thiangfai ter ding; sendup bangin dup hmansehla tuuhmul bangin ka lo vaar ter ding.

¹⁹Ka thu nan ngai a si ahcun hi ram ih a suah mi thilṭha nan ei ding.

²⁰Asinain ka thu nan eel ih in dodal a si ahcun nan thi rori ding. BAWIPA keimah in ka ṭong zo a si,” a ti.

²¹Rintlakzet a si mi khawpi cu hlawhhlang ah a cang. Khuahlan ahcun miding pawl umnak khawpi a si; atu ahcun mithat pawl lawnglawng an um.

²²Maw Jerusalem, khuahlan ahcun ngun bangtuk na rak si; atu ahcun man neilo na si. Khuahlan ahcun sabit zu thawzet bangtuk na rak si; atu ahcun tidai lawng na si.

²³Na hotu pawl cu ralthotu le rukru pawl ih rualpi hlir an si. Thu an rel tikah nu le pa neilo farah pawl an ṭan dah lo ih nuhmei pawl ih thu cu an ngaisak dah lo.

²⁴Curuangah, cungnungbik BAWIPA, Israel ih Pathian, a maksak mi ih a sim mi hi ngaiṭha aw; BAWIPA in, “Ka ral ih a cang zo mi na parah hin phu ka la ding; cuticun hnaihnawhnak in pe nawn lo ding.

²⁵Na parah ka thinhengnak a thleng sal ding. Thir an ser vekin somei ah ka lo ser dingih na balhnak hmuahhmuah cu ka hlon thluh ding.

²⁶Khuahlan ih hotu le remruattu pawl vekin hotu le remruattu a thar in ka lo pe ding. Cuticun Jerusalem cu a dingmi le rinsantlak khawpi ti ih kawh a si ding,” a ti.

²⁷BAWIPA cu a ding mi a si ruangah Jerusalem cu a hum dingih sual a sirtu hmuahhmuah a run ding a si.

²⁸Asinain a sualtu le amah a dotu hmuahhmuah cu dip ṭheh in a rial dingih amah a hnongtu pawl cu a that ding a si.

²⁹Thingkung nan biak ruangah le hmuan thianghlim sungih milem[1] nan biakmi ruangah ningzak in nan um ding.

³⁰A thi mi sasua kung vekin nan vuai dingih zohman ih tidai toih lo hmuan vek nan si ding.

³¹Hramro cu meici fate in a kang thei vekin micak le mi nasa pawl khal anmah ih thilsual tuahnak in a siatsuah dingih cuih siatsuahnak cu zohman in an mit thei nawn lo ding.