Read Falam Chin ISAIAH 2 Bible Online

ISAIAH 2 - Falam Chin bible

ISAIAH 2

¹Pathian in Amoz fapa Isaiah hnenah Judah le Jerusalem thu thawn peh aw in hi ti hin a sim.

²Hmailam caanah Biakinn a dinnak tlang cu tlangdang hnakin a saangbik a si ding. Miphun tampi cuih tlang ahcun cat loin an ra dingih

³an minung pawl in, “BAWIPAIÓ tlang ah hung feh uhsi; Israel Pathian in Biakinn ahcun. Thlun dingih in duh mi cu in zirh dingih A hrilzo mi a lamzin ihsin kan feh ding. BAWIPAIÓ thuzirhmi cu Jerusalem ihsin a ra; Zion ihsin a mi pawl hnenah a sim a si.

⁴Ram tumzetzet karlakih thutam mi cu a daiter ding. Cuticun an ralnam cu leilehnak tuhmui ah an ser dingih an feipi cu thingrah kung thenfainak namte ah an tuah ding. Ramkhat le ramkhat an do aw nawn lo dingih, raldo khal an tum nawn lo ding.

⁵Maw Jakob ih tefa sin pawl, BAWIPAIÓ in pek mi tleunak sungah tlangleng uhsi.

⁶Maw Pathian, na minung Jakob ih tefa sin pawl cu na dungtun a si. Curuangah an ram cu nisuahnak lam le Filistin ramih mitkher le dawithiam pawl an khat. Mi phundang ih thlun mi daan an thlun.

⁷An ram cu sui le ngun in a khatih an sumsaw cu cem ti a nei lo. An ram cu rang in a khatih an rangleng pawl cu siarcawk lo an si.

⁸An ram cu milem in a khatih anmah ih kut ih an tuahcop mi an biak.

⁹An zate in hmuhsuam le nautat mi an si dingih ningzak le hmaisia in an um ding. Maw BAWIPA, zohman ngaidam hlah aw.

¹⁰BAWIPAIÓ thinhengnak ihsin luat dingah le a sunlawinak le a cahnak huham hrial duh ah leilung ah khur lai tahrat in an lut dingih tlangpar lungpuk sungah an relh ding.

¹¹Milai ih hngalnak cu a cem dingih milai ih puarthaunak cu siatsuah ṭheh a si ni a thleng ding. Cule BAWIPA lawnglawng cawi mawi a si ding.

¹²Cui ni ahcun Cungnungbik BAWIPA in mi lianngan hmuahhmuah a niam ter ding; mihngal le mi puarthau hmuahhmuah a namthla ṭheh ding a si.

¹³Lebanon ih sidar thing sang zetzet pawl le Bashan ramih sasua kung hmuahhmuah cu a siatsuah ṭheh ding.

¹⁴Tlang sang siseh, tlang niam siseh;

¹⁵ral vennak inn sang zetzet siseh khua kulhnak ralhruang sang zetzet siseh rualraan in a thlakcim ṭheh ding.

¹⁶A tumbik le a mawibik tipithuanthum ih feh thei Tarshish khua ih lawng pawl hman a pil ter ṭheh ding.

¹⁷Milai ih hngalnak le puarthaunak hmuahhmuah a cemter ṭheh ding. Cui ni ahcun BAWIPA lawnglawng a saangbik ih cawimawi mi a si dingih,

¹⁸milem hmuahhmuah khal an hloral ṭheh ding.

¹⁹Leilungpi hnin dingih BAWIPA a rat tikah cun a thinhengnak ihsin luat dingah le a sunlawinak le a cahnak huham hrial duh ah leilung lai tahrat in an lut dingih tlangpar ih lungpuk sungah an relh ciamco ding.

²⁰Cui ni a thlen ngaingai tikah cun sui le ngun in an tuah mi milem pawl cu an tlansan dingih duum le palap hnenah an hlon ṭheh ding.

²¹Leilungpi hnin dingih BAWIPA a ra thlen tikah cun a thinhengnak tlansan dingah le a sunlawinak le a cahnak huham hrialin tlangpar ih lei kua le lungpuk ah an relh ciamco ding.

²²Curuangah milai cu rinsan hlah uh. Rinsantlak an sinak ziangso a um?