Read Falam Chin ISAIAH 30 Bible Online

ISAIAH 30 - Falam Chin bible

ISAIAH 30

¹BAWIPA in, “Judah ram uktu pawl cu an cem a si. Ziangahtile keimah dodaltu ah an cang. Keimaió khawkhannak a si lo mi an thlun ih ka lungkimnak tel loin lungkimnak cachuk an tuah; cuticun sualnak pakhat hnu pakhat an thuah vivo.

²Keimah ron hmaisa loin bomnak duh ah Izipt ramah an feh. Izipt in in hum seh ti an duh ih Izipt siangpahrang an rinsan a si.

³Sikhalsehla an siangpahrang in a bawm thei hai lo ding; Izipt ih humhimnak cu hloralnak ah a net ding.

⁴An ram palai pawl cu Izipt ram khawpi Zoan le Hanes an thlengzo naón,

⁵bomnak an ṭulzet laifangih a bawm theilotu ram, rintlak a si lo mi ram an rak rinsan pang cu Judah mi pawl an siir zet saal ding,” tiah a ti zo!

⁶Thlanglam nelrawn ramih ramsa pawl thu ah Pathian in hiti in a sim; “Ram palai pawl cu ṭihnunnak ram, kiosa le rulhraang pawl le a zam thei mi dragon rul pawl umnak ah khual an tlawng. Mi zianghman bomnak a pe theilotu ram hnenih laksawng pek dingah thilri mankhung zetzet cu an laak le an kalauk parah an suang ciamco.

⁷Izipt in bomnak cu thulolak a si. Curuangah Izipt cu, ‘ṭihtlak lo Rulpi,’ tiah hmin ka pek zo,” tiah a ti.

⁸Ziangtluk miṭha lo an si kha kumkhua ih hminsinnak dingah an thuhla cu cauk sungih ngan dingin Pathian in i fial.

⁹Pathian dodaltu an si ringring, thuphan pertu an si ringring ih Pathian zirhnak kha an thlun duh hrimhrim lo.

¹⁰Profet pawl hman cu, “Daite in um uh, ṭong hlah uh! Hihi a hman ee, khakha a hmanlo ee, tiah in sim duh hlah uh! Kan theih duh mi a nuam mi lawnglawng in sim uh. Kanmah umteón um ve mai uhsi!

¹¹In kian uh, kan lamzin in kham hlah uh! Nan ‘Israel ih Pathian thianghlim,’ thu cu a theih kan duh nawn lo,” an ti.

¹²Sikhalsehla Israel ih Pathian Thianghlim cun, “Ka lo sim mi cu zianghman ah nan siarlo ih mibumnak le thisen luannak sawn nan rinsan a si.

¹³Mimawh hrimhrim nan si. Phar dawl a tlun ihsin a hnuailam tiang a khingkuai mi bangtuk nan si ih rinlopi ah nan tlu leh ding.

¹⁴Tlak beel a kuai ih meivam laknak ah le tikuang ihsin tidai vun suahnak hman umlo ih a kuai thluh bangin nan kuai thluh leh ding,” tiah a ti.

¹⁵BAWIPA Israel ih Pathian Thianghlim in misenpi hnenah, “Rakir saal uhla daitein keimah i rinsan uh. Dai ziarzi ih um cu nan cahnak a si ih nan him ding,” tiah a ti. Asinain cutiih um cu nan duh lo.

¹⁶“Rang tlan cakzet pawl kan to dingih kan raal pawl ih hmuh lonak ah kan tlan ding,” nan ti. A si, nan hman; nan tlanhlo ngai ko ding. Kan rang pawl cu an cakzet a si, nan ti; a sinan a lo dawitu pawl cu nannih hnakin an cak sawn ding;

¹⁷Nan ral pakhat nan hmuh tikah nannih cu thawngkhat nan tlan ding; nan ral panga nan hmuh ahcun nan zate in nan tlan ṭheh ding. Nan ralkapbu sungin pakhat hman nan taanglo ding; a taangmi cu tlangzim parih amah lawng lungleng ih a dingmi nan thantaar ṭhuam pakhat lawng a si ding!

