Read Falam Chin ISAIAH 24 Bible Online

ISAIAH 24 - Falam Chin bible

ISAIAH 24

¹BAWIPA in leilung a siatsuah ṭheh dingih a ṭhing reprep ding. Leilung cu a linglet ter dingih minung pawl a ṭhekdarh ṭheh ding.

²Zozo khal sisehla an ton mi a bangraan ṭheh ding-puithiam pawl le senpi pawl, sal pawl le bawi pawl, a leitu le a zuartu pawl, paisa coihtu le cawitu pawl, milian le mifarah pawl an ton mi a bangrep ṭheh ding.

³Leilung pumpi cu a khingkuai ṭheh dingih a siatbal ṭheh ding. BAWIPA in a sim zo ih a sim vekin a cang ding.

⁴Leilung cu a caar ih a vuai ṭheh; leilung pumpi cu a derdai; lei le van a siatral ṭheh.

⁵Mi in Pathian daan an buar ih kumkhua hrangih a tuah mi thukamnak cu an siatbal; cuticun leilung an borhhlawhter a si.

⁶Cuhrangah leilung cu siat dingah Pathian in a cam. Leilung mi in an sualman an tuar a si. A nungmi an mal deuhdeuh.

⁷Sabit kuang pawl an vuai ih sabit a har deuhdeuh. Lungawi sopar teih a rak um ṭheu mi pawl cu riahsiatnak in an khat.

⁸Nuamzet ih hla an sak ṭheunak ṭingṭang le khuang pawl cu an dai zo.

⁹Zu an in hmanah nuamzetin hla an sa thei nawn lo; zu ih thawtnak khal an thei nawn lo.

¹⁰Khawpi sung ah ziang hmuahhmuah a buai ṭheh; minung pawl cu luat duh ah inn sungah an kharhkhum aw ṭheh.

¹¹Mi pawl cu lamzin ah an dingih zu duh ah an au. Nomnak zianghman a um nawn lo; nomnak cu ramsung ihsin kumkhua daih in dawihlo a si zo.

¹²Khawpi cu a siat ṭheh ih a kotka pawl cu a bal ṭheh.

¹³Leilung tlun ramkipah cuticun a si ṭheh ding. Rawl lak caan a cem ih olif kung ihsin olif rah an vuakthlak ṭheh ih pakhat hman taanglo ih an lak ṭheh caan a bang ding.

¹⁴A taangsun pawl cu lungawi in hla an sak ding. Nitlak lamih a um mi pawl in Pathian a nasatzia an phuang dingih,

¹⁵nisuahnak lamih a um mi pawl in an thangṭhat ding. Tifinriat kap tluan ih a um mi pawl in Israel ih Pathian BAWIPA cu an cawimawi ding.

¹⁶Leilung tlunih a hlabik ram hman in Israel miphun, miphun dik, an thangṭhatnak hla cu kan thei ding. Asinain kei ih hrangah cun beisei ding a um lo. Ka cem deuhdeuh ih ka taksa ruangpi in a daih nawn lo. Mi zuarthlaitu pawl in in zuarthlai thotho ih in zuarthlainak cu ani ani in a besia deuhdeuh.

¹⁷Maw leitlun minung pawl, tuksumnak a um, khur thuukpi a um ih nan hrangah thang kam cia in a um.

¹⁸Tuksumnak ihsin tlanhlo a tumtu cu khur sungah an tla ding; khur ihsin a tlantu cu thang in a awk ding. Van ihsin ruah nasazet in a sur dingih leilung hramṭonak a hnin ṭheh ding.

¹⁹Leilungpi cu a khing ding, a kuai dingih a phel aw ding.

²⁰Leilungpi cu zuri bangin a sawn dingih thlisia lakih deute bangin a tlu ding. Leilungpi hi a sualnak in a delh tuk zo; a tlu dingih a thosal nawn lo ding.

²¹BAWIPA in tlunlam ih a um mi huham neitu pawl le leilung parih mi-uktu pawl a hremnak tikcu caan a ra thleng ding.

²²BAWIPA in khur sungih thawngtla bangin siangpahrang pawl a khawm ding. Anmah hremnak tikcu caan a thlen hlan cu thawnginn sungah a khum hai ding.

²³Thlapi a thim ding; ni a tlaang lo ding; ziangahtile Cungnungbik BAWIPA cu siangpahrang a si ding. Jerusalem khua Zion Tlang ihsin a uk dingih misenpi hotu pawl in a sunlawinak huham an hmu ding.