Read Falam Chin ISAIAH 51 Bible Online

ISAIAH 51 - Falam Chin bible

ISAIAH 51

¹BAWIPA in, “Runnak a duhtu pawl, i ngai hnik uh. Ka bomnak duh ih a ra mi pawl. Nan suahnak lungpi kha ruat hnik uh, An lo laih suaknak lung kha!

²Nan pu Abraham le a lo hringtu Sarah kha ruat hnik uh. Ka kawh laiah Abraham cu faate a neilo. Asinain mal ka sawm ih faate ka pe. A tefa sin pawl cu mi tamzet ah ka tuah.

³“Jerusalem parah lainatnak ka nei ding. Siatsuah ṭheh a si mi a khua ramih a umtu pawl parah. A ram cu nelrawn ah a cang naón hmuanduum ah ka cangter saal ding, Eden ih ka ret mi hmuanduum bangtuk in. Lungawinak le thinlung nomnak a um ding, Ka hnenih lungawinak le thangṭhatnak in a khat ding.

⁴“maw ka minung pawl, i ngai uh; Ka ṭong mi hi ngaihnik uh. Miphun hmuahhmuah hnenah ka thuzirhnak ka thlenter ding. Ka daan pawl cu an hrangah tleunak a si ding.

⁵Zamrang zet in ka ra dingih ka run hai ding, Ka mi nehnak cu a nai zo. Miphun hmuahhmuah cu keimah rori in ka uk ding; Ram hlapi pawl in ka rat ding cu an hngakhlap. Ka runnak cu beisei in an hngak a si.

⁶Van tla khi hun thlir hnik uh! Leilung hi cuan hnik uh! Van khi meikhu bangin an hlo ding; Leilung hi hnipuan hlun bangin a ṭet ding; Cule mi hmuahhmuah cu thothe bangin an thi ṭheh ding. Asinain ka mi runnak cu kumkhua daih a si ding; Ka mi nehnak cu sanmureng in a hmun ding.

⁷“Dingnak a theitu nannih pawl, i ngai uh; Ka zirhnak thinlung sungih a rettu pawl! Midang in an lo hro ih an lo hmuhsuam khalle zianghman ṭih hlah uh!

⁸Cubangtuk minung pawl cu hnipuan rop bangin an cem ding. Asinain ka mi runnak cu kumkhua daih a si ding, Ka mi nehnak cu sanmureng in a hmun ding,” a ti.

⁹Maw BAWIPA, tho awla in bawm aw! Na cahnak suah awla in run aw! Khuahlan lai ih na rak suah vekin suah saal aw. Tipithuanthum rulhreng Rahab a thattu le a saat ṭheh tu cu nangmah na si.

¹⁰Tifinriat a kaang tertu le na run mi pawl an fehsuahnak dingah tidai lakih lamzin a tuahtu cu nangmah na si.

¹¹Na runsuak mi pawl cu Jerusalem ah, lungawi aipuang in, hlasak phah le au phah in an thleng ding a si. Kumkhua in an lung a awi dingih riahsiatnak le ninghannak ihsin kumkhua in an luat ding a si.

¹²BAWIPA in, “A lo cak tertu cu keimah ka si. Ziangah so hrampi bangih a san a tawi ih a thi thei mi milai cu nan ṭih rero?

¹³Nanmah a lo tuahtu BAWIPA, Van tla khi a pharhtu le leilung ih hramṭohnak a rettu Pathian cu nan hngilh zo maw si? Ziangah so a lo hremtu pawl ih thinhengnak le nanmah siatsuah ding a tumtu pawl cu khur thlohthlo in nan ṭih rero? An thinhengnak in ziangtik hmanah a lo dai thei dah lo ding!

¹⁴Atu ih thawngtla mi pawl cu a rei hlanah an luat ding, An nun a sau dingih an duhzat in ei ding rawl an ngah ding.

¹⁵“Keimah hi BAWIPA nan Pathian ka si. Tifinriat cu keimah in ka ṭhang ih a tilet pawl cu ka huuk ter ciamco. Ka hmin cu Cungnungbik BAWIPA ka si.

¹⁶Van tla khi ka pharh ih Leilung ih hramṭohnak tla Keimah in ka phun a si. Jerusalem hnenah, ‘Nangmah cu ka minung na si! Ka thuzirhmi ka lo pek zo ih Ka kutin ka lo hum a si,’ ka ti,” tiah a ti.

¹⁷Maw Jerusalem, ṭhang thlang aw! ṭhang awla tho thlang aw! BAWIPA in a thinheng in a lo in ter mi hremnak khuat cu na in zo. A ne tiang na in ih a lo sawn ter zo.

¹⁸A lo hruaitu zohman an um lo. Na minung lakah a kut lo san tahrat in a lo tho tu zohman an um lo a si.

¹⁹Vanduainak phun hnih na tong; Raldonak ruangah na ram cu a siat ṭheh ih, Na minung pawl cu rawl loin an caar ṭheh. A lo zaangfahtu zohman an um lo a si.

²⁰Lamzin kel kipah na minung pawl cu ṭaamsawl in an ril teptep. Thangkam pai thangih awh mi zukneng bangtuk an si. Pathian ih thinhengnak hmual an tong a si.

²¹Harsatnak a tuartu Jerusalem mi pawl, Zuri bangtuk ih a sawn rero tu pawl,

²²BAWIPA nan Pathian cun a lo ṭan ih nan hnenah, “Ka thinheng in ka lo pekmi khuat cu nan kut sung ihsin ka laak saal rero lai a si. A lo sawn tertu zu cu nan in a ṭul nawn lo pei.

²³Nanmah a lo hremtu pawl, Lamzin in a lo ril tertu, hnawmhne pal ih a lo pal tu pawl hnenah cuih khuat cu ka pe ding a si,” tiah a ti.