Read Falam Chin ISAIAH 42 Bible Online

ISAIAH 42 - Falam Chin bible

ISAIAH 42

¹BAWIPA in, “Ka siahhlawh cu hinah a um; Amah cu ka cak ter mi le ka hrilmi a si, A parah ka lung a awi. Ka thlarau in ka khah ter zo ih Miphun hmuahhmuah hnenah thuding a thleng ter ding.

²A au lo dingih a aw tla a saang lo ding; Lamzin khalah ringzet zetin thu a sim lo ding.

³A sawn i a kiak zik mi phaikung a khiak lo ding, A mit zik mi mei inn khal a hmit lo ding. Mi hmuahhmuah hnenah kumkhua in thuding a thleng ter ding.

⁴A bei a dong lo dingih a thin tla a nau lo ding; Leilung tlunah thuding a leeng ter ding. Lamhlapi ram pawl in a thuzirh mi cu an hngakhlap ding,” tiah a ti.

⁵Pathian in van tla khi a seemsuah ih a pharh; Leilung le nunnak a nei mi thil hmuahhmuah a tuah. Minung hnenah nunnak le thaw a peek. BAWIPA Pathian in a siahhlawh hnenah,

⁶“BAWIPA keimah in ka lo ko ih huham ka lo peek, Leilung tlunah thuding a leennak dingah. Nangmah sungin mi hmuahhmuah thawn thukamnak ka tuah ding. Nangmah sungin miphun tampi hnenah tleunak ka thlenter ding.

⁷Mitcaw pawl ih mit cu na vaangter dingih, A thim mi thawnginn sungih a to mi pawl cu na luat ter ding.

⁸“Keimah lawng hi BAWIPA na Pathian ka si. Ka huham cu khuavang dang ka hlawm lo ding, Ka sunlawinak khal milem pawl ka ṭhen lo ding.

⁹A ra thleng ding ti ih ka rak simcia mi cu An thleng ngaingai zo. Atu ahcun thil thar ka lo sim ding, An thlen hlan ihsin ka lo sim cia ding,” a ti.

¹⁰BAWIPA hnenah hla thar sa uh; Leilung pumpi in amai thangṭhatnak hla sa uh. Tifinriat parih a fehtu pawl in amah cu thangṭhat uh; Tifinriat sungih a um mi pawl khalin thangṭhat uh. Lamhlapi ramah a um mi khalin thangṭhat cio uh.

¹¹Nelrawn le nelrawn khua pawl in Pathian cu cawimawi hai seh. Kedar mi pawl khalin cawimawi hai seh! Sela khua ih a um mi in tlangsaang parih sin lungawi in au ciamco hai seh!

¹²Lamhlapi ih a um mi pawl in BAWIPA hnenah thangṭhatnak le sunlawinak pe hai seh!

¹³BAWIPA cu micak bik bangin a feh; Raldo dingah a timtuah ih a hngakhlap zet a si. Raldo dingah a au ih neh dingah a au ciamco. A ral pawl hnenah a huham a hmuh.

¹⁴Pathian in, “Tikcu reipi daiteón ka um zo; Ka minung pawl ka sawn lo. Atu cun ka thok thlang ding; Nau nei ding nunau bangin ka hruum ka ai.

¹⁵Tlangmual le tlangsaang pawl ka siatsuah ding; Hrampi le thingkung pawl ka caar ter ṭheh ding. Tiva horkuam pawl cu nelrawn ah ka tuah dingih, Ticawm pawl ka kaang ter ṭheh ding.

¹⁶“Ka minung mitcaw pawl ka hruai ding; An feh dah lonak lamzin ihsin. An khuathimnak cu tleunak ah ka thleng ding; An hmai ih zin bingbo cu ka ngilter ṭheh ding. Hi pawl cu ka tuah tengteng ding.

¹⁷Milem a rinsantu pawl le Cui milem pawl ka pathian a ti tu cu an ning a zak dingih mual an pho ding a si,” a ti.

¹⁸BAWIPA in, “Nannih hnaset pawl, ṭhatein ngaihnik uh! Nannih mitcaw pawl, naihten zohhnik uh!

¹⁹Ka siahhlawh hnakih mit a caw sawn an um pei maw? Palai ka thlah mi hnakih hnaset sawn an um pei maw?

²⁰Maw Israel, na hmuh mi le na ton mi hi a tamzet zo; Asinain na hrangah zianghman santlai an si lo. Theihnak ah hna na nei; Asinain na theih fel ngaingai mi ziangso a um?” tiah a ti.

²¹BAWIPA cu mi run ding a hiarzet tu Pathian a si; Curuangah a daan le a thuzirh mi kha a sunloih ih, A minung pawl khalin upat hai seh ti a duh.

²²Sikhalsehla a minung pawl cu mi in an ram; Leilung kua sungah an khum ih, Thawnginn hlatpi ah an thup hai a si. Thilri ram mi le lon mi an si; Anmah humtu dingah zohman an um lo.

²³Hi thuhla hi a theitu zotal nan um maw? Tuihnu cun ṭhatein nan ngai thlang lo ding maw?

²⁴Israel hi mi ramtu pawl kutih a petu hi zoso a si? BAWIPA amah a si; Kan dodal ih a parah sualnak kan tuah mi BAWIPA a si. A duhnak vekin kan nung thei lo; A thupekmi vekin kan thlun thei fawn lo.

²⁵Curuangah a thinhengnak in tuarter ih, Raldo harsatnak in tongter a si. A thinhengnak cun meisa bangin Israel ram pumpi a kang; Sikhalsehla ziang a cang rero ti kan thei dah lo; Hi hmuahhmuah ihsin zianghman kan zir ngah mi a um cuang lo.