Read Falam Chin ISAIAH 48 Bible Online

ISAIAH 48 - Falam Chin bible

ISAIAH 48

¹Maw Israel mi pawl, hihi ngaihnik uh! Judah tefa sin pawl, ṭhatein ngai uh! BAWIPAIÓ hmin salin thu na kam ih, Israel ih Pathian ka biak, na ti. Asinain na ṭongmi cu na hmurka lawngin a si; Na thinlung ah zianghman a um lo.

²Cui tlunah hngalzet in, “Kei cu khua thianghlim sungih um mi ka si; Israel ih Pathian ka rinsan a si; Amaió hmin cu Cungnungbik BAWIPA a si,” na ti.

³BAWIPA in Israel hnenah, “Khuahlanlai ihsin thil a cang dingmi ka rak simcia zo; Cule hmakhatte-ah ka kim ter.

⁴Na thinlung cu thir le daar bangih ruh zetin A um ding tihi ka rak thei cia zo!

⁵‘Ka khuavang pawl ih cangter mi le, Ka milem pawl ih sim cia mi a si,’ na ti theilonak dingah, thil a cang hlan ihsin ka rak sim cia zo; Hlanlaipi ihsin ka rak sim cia zo a si.

⁶“Ka rak sim cia mi hmuahhmuah an kim ṭheh zo; Ka rak sim mi an hman a si, ti ih na pom a ṭul a si. Atu ah a ra thleng dingmi thilthar ka lo sim ding; A hlanih ka phuan dah lomi thil pawl cu.

⁷Atu lawngah ka cangter ding, Hi bangtuk cu dunglamah a cang dah lomi thil an si. A rak cang dah zo a si ahcun ka theih cia mi a si na ti ding.

⁸Na suahthlak ihsin mi dodaltu na si ih, Rinsan ding na si lo, ti cu ka thei ṭheh a si. Curuangah a si hi thu hi na theih dah lonak le ṭong kamkhat hman na hna ih a thlen dah lonak cu!

⁹“Mi in ka hmin an thangṭhatnak dingah Ka thinhengnak cu ka suup a si; Ka thin ka neemter saal ih ka lo siatsuah lo ding.

¹⁰Ngun cu somei sungih an thianfai ter bangin, Tuarnak meisa sungah ka lo hniksak a si. Asinain man neilo na si cu fiangtein ka thei.

¹¹Curuangah thil ka tuah mi hi ka hmin hrang lawngah ka tuah; Ka hmin cu thangsia in ka umter thei lo; Sunlawinak khal keimai ta lawng a si ih Zohman in an co lo ding,” tiah a ti.

¹²BAWIPA in Israel hnenah, “Maw Israel, ka kawh mi pawl, i ngaihnik uh; Keimah cu Pathian ka si; Hmaisa bik ka si, netabik khal ka si. Keimah lawng hi Pathian ka si.

¹³Leilung ih hramṭohnak cu ka kutih tuah mi a si; Van tla khi ka kutih pharh mi an si. Lei le van ka ko tikah, Hmakhatte ah ka hmaiah an ra ding a si.

¹⁴“Nan zate in pumkhawm uhla ngaihnik uh! Ka hrilmi pa in Babilon a do ding, tiah Khui khuavang hmanin a phuang cia theilo a si. Ka tuahter duh mi cu a tuah ding a si.

¹⁵A hnenah a ṭongtu le a kotu cu keimah ka si; Ka hruai suakih hlawhtlinnak ka pek.

¹⁶I ra naih uhla ka sim mi hi thei hnik uh! A hramthok ihsin nan hnenah zianghman thup loin ka sim; Ka sim mi thu cu a kim ringring a si,” a ti. (Atu ah Cungnungbik BAWIPA in huham i pekih i thlah.)

¹⁷Israel ih Pathian thianghlim, a lo runtu BAWIPA in, “Keimah cu BAWIPA nan Pathian ka si; Nan ṭhatnak dingah a lo zirhtu le Nan fehnak ding lamzin ah a lo hruaitu ka si.

¹⁸Ka thupekmi rak ngai uh cila maw! Nan parah hin thlawsuah malsawmnak cu Ziangtik hman ih a kaang dah lomi tiva bangin a luang ding nan! Nan hnenah nehnak cu, Tifinriat kapih tilet a thlen cingcing bangin a thleng ding nan!

¹⁹Nan tefa sin pawl cu tipikap ih vunnel zat an si dingih leilung tlunah hin a hloral mi nan si lo ding nan!” tiah a ti.

²⁰Babilon ihsin suak uh! Nan luat a si feh uh! Cui thu cu lungawi in tlang-au uh! Khuazakip ah than uhla: “BAWIPA in a siahhlawh Israel a run zo a si!” tiah au ciamco uh.

²¹BAWIPA in a minung pawl cu a caar le a sazet mi nelrawn lakihsin a hruai tikah, tihalnak zianghman an tuar lo. An hrangah lungpi sungin tidai a puut ter. Lungpi cu a kuaiter ih tidai a luang zurzo.

²²“Misual hrangah cun himnak a um lo,” tiah BAWIPA in a ti.