Read Falam Chin ISAIAH 41 Bible Online

ISAIAH 41 - Falam Chin bible

ISAIAH 41

¹Pathian in, “A hlatpi ih um mi ram pawl, Dai zirziar in um uhla ka sim mi hi ngaihnik uh! Thurelnak hmunah nan thu cu rak keng uh. Nan thuhla relnak tikcu nan ngah ding. Ra uhla zoso a hman ti kan ruat tlang hnik pei.

²“Mi hmuahhmuah nehtu cu zoso nisuahnak lamin a rak hruai? A fehnak kipah zo in so nehnak a pek? Miphun tampi le siangpahrang tampi tlunah zo in so nehtu a siter? A neh mi pawl cu leivui sihaisehla cubangin a ralnam in a sah thlak! Fangkungro cu thli ih a semhlo bangin a conkiang in a ṭhekdarh ṭheh!

³An dungin a dawi, himdam zetin a feh vivo! Leilung hman a dai manlo titlak in a zamrang.

⁴Hiti ih a ngaihtuahtu cu zoso a si? Leilung tlun thuanthu ih cang dingin a tumtu cu zoso a si? BAWIPA keimah cu a hramthok ah ka rak um zo; BAWIPA Pathian keimah cu a netnak khalah ka um ding.

⁵“Lamhlatpi ram pawl in ka thiltuah mi cu an hmu zo; An ṭih ngaingai ih an thinphang in an ṭhia. Curuangah hmun khatah an tongkhawm aw.

⁶Kutzungthiam pawl tla an bawm aw ih Pakhat le pakhat tha an pe aw.

⁷Lettama in sui sertu hnenah ‘Sui tuah na thiam zet,’ a ti. Milem ngilzet ih a deengtu in Tlawngkhen in a kaikomtu cu a lom. Mi pakhat in ‘Na erh mi cu aṭha a si,’ a ti ih Hngetzetin milem cu an retnak hmunah tlawngkhen in an kheng.

⁸“Sikhalsehla nang Israel ka siahhlawh, Nang cu ka lo hrilzo mi na si. Ka rual Abraham ih tefa sin nan si.

⁹Leilung netnak in ka lo hruai; Vanhram deng ihsin ka lo ko ih, ‘Nang cu ka siahhlawh na si,’ ka lo ti. Ka lo hnong lo, ka lo hril sawn a si.

¹⁰Zianghman ṭih hlah, na hnenah ka um a si. Keimah cu na Pathian ka si, zianghman in lo phangter hlah seh. Ka lo bawm dingih ka lo cakter ding; Ka lo hum dingih ka lo run ding.

¹¹“Na parih thinhengtu pawl cu Mual an pho dingih ningzah an tuar ding. Nangmah a lo dotu cu an thi ding.

¹²Cat lo ih a lo dotu pawl cu Leilung ihsin an hloral ta ding.

¹³Keimah cu BAWIPA na Pathian ka si; Na tha ka lo cakter ih, ‘Zianghman ṭih hlah; ka lo bawm ding,’ tiah ka lo ti,” a ti.

¹⁴BAWIPA in, “Maw Israel, miphun fate le mi ṭawnṭai na si. Asinain zianghman ṭih hlah, ka lo bawm ding. Israel ih Pathian Thianghlim keimah cu a lo runtu ka si.

¹⁵Nangmah cu fang vuaknak fung, a thar, a hriam mi ha a nei mi bangtuk ah ka lo tuah ding. Tlangsang pawl na ciil dingih an siat ding; Tlangmual pawl tla leivut ah an cangṭheh ding.

¹⁶Van ah na khirh hai dingih Thli in a semhlo ding; Thlisia in khuazakip ah a ṭhekdarh ding. Asinain keimah hi na Pathian ka si ruangah nang cu na lung a awi ding. Israel ih Pathian Thianghlim hi i thangṭhat ding.

¹⁷“Ka minung pawl mangbang vansaangin an um ih Tihal in an dang a caar tikah, BAWIPA keimah in an thlacamnak cu ka thei ding; Israel ih Pathian keimah cun ka dungtun dah lo ding.

¹⁸Tlangcar lakih sin tiva an puut dingih Phairawn in cerhti fim an luang ding. Nelrawn cu ticawm in ka khahter dingih Ramcaar cu cerhti luannak ah ka canter ding.

¹⁹Nelrawn ah sidar zanthing ka kho ter ding, Lawithing, lenhmui le olif thing tla ka kho ter ding. Leenkolh ah tupi ka umter dingih cuih tupi ahcun farthing, hualthing le tufar thing an kho ding.

²⁰Cumi cu mi in an hmuh tikah BAWIPA keimah ih tuah mi a si kha an thei ding. Israel ih Pathian thianghlim in hi hmuahhmuah cu a cangter a si tikha an theithiam thlang ding,” tiah a ti.

²¹Israel siangpahrang, BAWIPA Pathian in; “Miphun hmuahhmuah ih khuavang pawl, Nan thuhla cu rel hnik hmeen uh! Nan thiam tawkin sim hnik uh!

²²Hinah ra uhla thil a cang dingmi simcia hnik uh; Thil a cangzo mi pawl ih tican in simfiang hnik uh. Cule hmailam ih thil a cangmi a um tikah a tican kan theih theinak dingah, ziangti zawng in so a kim ding, ti in simfiang hnik uh.

²³Hmailam ih a ra dingmi thuhla in sim uh; Cuticun khuavang ngaingai nan si kan thei ding. Thilṭha pahnih khat tal tuah hnik uh, Asilole thihnak thupoimawh thlenter hnik uh. ṭihnak le tuksumnak in in khahter hnik uh.

²⁴Nanmah siseh, nan thiltuah mi siseh, thuphan hlir nan si! Nanmah a lo biatu pawl le fihnungza an si fawn.

²⁵“Nisuahnak lamih a um mi pakhat ka hril zo; Saklam ihsin do dingah ka hruai ding. Mi uktu pawl cu ciarbek vekin a pal, Beel tuahtu ih tlak a pal bangin a palbeek a si.

²⁶Hi thil a cang ding, tiah in simcia theitu zotal nan um maw? Nan hman ngai a sihi, kan ti dingah zotal nan um maw? Cubangtuk a ṭongtu zohman nan um lo; ṭong kamkhat hman nan ṭong lo, Nan ṭong a theitu pakhat te hman an um lo.

²⁷Keimah BAWIPA cu Zion hnenih hi thuthang a phuang tu hmaisabik ka si. Jerusalem hnenah palai ka thlah ih, ‘Na minung an ra ding! an rakir ding a si,’ tiah sim dingin ka fial a si.

²⁸Nan khuavang pawl ka zoh tikah Pakhat hman in zianghman an ṭong lo. Ka thusuh mi a let theitu zohman an um lo.

²⁹Hi khuavang pawl hi thulolak hlir an si; An tuah thei mi zianghman a um lo. An milem pawl hi mi ṭawnṭai le huham neilo hlir an si.