Read Falam Chin ISAIAH 35 Bible Online

ISAIAH 35 - Falam Chin bible

ISAIAH 35

¹Nelrawn ramṭhing cu a lung a awi ding; Hramlak ah pangpar an par ding.

²Nelrawn cu hla a sa dingih lungawi in a au ding; Lebanon Tlang bangin a mawi dingih, Karmel le Sharon ih lo bangin ramṭha a si ding. Zokhal in Pathian sunlawinak cu an hmu ding, A nasatzia le a huham neihzia an hmu ding.

³Kut caklo pawl cakter uhla, A ṭawnṭai ih a thir mi khuk pawl hngetter uh.

⁴Thinnau mi le beidong mi hnenah, “Cak uhla zianghman ṭih hlah uh; Pathian nanmah run dingah a ra lai, Na ral pawl parih phu lak dingah a ra a si,” tiah sim uh!

⁵Mitcaw pawl in khua an hmu thei dingih, hnaset pawl an hna a vaang ding.

⁶Ke-awl mi in an khir an laam dingih, A ṭong theilo mi khal lungawi in an au ding. Nelrawn sungin tidai a luang dingih,

⁷A alh mi vunnel cu tili ah a cang ding. Leilung a caar mi cu ticawm in a khat saal ding. Cinghnia an rak um ṭheunak hmunah, Phok le phaipheng tla an kho ding.

⁸Cutawkah cun misenpi hrang lam tumpi a um dingih “Thianhlimnak Lamzin,” ti a si ding. Misual pawl cu cuih lamzin ah an feh theilo ding. Cutawkih a fehtu pawl cu mi-aa pawl ih hruaisualnak an tong lo ding.

⁹Cutawkah cun kiosa a um lo ding; Sahraang dang tla in an pal lo ding. BAWIPA ih a runsuak mi pawl cu, Hi lamzin thlun in an inn ah an tlung ding.

¹⁰Lungawi sopar tein Jerusalem an thleng ding, Nunnuam zetin hla an sa dingih an au ding. Ninghan riahsiatnak in an luat thlang dingih, Kumkhua in an nun a nuam tata ding.