Read Falam Chin ISAIAH 55 Bible Online

ISAIAH 55 - Falam Chin bible

ISAIAH 55

¹BAWIPA in, “Ra uh, ti a haal mi hmuahhmuah ra uh, hinah tidai a um Ra uh, paisa a neilo mi pawl rawl ra lei uhla ei uh. Ra uh, sabit le cawhnawi ra lei uh; man loin nan ngah ding.

²Ziangah so rawl a si lo mi hrangah paisa nan hman? Ziangah so pum puarter lomi thil hrangah nihlawh nan pek? I ngai uhla ka sim mi vekin tuah uh; Rawl lakih a ṭhabik mi nan ei dingih nan nun a nuam ding.

³Ka minung pawl, i ngai uhla ka hnenah ra uh; Ka hnenah ra uhla nunnak nan ngah ding. Nanmah thawn kumkhua hmun mi thukamnak ka tuah dingih, David hnenih ka kam mi thlawsuahnak cu ka lo pe ding.

⁴David cu hotu le miphun tampi hruaitu ah ka tuah ih, amah hmangin ka cahnak ka langter zo.

⁵Atu ah miphun tampi nan ko ding; A lo thei dah lotu an si hmanah nanmah lam ṭang dingah an lo pan vivo ding. Israel ih Pathian thianghlim, BAWIPA nan Pathian Keimah in hi bangtuk in ka cangter ding. Upatnak le sunlawinak ka lo pe ding,” a ti.

⁶Ton a theihlai ah BAWIPA cu hawl uh, Anailai ah amah ko uh.

⁷Miṭha lo in an ziaza tlansan in an ruahdan thleng hai seh. BAWIPA kan Pathian hnenah kir hai seh la, a ngaidam lohli ding. Amah cu mi zaangfahtu a si.

⁸BAWIPA in, “Ka ruahnak cu nan ruahnak bangtuk a si lo. Ka lamzin le nan lamzin cu an dang aw a si.

⁹Van tla khi leilung hnakih a saang bangtuk in Ka ruahnak le ka lamzin cu nan ruahnak le nan lamzin hnakin a sang sawn a si.

¹⁰“Ka ṭongkam cu van ihsin leilung ciarter dingih a tla mi vur le ruah ti bangtuk a si. Daidaw le vanruah in thlairawl an ṭhan ter; Ciin dingah thlaici an kho terih ei dingah rawl an suahter.

¹¹Ka kaa sungih a suak mi ṭongkam cu cubangtuk a si ding; Zianghman tuahsuak loin ka hnenah a kir lo ding; Tuah dingih ka tum mi hmuahhmuah cu a tuah ṭheh ding.

¹²“Lungawi zetin Babilon ihsin nan suak ding; Hnangam zetih hruaisuak mi nan si ding. Nan hmaiah tlangsaang siseh tlangniam siseh hla an sa ciamco ding. Thingkung pawl tla lungawi in an au ciamco ding.

¹³Hlingkung khohnak hmunah farthing a kho ding; Hlingbur khohnak hmunah lenhmui kung a kho ding. Himi cu keimah BAWIPA in ka tuah mi theihter saaltu hminsinnak a si ringring ding,” tiah a ti.