Read Falam Chin ISAIAH 49 Bible Online

ISAIAH 49 - Falam Chin bible

ISAIAH 49

¹Lamhlatpi ih a um mi ram pawl, i ngaihnik uh! Khawtluang ih a um mi pawl tla! Ka suah hlan ihsin BAWIPA in i hrilzo ih Amah riantu si dingah ṭuanvo i pek a si.

²Ka ṭong cu ralnam vekin a hriamter; A kut in i hum. A hriamzet mi le hman dingih retcia mi conkiang bangtuk ah i tuah a si.

³Amah in ka hnenah, “Maw Israel, nang cu keimah riantu na si; Nangmah ruangah mi in in thangṭhat ding,” a ti.

⁴Kei in, “Ka ṭuan rero naón a lak hlir ah an cang. Ka thazaang a cem ṭheh; ka ṭuansuak mi zianghman a um lo,” ka ti. Asinain BAWIPA cu a ṭha lomi ṭhattertu le a diklomi dik ko ih a tuah theitu a si tiah ka ring; Ka ṭuan mi ruangah amah in laksawng i pe ding.

⁵Ka suah hlan ihsin, BAWIPA in ṭuanvo i zem zo; A minung pawl hruaikir saal dingah le a ṭhekdarh aw mi Israel mi pawl kirter saal dingah amah riantu ah i tuah a si. BAWIPA in hminṭhatnak i pek a si. Amah cu ka cahnak hrampi a si.

⁶BAWIPA in, “Keimah riantu, na ṭuanvo thupi sinsin a um: A taangsun Israel mi pawl hnenah A hlan vekin hminthannak na thlenter saal ding lawng si loin, Leilung pumpi runnak an ngah theinak dingah nangmah cu miphun tampi hnenih tleunak ah ka lo tuah ding a si,” i ti.

⁷Mi ih an hmuhsuam zet mi, Miphun tampi ih huat mi, Uktu bawi pawl ih hnen-um ṭuantu hnen ah, A thianghlim mi Pathian, Israel Runtu cun, “Mi luat na si kha siangpahrang tla in an lo hmu dingih an lo upatnak langter dingah an ding ding; Siangpahrang fapa le bawi pawl tla in an lo hmu dingih upatnak in na hmaiah an kuun ding,” tiah a ti. BAWIPA Israel ih Pathian thianghlim in a riantu a hrilzo ih a thukam pawl a kimter ringring ruangah a tlun ih bangtuk in a cang ngaingai ding a si.

⁸BAWIPA in a minung pawl hnenah, “Nanmah runnak ni a thlen tikah ka lo bawm ding; Bomnak nan dilmi cu ka thei ding. Ka lo kilveng dingih ka lo hum ding; Nanmah sungin mi hmuahhmuah hnenah thukamnak ka tuah ding. Nan taantak mi ramsungah cun ka lo umter saal ding.

⁹Thawngtla mi hnenah cun, ‘Suak thlang uh,’ ka ti dingih, Thimnak sungih a um mi hnenah ‘Tleunak sungah ra thlang uh,’ ka ti ding. Cuticun tlang parih hrampi a piat rero tu tuu bangtuk an si ding.

¹⁰An ril a rawng lo dingih an ti tla a haal lo ding; Nisa le nelrawn niling in a siatsuah hai lo ding. Ziangahtile anmah a duhtu in a kilkhawi dingih, Cerhti umnak ah a hruai hai ding a si.

¹¹“Tlang parah lamzinpi ka tuah dingih, Ka minung pawl fehnak lamzin ka sial ding.

¹²Ka minung pawl cu ramhlapi ihsin an ra ding; Saklam le nitlaknak lam, Thlanglam Asuan[11] khua khalin an ra ding,” tiah a ti.

¹³Maw van tla, hla sa uh! Maw leilung, lungawi in au uh! Tlang pawl tla lungawi in hlasa hai seh! BAWIPA in a minung pawl cu a hneem dingih, a tuarzettu a minung pawl parah zaangfahnak a nei ding a si.

¹⁴Asinain Jerusalem mi pawl cun, “BAWIPA in in dungtun zo, in hngilh zo a si,” an ti.

¹⁵Curuangah BAWIPA in, “Nunau in a sungsuak fa a hngilh thei ding maw? A hrin mi a fa cu duhloin a um thei ding maw? A nu in a fa cu hngilh hmansehla, Kei cun ka lo hngilh dah lo ding.

¹⁶Maw Jerusalem, ka lo hngilh thei dah lo ding; Ka kut zaphak parah na hmin cu ka ngan zo.

¹⁷“Nangmah a lo dinsal tu ding pawl cu an rathleng cing dingih, a lo siatsuahtu pawl cu an tlan ding.

¹⁸Na kiangkap ih thil a cangmi pawl hi zohhnik! Na minung pawl an ra-an rakir saal rero lai a si. A nungmi BAWIPA keimah in ka lo kam: Mo in a hlawnthil pawl cu hmaihngal zetih a hruh vekin, hi na minung pawl cu na hrangah hmaihngal tlak hlawnthil bangtuk an si ding.

¹⁹“Na ram cu hnawmpen ah a cangih a ṭhing reprep! Asinain a ra umtu pawl hrangah a fate tuk ding. Cule hnawmpen ih a lo cantertu pawl cu a hlatzet ah ret an si ding.

²⁰Sal taannak ramih a suak mi na minung pawl cun ‘Hi ram hi a fate tuk, ram kau deuh kan duh a si,’ tiah ni khat khatah an lo ti lai ding.

²¹Cutikah na thinlungte-in, ‘Zoso hi faate pawl hi i hrinsak? Ka faale pawl an thi ih nucing ka si zo; Thawng tlakmi le dawihlo mi ka si, Zo in so hi faale pawl hi a kilkhawi? Keimah lawngih taantak mi ka si, khui in so hi faale pawl hi an rat?’ tiah na ti ding,” a ti.

²²BAWIPA Pathian in a minung pawl hnenah, “Ka kut ka hawi pei ih Miphun pawl hnenah khihhmuhnak ka langter ding; Cuticun nan faate pawl cu inn ah an ratpi ding.

²³Siangpahrang pawl cu nan hrangah pa bangtuk an si dingih, siangpahrang bawinu pawl cu a lo tuamhlawmtu nan nu bangtuk an si ding. Nan hmaiah an lu an kuun dingih an lo ṭihzah ding; Nan hmaiah upatnak an lo pe ding. Cutikah keimah cu BAWIPA ka si kha in thei ding; Keimah bomnak a hngaktu pawl cu an bei a dong lo ding,” tiah a ti.

²⁴Ralkap ih lakcia mi thil cu nan long kir thei ding maw? Zaangfah neilotu ih kaih cia mi thawngtla pawl cu nan runsuak thei nawn ding maw?

²⁵BAWIPA in, “A si, a cang theilo nan timi hi a cang ding a si; Ralkap cakzet kut sungih ral kaihmi pawl cu runsuak a si dingih, zaangfah neilotu ih lak cia mi thilri khal lon kir a si ding. A lo dotu hmuahhmuah cu ka do dingih, nan faate pawl cu ka runsuak ding a si.

²⁶A lo hremtu pawl cu anmah le anmah ka thah awkter hai dingih, Mithah duhnak le thinhengnak in an ri ding. Cutikah nanmah a lo humtu le a lo luat tertu cu BAWIPA keimah ka si kha miphun hmuahhmuah in an thei ding. Israel ih Pathian cakzet ka si kha an thei ding,” tiah a ti.