Read Falam Chin ISAIAH 27 Bible Online

ISAIAH 27 - Falam Chin bible

ISAIAH 27

¹Cui ni ah tipithuanthum sungih a um mi rul tumpi that dingah le a ngerh aw mi le ṭihnungza Leviathan[10] rul cu hrem dingah BAWIPA in a cak mi le a hmual a ṭha mi a ralnam a hmang ding.

²Cui ni ah BAWIPA in a nuamzet mi a sabit hmuan thu ahcun,

³“Ka sabit hmuan cu keimah in ka kil ih ti ka toih ringring. Zohman ih an siatsuah lonak dingah a sun a zan in ka kil.

⁴Atu ahcun ka sabit hmuan parah ka thin a heng nawn lo. Hling le so an um ahcun keimah in ka do dingih ka ur fai ṭheh ding.

⁵Asinain ka minung ih ral pawl in keimai humhimnak an duh a si ahcun keimah thawn remnak tuah hai seh. A si, keimah thawn remnak tuahta hai seh,” a ti ding.

⁶Cui ni ah Israel mi, Jakob ih tefa sin pawl cu thingkung bangin hram an thla saal ding; an mum dingih an par ding. Cuticun leilung tlunah an rah a khat ding.

⁷Israel mi pawl cu an ral pawl tluk cun BAWIPA in a hremsiat lo; a thi mi khal an ral pawl zat in an tam lo.

⁸BAWIPA in a minung pawl cu sal taannak ih kuatnak in a hrem hai. Nisuahnak lam ihsin a hrangmi thlisia a semhlo ter a si.

⁹Khawvel pawl biakṭheng ih dawl mi lungto pawl miphiu vut vekih rialdip a si hlanlo le Asherah pathian nu can ai-ih thing phun mi le rimhmui urnak biakṭheng pawl a um sungah cun Israel sualnak cu ngaidam a si lo ding.

¹⁰Ralhruang ih kulh mi khawpi pawl cu an siatbal ṭheh zo! Hramlak ramṭhing bangin an lawngih an ṭhing reprep. Ṭilva tlannak ramah a cangih ṭilva pawl an um ih rawl an piat.

¹¹Thinghnge pawl tla an ro ih an kiak ṭheh; nunau pawl in tih thing ah an hlam. Ziangahtile minung pawl in zianghman an theihthiam lo ruangah anmah seemsuahtu Pathian in an parah lainatnak le zaangfahnak zianghman a nei nawn lo ding.

¹²Cui ni ah BAWIPA in, Zufrates tiva ihsin Izipt ramri tiang a minung pawl pakhat hnu pakhat a khawm dingih fang le fanghi ṭhen bangtuk in a ṭhen ding.

¹³Cui ni a thlen tikah Assiria le Izipt ramih saltaangmi Israel mi pawl ko dingah tawtawrawt an tum ding. An ra dingih Jerusalem khua, a tlang thiang parah BAWIPA an biak ding a si.