¹⁸Cubangtuk a sinan BAWIPA cu nan parah zaangfahnak a nei lai hrih. Amah cun thil hman lawnglawng a tuah ruangah nanmah zaangfah dingah a lo hngak lai hrih. Lungawinak taktak cu BAWIPA rinsannak ihsin a ra a si.

¹⁹Maw Jerusalem ih a um mi pawl, nan ṭap nawn lo ding. BAWIPA cu lainatnak neitu a si ih bomnak dilin a hnenih nan au tikah a lo theihsak hai ding.

²⁰BAWIPA cun harnak le tuarnak sungah a lo thlenter hai ding, a sinan nan tuarnak hmunah cun a um ve dingih a lo zirhtu a si ding; cuticun amah nan hawl rero a ṭul lo ding.

²¹Zin nan hlo ih vorhlam le kehlam ih zinpeng nan zawh tikah nan dunglam ihsin a aw cu, “Hitawkin feh uh; hinah lamzin a um,” tiah a ti nan thei ding.

²²Sui le ngun in huut mi nan milem pawl cu hnawmhne bangin nan hlonhlo dingih, “A hmuh ka lo duh nawn lo!” nan ti ding.

²³Rawl ci nan tuh tikah BAWIPA in ruah a sur ter dingih rawl a ṭhan ter ding, rawl nan paṭha dingih nan ṭilva pawl tlannak khalah hramno a tamzet ding.

²⁴Nan lo leilettu cawcang le laak pawl in a ṭhabik le a thawbik ṭilva rawl an ei ding.

²⁵Cui ni a thlen ih nan ral pawl ih ralhruang nan lakih an minung pawl nan thah tikah tlangsaang le tlangniam hmunkip in tidai an luang ding.

²⁶Thlapi cu ni tlukin a tleu dingih ni cu a tleu keel ih let sarih in a tleu ding; ni sarih tleunak khi ni khat ah kom hai sehla a bang ding. A tlunih thil cang ding pawl cu BAWIPA in a minung hnenih a thlenter mi hma pawl a tuamsak hai ih a damter tikcu caanah a kim ṭheh ding a si.

²⁷Pathian ih huham le sunlawinak cu a hlatpi in hmuh thei a si. Meisa le meikhu in a thinhengnak an langter. Thu a sim ih a ṭong cu meisa bangin a alh.

²⁸Ziang hmuahhmuah a fenhlo ṭheh tu tilian bangin a hmaiah thli a hran ter. Cui thli cun ram tampi a siatsuah ih a ṭha lomi an tumtahnak tla a cemral ter ṭheh.

²⁹Sikhalsehla nannih Pathian ih minung pawl cu nizarh ni puai tuah zanih lungawi in hla nan sak bangin lungawi le hlasa in nan um ding a si. Israel a ṭantuBAWIPAIÓ Biakinn an feh laiah phirivau tum phah in lungawizet ih a fehtu pawl bangtuk in nan lung a awi ding.

³⁰BAWIPA in a nasazet mi a aw cu mi hmuahhmuah a theihter dingih a thinhengnak hmual khal a ton ter hai ding. Meisa hliozet a um dingih khawdur a puak ciamco ding; rial a tla dingih ruah cu a thlet in a thle aw ding.

³¹Assiria mi pawl cuBAWIPAIÓ aw an theih tikah le a hremnak hmual an ton tikah an tuk a suum ding.

³²Pathian in Assiria mi pawl a hrem beet vivo tikah amai minung pawl cun khuang le ṭingṭang aw thawng an thlun ding. Pathian amah rori in Assiria mi pawl cu a do ding.

³³Meisa rumzet sungih Assiria siangpahrang ur-nak ah tiah khuahlan lai ihsin hmun pakhat cu timlaam cia in a um zo. Cui hmun cu a thuuk ih a kauzet; zanthing tla saangzet in an peng zo! Kaat meisa bangtuk a si miBAWIPAIÓ thaw in a ur ding a si.