Read Falam Chin ISAIAH 22 Bible Online

ISAIAH 22 - Falam Chin bible

ISAIAH 22

¹Langnak Phairawn hrangih a thleng mi thu: Ziang so an tuah? Ziangah so khawpisung mi pawl an inn par diphun ah puai an tuah ciamco?

²An khua pumpi in lungawi in an au an kio ih an thawmvang cu a nasa ngaingai. Tuihṭum raldonak ih a thi mi nan minung pawl cu ral an do ruangih a thi mi an si lo.

³Nan hotu pawl an tlan ṭheh ih thal pakhat hman an sai hlanah kaih mi an si.

⁴Curuangah i fehsan thluh uh; keimah lawng ka minung a thi mi pawl hrangah ninghang in ka ṭap rero ding. A leem khal i tum hlah uh!

⁵Langnak Phairawn ah atu hi ṭih ih buai caan, ral sung caan le mangbang ih um caan a si ih, cumicu Cungnungbik Pathian BAWIPA in kan parih a thlenter mi a si. Kan khawpi kulhnak ralhruang cu an balcim ṭheh zo ih bomnak dil ih aunak aw cu tlang kipah a khawk vivo.

⁶Elam ram ihsin ralkap pawl cu rang parin an ra ih li le thal an keng. Kir ram ih ralkap pawl cun ralphaw thawn an tim an tuah ṭheh zo.

⁷Ram ṭhazet Judah phairawn ahcun rangleng an khat ih rang ralkap pawl cu Jerusalem kotka hmaiah an ding ṭheh zo.

⁸Judah ralhruang le an ṭannak pawl a cim ṭheh. Cui caan a thlen tikah hriamnam nan retnak inn ihsin hriamnam nan suah ciamco.

⁹Jerusalem khawpi kulhnak pharah rem a ṭulmi pawl nan hmu. Jerusalem khua sungih inn nan siar ciamco ih khawpi kulhnak phar remnak hrangih lungto duh ah inn hrekkhat cu nan bal. Khawpi sungih tidai khawlnak dingah,

¹¹khawpi kulhnak phar sunglam ah tikhawlnak tumpi nan dawl ih ticawm hlun ihsin tidai nan run luangter. Sikhalsehla hi thil hmuahhmuah a rak tumtu le a cangtertu Pathian sawn cu zianghman ah nan siar lo.

¹²Cungnungbik BAWIPA in ṭap le ai dingah le nan sam meet ṭheh ding le buri hnipuan hruk dingah a lo ko hai a si.

¹³Asinain nan hni nan kheek ih puai nan tuah sawn. Ei dingah caw le tuu nan that ih sabit nan in ciamco. “Kan ei kan in pei cu! Thaisun ah kan thi ding a si,” nan ti.

¹⁴Cungnungbik BAWIPA Amah rori in ka hnenah, “Hi an ṭhatlonak hi an nunsung hmuahhmuah ngaidam an si lo pei. Keimah Cungnungbik BAWIPA in ka sim zo,” a ti.

¹⁵Cungnungbik BAWIPA in siangpahrang innsungsang hotu Shebna hnen ah i feh ter ih,

¹⁶“Zo ka si tiah so na ruat aw? Tlangpar lungto lakah na hrangah thlaan lai dingin zo in so thu a lo pek?

¹⁷Mi upa pakhat cu na si ve nan BAWIPA in a lo thur dingih a lo hlonhlo mai ding.

¹⁸Bawhlung vekin hluum ko in a lo khirh dingih ram kaupi ah a lo hlon ding. Cutawkah na hngalpi zet mi rangleng kiangah na thi ding. Na bawipa ih innsungsang ningzak tertu na si.

¹⁹BAWIPA in na hnaṭuannak ihsin a lo hlon dingih na hnaṭuan saang ihsin a lo ṭhum ding,” ti ih sim dingah i fial.

²⁰BAWIPA in Shebna hnenah, “Cui caan a thlen tikah Hilkiah fapa ka siahhlawh Eliakim ka ko ding.

²¹Na zung hnaṭuannak korfualpi le na taikhap le na thuneihnak hmuahhmuah ka lak dingih a hnenah ka pe ding. Amah cu Jerusalem le Judah mi pawl hrangah an pa bangtuk a si ding.

²²Amah cu David tefa sin siangpahrang ih thuai ah thuneihnak kimten ka pe ding. Hna a ṭuan theinak dingah a kut ah tawhfung pawl ka pe dingih amah ih a on mi cu zohman in an khar lo ding; amah ih a khar mi cu zohman in an ong lo ding.

²³Amah cu a hngetzet mi thil bannak fungkhen bangin ka hngetter dingih a innsungsang zate hrangah mithmaiṭha ngahnak a hrampi a si ding.

²⁴“Asinain a sungkhat pawl le a cawm mi pawl cu a hrangah thilrit zet an si ding. Thil bannak fungkhen ah beel le kheng pawl an thlai vekin a parah an thlai aw ding.

²⁵Cui ni a thlen tikah hngetzet ih khen mi fungkhen cu a der dingih a tlong ding. Cuticun a parih a thlai awmi khal cu an cem ṭheh ding,” tiah a ti. BAWIPA in a sim zo a si!