Read Falam Chin ISAIAH 65 Bible Online

ISAIAH 65 - Falam Chin bible

ISAIAH 65

¹BAWIPA in, “Ka minung pawl ih thlacamnak let dingah ka tiar aw naón annih in thla an cam lo! Anmah ih ton dingah ka tiar aw naón annih cun a ton hman in tum lo! Ka hnenih thla a cam lomi miphun hnenah, ‘Hinah ka um, ka lo bawm ding,’ ti ih sawn dingah ka ralring naón ka hnenah thla an cam riai lo!

²Thilsual lawnglawng lungruh zetih a tuahtu le anmah ih duhnak lawng a thluntu pawl hnenah catbaang loin ka zaa ka saan.

³Ningzah hman thiam loin ka thin in hengter ringring. Hmuan sung ṭhumhmun ah lawki raithawinak an pekih khawvel biakṭheng parah rimhmui an ur.

⁴Zan ṭhing ah mithi thlarau tong dingah lungpuk le thlaan tla ah an feh. Himi pawl in voksa an ei ih khawvel pawl ih raithawinak sahang an in.

⁵Asinain midang hnenah cun, ‘In dai hlah uh, a thiangmi kan si,’ an ti. Hi vek minung pawl cu zawi cawk ding an si lo; an parih ka thinhengnak cu a mit dah lomi meisa bangtuk a si.

⁶“Anmah hrem ding cu ka ruatcat zo ih ka thuṭhennak cu ngan ṭheh a si zo. An thil tuah mi cu pakhat hman hrelh loin ka hmu ṭheh dingih,

⁷anmah ih sualman le an pipu pawl ih sualman cu an hlawh ding. Khawvel pawl in tlang parih an dawlmi biakṭheng parah rimhmui an ur ih in thangsiat a si. Curuangah annih cu hlanih an tuahnak vekin ka hrem ding a si,” tiah a ti.

⁸BAWIPA in, “Zohman in sabit rah ṭha cu an siatsuah dah lo; sabit rah ṭha cun sabitti an tuahsawn a si. Cuvekin ka minung pawl cu ka siatsuah ṭheh lo ding; Keimah i riantu pawl cu ka hum ding a si.

⁹Judah hrin Israel mi pawl cu ka thlawsuah dingih an tefa sin pawl in tlangpar ram cu an luah ding. Cutawkah ka hrilmi le i riantu pawl cu an um ding.

¹⁰Keimah in bia dingih an tuu le an caw pawl cu tlimno umnak ram nitlaknak lamah Sharon phairawn, nisuahnak lamah Harsatnak phairawn timi ah an thlah ding.

¹¹Sikhalsehla keimah i dungtun tu, ka tlang thianghlim Zion a hnongih vanṭhatnak khuavang Gad le vansiatnak khuavang Meni a biatu nannih pawl hrangah cun cubangtuk cu a si lo ding.

¹²Ka lo kawh tikah in let loih nan hnenih ka ṭong tikah in ngailo ruangah saarthih lawnglawng in nan thi ding. Ka thu el le a ṭha lomi tuah cu nanmah ih hrilmi a si.

¹³Curuangah ka lo sim hai: Keimah i biatu le ka thu a thluntu pawl cu ei ding le baar ding tampi an nei ringring ding; a sinan nannih cu nan ril a rawng dingih nan ti a haal ding a si. Annih cu an lung a awi ding; a sinan nannih cu ningzak le hmaisia in nan um ding.

¹⁴Annih cu an thin nuam in hla an sa ding; a sinan nannih cu nan thinlung kuai in nan ṭap ding.

¹⁵Ka hrilmi ka minung pawl in nan hmin cu thlalet camnak ah an hmang ding. BAWIPA keimah rori in ka lo thihter ding. Sikhalsehla ka thu a thluntu pawl cu hminthar ka pe ding.

¹⁶Hi ramsungih a um mi thlawsuah vanluhnak a diltu hmuahhmuah in rintlak a si mi Pathian ih thlawsuahnak an dil ding a si. Siatcam in thukamnak a tuahtu hmuahhmuah in rintlak a si mi Pathian hmin in an tuah ding. A liamzo mi tikcu ih harsatnak pawl cu a cem dingih hngilh ṭheh an si thlang ding,” tiah a ti.

¹⁷BAWIPA in, “Zohhnik, lei thar le van thar ka tuah rero lai a si. A liamzo mi thil pawl cu hngilh ṭheh an si ding.

¹⁸Kan siamthar mi parah hin lungawi aipuang ringring in um uh. Ka tuahmi Jerusalem thar cu lungawinak in a khat dingih a khuasung mi pawl cu an thin a nuam ngaingai ding.

¹⁹Jerusalem khua le a minung pawl ruangah keimah khal ka lung a awi ding. Cutawkah cun ṭahnak a um lo ding; bomnak dil khal a ṭul nawnlo ding.

²⁰Nau note thih khal a umlo dingih zokhal an sankim in an nung ding. Kum zakhat a ti mi pawl cu mino ti an si ding. Cuih hlanih an thih asile keimah in daan ka tat a si, ti khihhmuhnak a si ding.

²¹Inn an sak dingih a sungah an um ding; an sakmi inn cu zohman in an luahsak lo ding. Sabit hri an ciing dingih sabitti an in ding; midang zohman in an in sak lo ding. Thingkung bangin ka minung pawl cu an san a sau ding. An ṭuan mi rah cu tlamtling zetin an ei ding.

²³An hnaṭuannak ah hlawhtlinnak an nei dingih an tefa sin pawl cu siatsuah tuahmawhnak an tonglo ding. Anmah le an tefa sin pawl cu san ih khuk tiang ka thlawsuah hai ding.

²⁴Ka hnen ih thlacam an ṭheh hlan hmanah an thlacamnak cu ka let ding.

²⁵Cinghnia le tuufaate pawl cu hmunkhat ah rawl an ei tlaang dingih caw bangtuk in kiosa in fangkuang ro a ei ding. Rul tla cu ṭihnungza a si nawnlo ding. Maw Zion, ka tlang thianghlim, zianghman ṭihnungza le thilṭha lo a um nawn lo ding,” tiah a ti.