Read Falam Chin ISAIAH 29 Bible Online

ISAIAH 29 - Falam Chin bible

ISAIAH 29

¹Maw Jerusalem, Pathian biakṭheng, na cem a si! David khawpi cu a cem riai a si! Kum khat hnih cu awh hrih ko seh, puai tuahnak le nomnak pawl thawn!

²Cule “Pathian biakṭheng,” timi khawpi parah cun Pathian in thilṭha lo poimawh a thlengter ding. Cutikah ṭahnak le au-nak a um dingih Jerusalem khawpi pumpi thisen in a khuh mi thawinak biakṭheng ah a cang ding.

³Pathian in hi khawpi cu a ral dingih a do dingih a kulh ṭheh ding.

⁴Jerusalem cu leilung thuai ihsin hung ṭongsuak a tumtu mithla vek, leivut lakih sin a hung phun supso tu aw vek a si ding.

⁵Maw Jerusalem, nangmah a lo dotu ramdang mi pawl cu leivut bangin semhlo ṭheh an si dingih ṭihnungza an ralkap pawl cu fangkungro bangin an zamhlo ṭheh ding. Hmakhatte-ah rinlopi-in,

⁶Cungnungbik BAWIPA cun a nasazet mi thli le ruah, khuari le ṭeek tla le linghnin in a lo run ding. Thlisia le a alh hluarhlo mi meisa a run thlak ding.

⁷Cutikah Jerusalem khawpi, Pathian biakṭheng timi khua a dotu ih ralkap hmuahhmuah, an hriamnam le an thilri pawl le an ken mi hmuahhmuah cu mang vekin le zan kan ih ih kan mitthlam ih a cuangduak mi vekin an hloral ṭheh ding.

⁸Jerusalem do dingah a puum aw mi ram hmuahhmuah cu, rilrawng zet pa a mangah rawl thawzetzet a ei ih a maai rero naón a ṭhangsaal tikah cun rilrawng thotho a sivek le tihal zet pa a mangah tidai riamzet in a in rero naón a ṭhangsaal tikah cun tihal le dangcaar thotho ih a um vekin an si ding.

⁹Feh uhla mi aa si hrih ko uh! Nan mit cu caw hrih ko seh! Zu zianghman in loin ri uh! Zureu forkhat hman in loin sawn rero uh!

¹⁰Thizik ih it that dingah BAWIPA in nan ih a lo hmuh ter hai a si. Profet pawl hi misenpi ih mit an si ding naón Pathian in an mit a hup a si.

¹¹Profet ih an hmuh mi langnak hmuahhmuah a tican nan theih theilonak dingah thuh in a um dingih an erh pit mi cazual vek a si ding. Casiar thiam hnenah nan fehpi ih in siarsak hnik aw nan ti hmanah ka siar thei lo, an erh pit a si si, a ti ding.

¹²Casiar thiamlo hnenah nan pekih in siarsak aw nan ti khalle ca siar ka thiam ual lo, a lo ti ding.

¹³BAWIPA in, “Himi pawl cun in bia naón an ṭong cu tican neilo a si ih an thinlung cu khuimaw lamah a vakvai. Annih hrangah cun biaknak timi cu milai ih tuahcop mi daanterek le thilti ṭheu daan pawl khi a si ih, zoh loih an siar mi pawl khi a si.

¹⁴An ruah lopi in an parah harsatnak pakhat hnu pakhat ka thlengter ding. Mifim timi pawl cu mi-aa ah an cang dingih an fimnak cu zianghman ah a ṭhahnem lo ding,” tiah a ti.

¹⁵An tumtahmi BAWIPA hnenih sin a thuptu pawl cu rei an awh lo ding. An tum mi cu thupte in an tuah ih, “Zohman in in hmu lo, zohmanin an thei lo,” an ti.

¹⁶Thil hmuahhmuah an linglet ter ṭheh. Beel tuahtu maw, beel tuahnak tlak so a thupi sawn? Minung ih tuah mi thil in a tuahtu hnenah, ‘Ziangah so i tuah?’ a ti thei ding maw? Asilole, “Na tuah mi hi zianghman na thei lo,” tiah a sim thei ding maw?

¹⁷Ṭongṭhimnak ih a um vekin a rei hlanah tupi ngawzet cu loram ah a cang dingih loram cu tupi ah a cangsal ding.

¹⁸Cuih ni a thlen tikah hnaset pawl in cauk thangzet ih an siarmi kha an thei dingih caan reipi khawthim sungih a um zo mi mitcaw pawl in an mit an meng dingih khua an hmu thei ding.

¹⁹Mifarah le mi lungnem pawl in Israel Pathian thianghlim ih pekmi lungawinak cu an co saal ding.

²⁰Cutikah midang a hmuhsuam a hremtu le Pathian zianghman ih a siarlo tu pawl cu an cem ding. Misual hmuahhmuah cu siatsuah ṭheh an si ding.

²¹Pathian in midang a thangsiat tu, miṭha lo pawl hrem a khamtu le mifel pawl an felnak vekih thuhman coter duh lo ah thuphan a pertu pawl cu a siatsuah ṭheh hai ding.

²²Curuangah Israel ih Pathian, harsatnak sung ihsin Abraham a suahtu BAWIPA in, “Maw ka minung pawl, mualpho in nan um nawn lo ding; ningzak in nan hmai a raam nawn lo ding.

²³Ka lo pek dingmi tefa pawl nan hmu dingih cuticun keimah cu Israel ih Pathian thianghlim ka si kha in theithiam ding. Upatnak in pe dingih khawruahhar ṭihzahnak thawn ka hmaiah nan ding ding.

²⁴Mi aa pawl in thil theihthiamnak an nei dingih a phunzaitu le a tlokciar ringring tu pawl khal lungawizet in zirh an theih ding,” tiah a ti.