Read Falam Chin ISAIAH 7 Bible Online

ISAIAH 7 - Falam Chin bible

ISAIAH 7

¹Uzziah fapa Jotham ih fapa siangpahrang Ahaz in Judah ram a uk laiah raldonak a suak. Siria siangpahrang Rezin le Israel siangpahrang Pekah, Remaliah fapa, in Jerusalem an do; a sinan an lak thei lo.

²Siria ralkap pawl Israel ram an thleng zo ti kha Judah siangpahrang in a theih tikah amah le a minung pawl cu an thin a phang tukih thli in thingkung a sem vekin an hnin an ṭhia ciamco.

³Cule BAWIPA in Isaiah hnenah, “Na fapa Shear Jashub [4] hruai awla siangpahrang Ahaz tong dingah feh uh. Siangpahrang cu tlunta ticawm ihsin tidai a rung luannak tihriat netnak ih hnipuan taktu pawl hnaṭuannak lamzin ah nan tong ding.

⁴Nan ton tikah amah cu ralring te in, hnangamzet in, thinphang lo le ṭih lo te ih um dingah sim uh. Siangpahrang Rezin le a ralkap pawl le siangpahrang Pekah thinhengnak cu ṭih ding a um nawn lo; a mit zik rero mi thingthu pahnih ih meikhu tluk hman a si nawn lo.

⁵Siria le Israel mi le an siangpahrang thawn an lo phiar a si.

⁶Judah do an tum; Judah mi pawl cu an hnenih ṭang dingin an hro dingih Tabeel fapa cu siangpahrang canter an tum a si.

⁷Sikhalsehla Keimah BAWIPA in cuti ih cang lo dingin ka than zo.

⁸Ziangahtile Siria cu Damaskas khua hnakin a cak sawn cuanglo ih Damaskas cu siangpahrang Rezin hnak khalin a cak sawn cuang fawn lo. Israel ram thu kan sim asile atu ihsin hmailam kum sawm ruk le kum nga sungah Israel cu a kuai ṭheh dingih ram ramkhat ti tlak hman a um lo ding.

⁹Israel ram cu Samaria khua hnakin a cak sawn cuanglo ih Samaria khal cu siangpahrang Pekah hnakin a cak sawn cuang fawn lo. Nan zumnak a cak lo asile rei nan awh lo ding,” tiah a ti.

¹⁰BAWIPA cun Ahaz hnenah a sim sal ih,

¹¹“BAWIPA na Pathian hnenih sin khihhmuhnak dil aw. A thukbik mithi khua ihsin siseh, a saangbik vancung khalin siseh dil aw,” tiah a ti.

¹²Ahaz in, “Khihhmuhnak ka lo dil ding. BAWIPA cu ka hniksak lo ding,” a ti.

¹³Cutikah Isaiah in, “Maw siangpahrang David tefa sin pawl, ngaihnik uh. Minung thin nan cemter zo ih a poizet a si; atu ah Pathian thin nan cemter duh lala maw si?

¹⁴Atu ah BAWIPA amah rori in khihmuhhnak a lo pe ding. Nunau no pakhat in fa a vun ih fapa a hring dingih a hminah Immanuel [5] tiah an sak ding.

¹⁵A hung upat ih a ṭha le a sia thleidan a thiam tikah a rawl ei mi cu cawhnawi le khuaitizu a si ding.

¹⁶Cui caan a thlen hlanah nan ṭihzet mi siangpahrang pahnih ih ram cu a ṭhing reprep ding.

¹⁷“Israel le Judah nan ṭhen awk hnuah ziangtik hman ih nan ton dah lo mi harsatnak cu BAWIPA in nangmah le na sungkhat le na miphun parah a thlenter ding - Assiria siangpahrang a thlenter ding a si.

¹⁸“Cui caan a thlen tikah BAWIPA in Izipt mi pawl cu Nail tiva hna a hlatnak bik khalin thothe vekin ra zuang dingah le Assiria mi pawl cu an ram in khuai vekih ra zuang dingah kuai in a ko ding.

¹⁹An ra dingih horkuam kip, lungpuk kip, hling le so lak le ṭilva tlannak ram kip ah an khat ding.

²⁰Cui caan a thlen tikah BAWIPA in Assiria siangpahrang cu nan lu meettu dingah Zufrates tiva raal ihsin a ko dingih nan khahmul, nan lupar sam le nan taksa par hmul hmuahhmuah a meet ṭheh ding.

²¹“Cui caan a thlen tikah lothlo pa pakhat in cawla pakhat le me pahnih a neih hmanah,

²²an hnawi a tamzet dingih a hai mi a daih ṭheh ding. A si, ram sungih a taangmi hmuahhmuah in ei dingah cawhnawi le khuaitizu an nei ding.

²³“Cui caan a thlen tikah sabit hmuan ṭhazet, sabit kuang thawngkhat a um mi, hmuan pakhat ih tangka thawngkhat man cu hling le so in a khat ding.

²⁴Li le thal thawn minung ramtawihnak hmunah a cang ding. A si, ram pumpuluk cu hling le so in a khat ṭheh ding.

²⁵Rawl an rak ciinnak tlangpar pawl cu hlingkung a kho ṭheh dingih zohman an feh lo ding. Caw le tuu tlannak ramah a cang ding.