Read Falam Chin ISAIAH 45 Bible Online

ISAIAH 45 - Falam Chin bible

ISAIAH 45

¹Sairas cuBAWIPAIÓ hrilmi siangpahrang a si! BAWIPA in ram tampi nehtu dingah ṭuanvo a pek. Siangpahrang tampi an huham long dingah a thlah. BAWIPA in a hrangah khawpi kotka pawl a on sak ding. BAWIPA in Sairas hnenah,

²“Keimah rori in na fehnak lamzin ka sial ding; Tlangsang le tlangmual pawl ka rawnter ding. Daar ih tuah mi kotka pawl ka khiak dingih Thir kotkalh pawl cu ka tan ṭheh ding.

³A thimnak le a thupnak hmunih sumsaw pawl ka lo pe ding; Cuticun keimah hi BAWIPA ka si cu na thei dingih, Israel ih Pathian in a lo hril a si, tihi na thei ding.

⁴Ka siahhlawh Israel bawmtu dingah ṭuanvo ka lo pe; Ka hrilmi minung pawl bawmtu dingah. Keimah cu i theilo naón, Upatnak tumpi ka lo pek a si.

⁵“Keimah hi BAWIPA ka si, Pathian dang zohman an um lo. Nang cun i theilo naón, Na hai mi thazaang cahnak ka lo pe ding.

⁶Khatlam vanhramdeng ihsin khatlam vanhramdeng tiang, Mi hmuahhmuah in keimah hi BAWIPA ka sinak le Pathian dang khuihman ih a um lo zia, An theih ṭhehnak dingah hibangtuk in ka tuah a si.

⁷Tleunak le thimnak tuahtu ka si. Thlawsuahnak le thihhloh poimawhnak suahtertu khal ka si. Hi hmuahhmuah a tuahtu cu BAWIPA keimah ka si.

⁸Nehnak cu van ihsin ruah bangin ka sur ter ding. Leilung in cucu a rak pom dingih, Dingnak le luatnak thawn a mum dingih a par ding. BAWIPA keimah in cubangtuk in ka cangter ding,” tiah a ti.

⁹Beel dang vek thotho a si mi tlakbeel pakhat in Beel tuahtu kha thu a el ngam pei maw? Tlak in beel tuahtu kha, “Ziang so na tuah rero hi?” a ti dah maw? Beel in beel tuahtu ih zung mawilonak cu a soi dah maw?

¹⁰Zotal in a nu le a pa hnenah, “Ziangah so hiti vekin in tuah?” a ti ngam dah maw?

¹¹Israel ih Pathian thianghlim, Hmailam thil um ding daan a sersiamtu BAWIPA cun, “Ka faate pawl thuhla ahcun i soisel theinak thu na neilo; Ka kut tuahnak khalah thu i pe theilo ding.

¹²Leilung pumpi a tuahtu cu keimah ka si ih A parih um dingah minung cu ka seem ter. Ka cahnak in van tla khi ka pharh ih, Ni le thlapi le arsi pawl khi ka uk a si.

¹³Sairas a forhsuak tu cu keimah ka si; A ṭha lomi rem dingih ka tumtahnak ṭuansuaktu dingah! A fehnak lamzin cu ka dingter ding. Ka khawpi Jerusalem cu a dinter saal dingih Sal taangmi ka minung pawl a luatter ding. Hi bangtuk tuah dingah zohman in a hlawhman an pe lo, Nawhthuh khal an pe lo a si,” tiah a ti. Cungnungbik BAWIPA in a sim zo.

¹⁴BAWIPA in Israel hnenah, “Izipt le Ethiopia lennak cu na ta an si ding; Seba mi khaansaang pawl cu na sal an si dingih Thir cikcin thawn an lo thlun ding. Na hmaiah an lu an kuun dingih, ‘Pathian in a lo umpi-Amah lawng hi Pathian a si.

¹⁵Israel ih Pathian, a minung pawl a runtu cu, A thup aw mi Pathian a si,’ tiah an phuang ding,” a ti.

¹⁶Milem a tuahtu hmuahhmuah cu an ning a zak ding; An zate in mual an pho ding.

¹⁷Asinain Israel cu BAWIPA in a hum zo; A mi nehnak cu kumkhua daih a si; A minung pawl cu mual an pho dah lo ding.

¹⁸BAWIPA in van tla khi a tuah! Amah cu Pathian a si. Amah in leilung hi a seemter ih leilungah a tuah! Reizet daih ding le hngetzet in a tuah. Ramṭhing le nelrawn hlir ah a tuah lo; Asinain milai umnak tlak ramah a tuah a si. Amah in, “Keimah cu BAWIPA ka si; Pathian dang khuihman ah a um lo.

¹⁹A thupte in ka sim lo, Ka tumtah mi khal hmuh theilonak ah ka thup lo. ‘Ramṭhing le nelrawn ah i hawl uh,’ tiah Israel mi pawl ka ti dah lo. Keimah hi BAWIPA cu ka si ih thutak ka sim. Thudik ka phuang a si,” tiah a ti.

²⁰BAWIPA in, “Ra hnik uh, leilung miphun pawl, Ram uknak a cem ṭheh hnu ih a taangmi pawl, Hmunkhatah ra hnik uh. Nan thuṭhennak hmunah rasuak ciar hnik uh. Zanthing ih tuah mi milem pawl a vahpi rero tu, Anmah a run theilotu khuavang hnenih thlacam tu pawl, Himi pawl cun zianghman theihnak an neilo!

²¹Nan thuṭhennak hmunah nan thu cu ra rel hnik uh! Thuneitu pawl cu pakhat le pakhat ron aw hai seh! Hlanlaipi ihsin hi thil pawl hi a cang ding a si, tiah a rak simcia tu cu zoso a si? A minung pawl a runtu Pathian, BAWIPA keimah ka si lo maw? Pathian dang zohman an um lo!

²²“Leilung tlun minung hmuahhmuah tla, Keimah lam hoikir uhla runak nan ngah ding. Keimah lawng Pathian ka um.

²³Ka sim mi hi thudik a si ih, a thleng aw dah lo ding. Ka hmin sal in thu ka kam a si: Mi hmuahhmuah an ra dingih ka hmaiah khuk an bil ding. Ka hmaiah thu an kam aw ding.

²⁴“Ka hnen lawngah nehnak le cahnak cu a um, tikha an phuang cio ding. Asinain i huatu cu ningzahnak an tuar ding.

²⁵BAWIPA keimah in Jakob tefa sin pawl cu ka run dingih thangṭhatnak in pe ding.