Read Falam Chin ISAIAH 19 Bible Online

ISAIAH 19 - Falam Chin bible

ISAIAH 19

¹Izipt hrangih a thleng mi thu: BAWIPA cu zamrang zetin mero parah a to ih Izipt ah a ra a si. A hmaiah Izipt ih milem pawl cu an khur ih Izipt mi pawl ih ralṭhatnak cu a hlo.

²BAWIPA in, “Izipt ram sungah mah le mah do awknak ral ka tho ter ding; unau le unau an do aw dingih innhnen le innhnen tla an ral aw ding. A hua aw mi khua pakhat le pakhat an do aw dingih a ral aw mi siangpahrang pawl cu mi uk theinak huham duh ah an do aw ding.

³Izipt mi pawl ih tumtah mi cu ka siatbal ṭheh dingih an thinlung ka siat ter ding. An milem hnenah bomnak an dil ding; pol an leeng dingih mithi thlarau pawl thu an ron ding.

⁴Izipt mi pawl cu miheer le mi puarthau kut sungah ka pek dingih mi zaangfah neilo siangpahrang in a uk hai ding. Cungnungbik BAWIPA Keimah in ka sim zo a si,” tiah a ti.

⁵Nail tivapi ah tidai a malzet dingih nuamte in a kang ṭheh ding.

⁶A tiva ṭeek pawl cu an nam zet dingih an caar ṭheh ve ding. Phaipheng le phok pawl cu an vuai ṭheh ding;

⁷Nail tivakap ih ciin mi rawl kung hmuahhmuah an caar ṭheh dingih thli in a semhlo thluh ding.

⁸Nail tivapi ih ngakaih in pum a cawmtu hmuahhmuah an hruum an ai ding; an sio le an sur pawl cu a lak an si ṭheh ding.

⁹Puanthaan tuahtu pawl an thin a nau ding;

¹⁰thiamtaktu le zungthiam pawl cu an thin a pit dingih an van a sang ding.

¹¹Zoan khua ih hotu pawl cu mi-aa hlir an si! Izipt mifim bik pawl in at-thlak thu an forh. Hlanlai siangpahrang le mifim pawl ai-awhtu kan si tiah ziangtinso siangpahrang an sim ngam?

¹²Maw Izipt siangpahrang, khui ah so na mifim pawl an si ṭheh? Cungnungbik BAWIPA in Izipt hrangih tumtahnak a neih mi hi an lo sim thei hmang ding nan!

¹³Zoan le Memfis hotu pawl cu mi-aa an si! An miphun hruaitu ding an si nan an hruaisual zo a si!

¹⁴BAWIPA in thinlung buainak a pek hai ih an thusimmi khal a buai ṭheh. Curuangah Izipt in thilsual lawnglawng a tuah ih zuri pa cu amai luak par lala ih a sawn vekin Izipt cu a sawn rero a si.

¹⁵Izipt ram sungah milian siseh, mi farah siseh mitum siseh, mi nauta siseh a bawm theitu zohman an um lo.

¹⁶Izipt mi pawl cu nunau bangih a ṭihhrut caan a rathleng ding. Cungnungbik BAWIPA in anmah hrem dingih a kut a thlir kha an hmuh tikah an tuksum in an ṭhia thlohthlo ding.

¹⁷An hrangah BAWIPA in a ruah cia mi an theihsaal tinte in Izipt mi in Judah mi pawl cu an ṭih ringring ding.

¹⁸Cui caan a thlen tikah Izipt khua panga ah Hebru ṭong an hmang ding. Cutawkih a um mi pawl in siatserh ih thu an kam tikah Cungnungbik BAWIPA hmin in an kam ding. Khua pakhat cu, “Ni khawpi,” tiah an ti ding.

¹⁹Cui caan a thlen tikah Izipt ramahBAWIPAIÓ hmin in biakṭheng pakhat an dawl dingih Izipt ramri ah a hmin in lungphun an phun ding.

²⁰Cupawl cu Izipt ramah Cungnungbik BAWIPA a um ti khihhmuhnak an si ding. Cutawkih a um mi pawl in hremnak an tuar ih bomnak dilin BAWIPA an kawh tikah anmah runtu dingah BAWIPA in mi pakhat a thlah ding.

²¹Izipt mi hnenah BAWIPA cu a lang leh ding. Cutikah BAWIPA cu an ṭihzah ding, an biak dingih a hnenah thawinak le laksawng an keng ding. A hnenah thu fekten an kam dingih an thukam mi vekin an tuah ding.

²²Izipt mi pawl cu BAWIPA in a hrem ding, a sinan a damter saal hai ding. Amah lam an hoi dingih an thlacamnak a theihsak dingih a damter hai ding.

²³Cui caan a thlen tikah Izipt le Assiria karlakah lamzinpi a um ding. Hi ram hnih ih minung pawl cu olte in an tlawng aw thei dingih hmun khatah Pathian an be tlaang ding.

²⁴Cui caan a thlen tikah Israel cu Izipt le Assiria thawn an ṭangtlang dingih an ram thum cu leilung pumpi hrangah thlawsuahnak an si ding.

²⁵Cungnungbik BAWIPA in thlawsuahnak a pe hai dingih, “Izipt ka minung, Assiria ka kut tuah mi, le Israel ka hril mi, nan parah thlawsuahnak um hram seh,” a ti ding.