Read Falam Chin ISAIAH 23 Bible Online

ISAIAH 23 - Falam Chin bible

ISAIAH 23

¹Tair khua hrangih a thlengmi thu: Tipithuanthum parih khualtlawng mi pawl, riahsia in ṭap ai-uh! Nan suah nan luhnak khawpi Tair cu a siat ṭheh zo; inn pawl le lawng colhnak tla a siat ṭheh zo. Saipras ihsin nan lawng pawl an kir tikah cuih thu cu nan thei.

²Maw Sidon khua ih sumtuahtu pawl, ai-hram uh! Nan minung pawl cu,

³Izipt ramih a suak mi rawl lei le zuar tahratin ram tinkim thawn sumtuah dingah tifinriat parah nan thlah hai.

⁴Maw Sidon khawpi, ningzakza na si. Tifinriat le tipithuanthum thuuk pawl in an lo khaak ih, “Faate ka nei dah lo. Fapa le fanu khal ka cawm dah lo,” a ti.

⁵Tair a siat ṭheh a si, ti an theih tikah cun Izipt mi pawl hman an mang a bang dingih an riah a sia ding.

⁶Maw Foenisia mi pawl, riahsia in ṭap-ai uh! Spain ramih tlanhlo tum uh!

⁷Khuahlan lai ih an rak din mi, nomnak in a khat mi Tair khawpi rak timi cu hihi a si pei maw? Tifinriat khatlam ralah ramdang lak ding le luah dingah tifinriat raal ih mi a thlahtu khawpi cu hihi a si pei maw?

⁸Leilung tlun ih upat bik mi sumtuahtu tum zetzet umnak, mi-uk bawi umnak Tair khawpi parah zoso hibangtuk in thu a tawlrel?

⁹Cungnungbik BAWIPA ih tawlrelmi a si! An hngalnak le an tluangkhawnnak cemter dingah le an upat mi pawl mualpho ter dingah Pathian in a tuah mi a si.

¹⁰Maw Spain ram a va luahtu pawl, va feh uhla lo va thlo uh! A lo humtu ding zohman an um nawn lo.

¹¹BAWIPA in a kut cu tifinriat parah a khai ih ram tampi a hlon ṭheh zo. Foenisia ramih pursum leilawnnak hmun tumpipi pawl tla siat ṭheh dingin thu a pek.

¹²Maw Sidon khawpi, na lungawinak a cem zo. Na minung pawl cu hremnak an tuarih Saipras ih an tlan khalle an him cuanglo ding. (

¹³Tair khawpi hramlak ramsa tlannak ih a cangtertu cu Assiria mi an si lo, Babilon mi an si. Raldonak innsang cu Babilon mi pawl in an sak ih Tair khawpi kulhnak ralhruang an bal ih khawpi cu an siatsuah ṭheh a si.)

¹⁴Maw tipithuanthum parih lawng thluntu pawl, riahsia in ṭap-ai uh! Nan rinsanzet mi khawpi cu a siat ṭheh zo a si.

¹⁵Tair khawpi cu siangpahrang sankhat sung caan, kum sawm sarih sung an hngilh tikcu caan a rathleng ding. Cui kum a cem tikah Tair khawpi cu hla sungih hlawhhlangnu vek a si ding.

¹⁶Na ṭingṭang la awla khua sungah tawivak aw; Nang, hngilh zo mi hlawhhlang nu! An lo theih salnak dingah, Na ṭingṭang tum awla na hla sak saal aw.

¹⁷Cui kum sawm sarih a cem tikah BAWIPA in Tair cu a hnaṭuan hlun a ṭuanter saal dingih leilungtlun ramkipah hlawhhlang nu a cang saal ding.

¹⁸Pursum leilawn ihsin a ngah mi paisa cu BAWIPA hnenah pek a si ding. A paisa cu a khawl ciamco lo ding, a sinan BAWIPA a biatu pawl in a paisa cu rawl leinak le an hai mi an hnipuan leinak ah an hmang ding.