Read Falam Chin ISAIAH 52 Bible Online

ISAIAH 52 - Falam Chin bible

ISAIAH 52

¹Maw Jerusalem, a nasa ih a cak mi khua si saal aw! Maw Pathian ih khawpi thianghlim, A mawi mi in thuam aw saal aw! Pathian theilo mi pawl cu na kotka sungah an lut saal nawn lo ding.

²Maw Jerusalem, luat thlang aw! Leivut lakih sin tho awla na tokham ah to aw. Maw sal ih a taang Zion mi! An lo ṭeemnak cikcin pawl cu phoih thlang aw.

³BAWIPA in a minung pawl hnenah, “Nanmah leinak ah paisa zianghman an pe lo, Asinain sal ah nan cang. Nanmah tlennak ah zianghman peek a si lo ding, A lakin nan luat ding a si.

⁴A hlanah Izipt ramah nan um ih mikhual ah nan cang. Nehhnu ah ziangthuhla hman umlo in Assiria in a lo hrem hai.

⁵Atu Babilon ah cuvek thotho a cang saal: Ziangthu umlo in salkaihmi ah nan cang. A lo uktu pawl cu puarthau in tluang an khawngih Keimah hmuhsuamtu ringring an si.

⁶Asinain tikcu a ra thleng dingih Keimah cu Pathian ngaingai ka sihi nan thei dingih nan hnenih a ṭongtu hi keimah ka si kha nan lung a pem ding,” tiah a ti.

⁷Tlangpar ihsin a ra ih, Luatnak le daihnak thuthang ṭha a phuangtu ih ke cu ziangtlukin so a mawi? Zion hnenah nehnak thu a than ih “Nan Pathian cu Siangpahrang a si!” a ti.

⁸Khawpi a kilvengtu pawl cu an au, Lungawi in hmun khatah an au ciamco! Zion ah BAWIPA a ra saal zo, ti kha an mit rori in an hmu a si!

⁹Maw Jerusalem ih hnawmpen pawl, Lungawi aipuang in au hluarhlo uh! BAWIPA in a khawpi cu a hum i, A minung pawl cu a hneem.

¹⁰BAWIPA in a huham thianghlim a suah ding, A minung pawl a run ding. Leilung pumpi in an hmu ṭheh ding a si.

¹¹Suak uh! Babilon cu tlansan uh! Biakinn thilri a kengtu pawl! A zarhmi thil zianghman tham hlah uh. Thianghlim te in um uhla hi khawpi cu tlansan uh;

¹²Tuihṭum cu manmawh in nan tlan a ṭul lo ding; Raltlan bangin nan tlan a ṭul lo ding. BAWIPA nan Pathian in a lo hruai dingih nan dung nan hmai in a lo kil ding a si.

¹³BAWIPA in, “Zohhnik, keimah riantu cu a hnaṭuannak ah a hlawhtling ding. Mi ih upat bik mi a si ding.

¹⁴Asinain a hmuihmel a siat ih minung hman a bang lo tikah cun mi tampi an mang a bang.

¹⁵Miphun tampi in an zoh tikah an mang a bang ding, Siangpahrang tampi tla an khawruahhar in ṭong ding zianghman an thei lo ding. An zoh tikah a hlanih an theih dah lo mi an thei ding,” tiah a ti.