Read Falam Chin ISAIAH 38 Bible Online

ISAIAH 38 - Falam Chin bible

ISAIAH 38

¹Culai ah siangpahrang Hezekiah cu a na ih a thi zikte. Amoz fapa profet Isaiah in a va veh ih, “BAWIPA in a seherhmi hmuahhmuah tuah ṭheh in sim ṭheh seh, a nunglo ding a lo ti. Curuangah thi dingin tiimlaam aw,” tiah a va ti.

²Cutikah Hezekiah cu phar lamah a herih thla a cam.

³Maw BAWIPA, ka damsung hmuahhmuah ah nangmah rinsan in le rintlakzet in ka lo rian zo ih tuah ding i duhsak mi lawnglawng tuahsuak ka tum ringring cu ciing hram aw,” tiah a ti. Cule nasazet in a ṭap ciamco.

⁴Cule BAWIPA in Isaiah hnenah,

⁵“Hezekiah hnenah va feh awla ‘BAWIPA keimah, na pu David ih Pathian in na thlacamnak cu ka thei ih na mitthli ka hmu zo. Tuihnu kum hleinga ka lo nunter hrih ding.

⁶Nangmah le hi khawpi cu Assiria siangpahrang kut sung ihsin ka lo luatter dingih hi khawpi cu ka hum ringring ding, a ti,’ tiah va sim aw,” a ti.

⁷Isaiah in, “BAWIPA in a thukamnak a kimter ding tinak ah hminsinnak a lo pe ding.

⁸Siangpahrang Ahaz ih a tuah mi ni tahnak kha sun hnuah BAWIPA in a thlaam cu dunglamah kal hra a kir ter ding,” tiah a ti. A ti vekin a thlaam cu dunglamah kal hra a kir saal a si.

⁹A natnak ihsin Hezekiah a dam sal tikah lungawi thangṭhatnak hla a ngan:

¹⁰Ka san ṭhat laitak ah Mithi khua ka thleng ding a si hi, ka ti. Tarkuun ih nunglo dingah ka ruat aw.

¹¹BAWIPA ka tongsaal nawn lo ding, Midang a nungmi zokhal, tiah ka ruat. Minung umnak hi ram ahcun!

¹²Ka nunnak cu sahcat a si ih a cem ta; An bal mi thlaam bangin. Thiamtlang ihsin an tan mi puan bangin. Pathian in ka nunnak a cemter a sihi, ka ti.

¹³Zan vaarte nat tuar in ka ṭap ka ai; Kiosa in ka ruh khiak ṭheh sehla cubangin. Pathian in ka nunnak a cemter a sihi, ka ti.

¹⁴Ka aw cu a diim zetih theih thei a si nawn lo; Thuro bangin ka awn maimai. Vancung lam ka thlirnak ah ka mit an kham ṭheh; Maw BAWIPA, hibang harnak sungin i run aw.

¹⁵Ka sim thei mi ziangso a um? BAWIPAIÓ tuah mi an si ṭheh si! Ka thin a na tukih ka it thei lo.

¹⁶Maw BAWIPA, na hrangah ka nung ding, Na hrang lawngah nun ka duh. I damter awla i nungter hram aw.

¹⁷Ka thin natnak cu daihnakah a cang ding; Ka nunnak cu ṭihphannak sungin na run. Ka sualnak hmuahhmuah i ngaidam ṭheh.

¹⁸Mithi khua ihsin zohmanin an lo thangṭhat theilo ding; Mithi pawl in rintlak na sinak cu an ring theilo a si.

¹⁹A lo thangṭhat tu cu minung pawl an si; Atu ih ka lo thangṭhat bangtuk in. Rintlak na sizia cu pa le pawl in an faate pawl an sim a si.

²⁰Maw BAWIPA, nangmah in i damter zo; ṭingṭang kan tum dingih Nangmah thangṭhatnak hla kan sa ding. Kan nundam sung hmuahhmuah ah Nangmah cawimawinak cu Na Biakinn sungah kan sa ringring ding.

²¹Isaiah in siangpahrang cu, “Theipi rah rialdip awla na khuaihli hma ah ben aw; cule na dam ding,” tiah a ti.

²²Cutikah siangpahrang Hezekiah in, “Biakinn ah ka feh thei saal ding, ti langnak ah ziang khihhmuhnak so a um?” tiah a sut.