Read Falam Chin ISAIAH 46 Bible Online

ISAIAH 46 - Falam Chin bible

ISAIAH 46

¹“Babilon ih khuavang pawl cu an cem a si! Khuahlanah Bel le Nebo an rak biak mi an si; Atu ahcun laak parah an suang ih, ṭilva baang tertu thilrit ah an cang zo.

²Cubangtuk in an khuavang pawl cu an cem a si. Milem pawl cu anmah le anmah an run aw thei lo. An kaih ih an phurh hlo a si.

³“Maw Jakob tefa sin pawl, i ngaihnik uh; Ka minung sung ihsin a taangsun pawl. Nan seem vete in ka kilkhawi mi nan si ih, Nan suahthlak vete in ka cangcawi mi nan si.

⁴Nan Pathian ka si ih ka lo kil ringring ding, Na ṭuakpar le na tarkuun tiang ka lo cangcawi ding a si. Ka lo tuah ih ka lo kilveng ringring ding; Bomnak ka lo pe dingih ka lo hum ding.

⁵“Zothawn so in ṭhim ding? Keimah bangtu an um maw?

⁶Mi in an paisa bawm an ongih an sui an buur; An ngun cu cuai in an thlai. Sui sertu an saangih milem an tuahter; Cui hmaiah an kuun ih an biak!

⁷An liangah an hun khai ih an phur; Hmun pakhat ah an retih cutawkah a ding ringring. A umnak ihsin hmundangah a ceer thei lo. A hnenih thla an cam tikah a sawn thei lo, Harsatnak sung khalin a hum theilo a si.

⁸“Maw misual pawl, hihi ruat ṭha uh! Ka thil tuahcia mi hi ngaihtuah ṭha hnik uh!

⁹Thil a cangcia mi pawl kha vun mang saal hnik uh! Keimah lawng Pathian ka si kha thei uh; Keimah bangtuk zohman an um lo.

¹⁰A hramthok ihsin ziang a cang ding ti cu ka rak sim cia zo; Khuahlanlai ihsin a cang dingmi cu ka relcia zo a si. Ka tumtah mi cu a pelh dah lo ding, ka ti. Tuah ka tum mi hmuahhmuah cu ka tuah ding a si.

¹¹Nisuahnak lam ihsin mi pakhat ka ko lai; Khaute bangin a rung zam dingih Ka khawkhan cia mi pawl cu a tisuak ṭheh ding. Ka sim zo vekin tuahsuak a si ding.

¹²“I ngaihnik uh, nannih mi lungruh pawl, Nehnak cu a hlatzet hrih lai, ti ih a ruat tu pawl.

¹³Nehnak ni cu ka rak kengih a thlengzik thlang; A hlat nawn lo a si. Ka mi nehnak cu zohman in an tlaiter thei lo ding; Jerusalem cu ka hum dingih, Cutawkih Israel mi hnenah hminthannak ka pe ding,” tiah a ti.