Read Falam Chin ISAIAH 64 Bible Online

ISAIAH 64 - Falam Chin bible

ISAIAH 64

¹Ziangah so van khi thlek tahratin na rung ṭum lo? Tlang saangpi pawl in an lo hmu dingih nangmah ṭih ah an khur thlohthlo ding!

²Meisa parih tidai a so bangin an ṭhia rero ding a si. Ra awla na ral pawl hnenah na cahnak huham langter awla miphun hmuahhmuah in an lo hmuh tikah khur rero hai seh.

³Voikhat cu na ra ih kan ruah dah lo mi ṭihnungza thil pawl na tuah zo; tlang pawl in an lo hmuh tikah ṭihnak thawn an ṭhia rero.

⁴An Pathian an rinsan ruangah an hrangah hi bangtuk thil a tuahtu Pathian cu zohman in an hmu dah lo, a theih khal an thei dah lo.

⁵Na duh vekih nung dingah a ciing ṭhatu le thil hman tuah tahrat ih a lung a awi tu pawl cu na lawm ṭheu a si. Kan parah na thin a heng, a sinan kan sual ringring thotho. Na thin a hengzet naan khuahlan lai ihsin kan palh ringring thotho a si.

⁶Kan zate in mi borhhlawh kan si ṭheh; kan hnaṭuan ṭhabik khal cu fihnungzet a si ko. Kan sual ruangah thli ih semhlo mi thinghnah ro bangtuk kan si.

⁷Na hmin ko in thlacamtu zohman kan um lo; nangmai bomnak dil dingah zohman na hnenah kan ra lo. Kan hmuh lo dingah na relh ih kan sual ruangah in dungtun a si.

⁸Sikhalsehla BAWIPA nang cu kan Pa na si. Kannih cu tlak bangtuk kan si ih nang cu beel tuahtu bangtuk na si. Nangmah ih seemsuah mi kan si ih,

⁹kan parah na thinheng tuk hram hlah aw; kumkhua ih sual phurtu khal in siter siang hram hlah aw! Nangmai milai kan si ih kan parah zaangfahnak nei hram aw.

¹⁰Na khua thianghlim pawl cu nelrawn ah an cang zo ih Jerusalem tla hnawmpen le ramṭhing ah a cang zo a si.

¹¹Kan pipu pawl ih an rak lo thangṭhatnak a thianghlim mi le a mawizet mi kan Biakinn khal meisa in a kaang ṭheh a si. Kan sunsak zetmi hmun pawl cu hnawmpen ah an cang ṭheh zo a si.

¹²Maw BAWIPA, hibangtuk thil na hmuh tikah hin na zianghman a poi lo maw si? Dai zirziar in na um ko ding maw si? Kan tuar thei nawn lo tiang in tuarter ding maw si?