Read Falam Chin ISAIAH 20 Bible Online

ISAIAH 20 - Falam Chin bible

ISAIAH 20

¹Assiria ram siangpahrang Sargon thupeknak vekin Assiria ralkap hotu ralbawi le a ralkap pawl in Filistin pawl ih khua Ashdod an do.

²A hlankhan kum thum in BAWIPA in Amoz fapa Isaiah cu a hruk mi a buri hnipuan le a kedam pawl phuak dingah a fial zo. A fial vekin a tuah ih lawngfangkheh le kedam loin a um.

³Ashdod an lak tikah BAWIPA in, “Ka siahhlawh Isaiah cu lawngte in le kedam loin kum thum sung a um zo. Himi cu Izipt le Sudan parih a thleng dingmi thil khihhmuhnak a si.

⁴Assiria siangpahrang in hi ram ramhnih ihsin a kaih mi sal pawl cu lawngfangkheh in a hruaihlo hai ding. Mino siseh, upa siseh, ke lawng le lawngfangkheh in an feh ding; an zahmawh tla a lang ṭheh dingih Izipt hrangah cun ningzahnak ngaingai a si ding.

⁵Sudan ram a rinsantu le Izipt ram a porh rero tu pawl cu an bei a dong dingih an thin a pit ding.

⁶Cui caan a thlen tikah Filistin ram tipikap ih a um mi pawl cun, ‘Assiria siangpahrang kut ihsin in humtu ding ti ih kan rinsan mi pawl ziang an cang, zohhnik uh! Ziangtin so kan luat thei ding?’ an ti ding,” tiah a ti.