Read Falam Chin ISAIAH 36 Bible Online

ISAIAH 36 - Falam Chin bible

ISAIAH 36

¹Siangpahrang Hezekiah in Judah ram a uknak kum hleili kumah Assiria ram siangpahrang Sennakherib in ralhruang in kulh mi Judah ram khua pawl a do ih tampi a lak.

²Cuihhnu ah a kutthuai ih bawi upabik cu ralkap tampi thawn Judah siangpahrang Hezekiah cu remnak tuahter dingah Lakhish ihsin Jerusalem ah a thlah. Cui a thlah mi bawi cu puan taktu pawl hnaṭuannak lamzin, tlunta tili ihsin tidai an laknak tihriat kiangah a um.

³Cutikah Judah mi upa pathum in an va tong: Siangpahrang inn hnaṭuantu pawl hotu Hilkiah ih fapa Eliakim, zung cazipi Shebna le cazin kaitu Asaf fapa Joah an si.

⁴Assiria ralbawipa cun, “Ziangah so siangpahrang Hezekiah hi amah le amah zum awzet in a um? tihi kan siangpahrang in a thei duh.

⁵Ṭong meenmeen hin ralkap lam cahnak le thiamnak hi a ai-awh thei ding tiah nan ruat maw si? Keimah do dingah hin zo in in bawm ding tiah so nan ruat?

⁶Ka thei ko, Izipt in in bawm ding tiah nan zum. Sikhalsehla Izipt rinsan cu ziang a bang nan thei maw? Kianghrol ah phaipheng kuang hman vek a si-a kiak ih na kut a lo aat. Izipt siangpahrang an rinsan tikah cun cubangtuk a si ringring ko.

⁷“Asilole BAWIPA nan Pathian nan rinsan a si maw? Hezekiah in biakṭheng pakhat lawngah Pathian nan biak ding tiah Judah le Jerusalem mi pawl thu a pekih a dang biakinn le biakṭheng pawl hmuahhmuah a bal ṭheh mi kha nan Pathian biakinn le biakṭheng pawl sokhaw an si!

⁸Asile kan siangpahrang hmin in thu ka lo tiam pei! Rang thawnghnih ka lo pe ding, a totu dingah minung cuzat na hmu thei ding maw?

⁹Kan Assiria ralkap bawi lakih ralbawi nautabik hman nan tluk lo sokhaw! Cui tlunah Izipt in rangleng le rangpar ralkap pawl in kuat ding nan hei ti lai sapbai!

¹⁰Nan ram ka do ih ka siatsuah hiBAWIPAIÓ bomnak a tello ah mawsi nan ruat? BAWIPA amah rori in nan ram do dingah le siatsuah dingah i fial a si,” tiah a ti.

¹¹Cutikah Eliakim, Shebna le Joah in cuih ralbawipa hnenah, “Kan hnenah cun Aramaik ṭong in ṭong aw! Kan thei ko sokhaw. Hebru ṭong cun ṭong hlah; phar parih a um mi hmuahhmuah in in ngai a si,” tiah an ti.

¹²Assiria ralbawipa cun, “Hi ka thusim mi hmuahhmuah hi nanmah le nan siangpahrang hnen lawngih sim dingah kan siangpahrang in i thlah ah maw nan ruat? Si hlah e; phar parih a totu pawl hnen khalah hi thu hi sim ding ka si; ziangahtile nanmah tla ih nan tuah ding vek thotho in annih khalin an eek an ei dingah an zun an in ding a si,” tiah a ti.

¹³Cule ralbawipa cu a dingih Hebru ṭong in, a aw neih patawp in a au ih, “Assiria siangpahrang in nan hnenih a ṭongmi hi ngaihnik uh.

¹⁴Hezekiah in lo bum rero hlah seh, tiah ralrinnak a lo pek a si. Hezekiah cun a lo run theilo ding.

¹⁵BAWIPA rinsan dingih a lo forhnak cu lung hlah uh; BAWIPA in in run dingih kan khawpi cu Assiria ralkap pawl a laak ter lo ding, tiah zum duh hlah uh!

¹⁶Hezekiah thu cu zum hlah uh. Assiria siangpahrang in atu ah nan khawpi sung ihsin rasuak in remnak tuah dingah thu a lo pek a si. Nan sabit hri ih sabit cu ei ter nan si ko ding; nan theipi kung ihsin theipi cu nan ei ko dingih nan tikhur in tidai cu nan in ko ding.

¹⁷Cule kan siangpahrang in nan ram vek rori a si mi ramah a lo umter dingih cutawkah sabitti nan in theinak dingah sabit hri a um ve ko ih sang tuah dingah fang a um ko.

¹⁸BAWIPA in in run ko ding, tiah ruat dingah Hezekiah in nan thinlung cu lo mol rero hlah seh. Assiria siangpahrang in ram tampi a do tikah an ram ih khuavang pawl in an ram an run suak, ti nan thei dah maw?

¹⁹Khui ah so Hamath le Arpad khuavang pawl an si ṭheh? Khui ah so Sefarvaim khuavang pawl an um? Zo talin Samaria ram an run maw?

²⁰Ram hizat ih khuavang pawl lakah khuavang pakhat talin an ram cu Assiria siangpahrang kut sungin an run maw? An run lo a si ruangah nannih teh nan BAWIPA in Jerusalem a run ding tiah ziangtinso nan zum thiam?” tiah a ti ciamco.

²¹Cutikah misenpi cu an dai khepkhep; Siangpahrang Hezekiah ih a rak tiamcia bangin an dai ih zianghman an sawn lo.

²²Cule Eliakim, Shebna le Joah cu riahsia in an hnipuan an thlekih Assiria ralbawipa ih ṭong mi hmuahhmuah cu an siangpahrang hnenah an va sim.