Read Falam Chin ISAIAH 8 Bible Online

ISAIAH 8 - Falam Chin bible

ISAIAH 8

¹BAWIPA in ka hnenah, “Cangannak ah lungpheng tumpi pakhat la awla misenpi theih thei dingin: ‘Zamrang-lon-zamrang-laak,’[6] tiah ngan aw.

²Rintlak minung pahnih-puithiam Uriah le Jeberekhiah fapa Zekhariah cu theihpitu ah sawm hai aw,” tiah i ti.

³Cui hnuah ka nupi thawn kan ittlang ih fa a vun ih fapa a nei. Cutikah BAWIPA in, “A hmin ah ‘Zamrang-lon-zamrang-laak,’ tiah ti aw.

⁴Naute in, ‘Nunu, Papa,’ tihman a thiam hlanah Damaskas ih lennak thilri le sumsaw hmuahhmuah le Samaria ih ral lon thilri hmuahhmuah cu Assiria siangpahrang in a lak ṭheh ding a si,” tiah i ti.

⁵CuleBAWIPAIÓ cu ka hnenah a ṭong saal ih,

⁶“Hi minung pawl in daiteih a luangmi Shiloah Tiva[7] tidai an hnong ih siangpahrang Rezin le siangpahrang Pekah hmaiah khur rero ih an um ruangah,

⁷BAWIPA Keimah rori in Assiria siangpahrang le a ralkap pawl cu Judah do dingah ka hruai ding. Zufrates tiva a len ih a kap hmuahhmuah a liam thluh bangin an ra ding.

⁸Judah ram sungah tilik bangin an rung dingih liang an tiang dingih ziang hmuahhmuah an khuh ṭheh ding,” a ti. Pathian kan hnenah a um. A thla a pharh ih kan ram cu a hum a si.

⁹Maw ramkip le phunkip tla, thinphang in hmun khatah tongkhawm aw uh. Ngai uh, lamhlapi ih a um mi pawl tla raldo dingah nan timtuah uh; a sinan ṭih uh. A si, nan timtuah ṭheh uh; a sinan phang uh!

¹⁰Tumtahnak cu nei ko uh. Zianghman hlawhtlinnak nan nei cuanglo ding. Nan duhzat in ṭong uh; a lak hlir an si ding, ziangahtile Pathian kan hnenah a um a si.

¹¹Misenpi pawl ih thlun mi lamzin thlun lo dingah BAWIPA in a huham nasazet thawn ralrinnak i peek.

¹²“An tumtah mi ah tel ve hlah awla an ṭih mi kha ṭih ve hlah aw.

¹³Cungnungbik BAWIPA Keimah lawng a thianghlim mi ka si kha ciing ṭha aw. Keimah lawnglawng na ṭih ding mi cu ka si.

¹⁴Ka thianhlimnak mangbangza a si ruangah keimah cu an bahnak lungto bangtuk ka si. Keimah cu Judah ram le Israel ramih misenpi le Jerusalem khawsungmi pawl a awk tu ding thang bangtuk ka si.

¹⁵Mi tampi an bah ding. An tlu dingih an kiak an kuai ṭheh ding. Thang in a awk ding,” tiah i ti.

¹⁶Nannih ka dung i thluntu pawl, BAWIPA in ka hnenih a sim mi thu pawl a kilkhawitu le a nung tertu ding nan si.

¹⁷BAWIPA cu a minung pawl ih hmuh lo dingin a thup aw; a sinan kei cun amah ka rinsan ih ka ruahsannak cu amah hnenah ka ret a si.

¹⁸Hitawk ah hin BAWIPA in i pek mi faate pawl thawn kan um. CungnungbikBAWIPAIÓ tokham cu Zion Tlang ah a um ih kanmah tla hi Israel mi pawl hnenah khihhmuhnak ah in thlah a si.

¹⁹Mi tampi in pol le kut ṭial zohthiam pawl, a phun a tlok rero tu pawl, leeng ding le thuron dingah an lo fial ding. “A nungmi pawl can ai-ah a thi mi pawl thusuh ding le mithi thlarau pawl thuron ding cu a ṭha ko sokhaw,” an lo ti ding.

²⁰Cuti an ti tikah nannih in, “BAWIPA ih a lo zirh mi hi ngai sawn uh. Pol thu cu ngai hlah uh. An lo sim mi cu nan hrangah ṭhathnemnak zianghman a nei lo ding,” nan ti pei.

²¹An rilrawng le an thinheng in an siangpahrang le an Pathian tiangin an cam ding. Van an zoh ding,

²²leilung khal an zoh ding; a sinan harnak le thimnak siar lo a dang zianghman an hmu lo ding. Cui ṭihnungza thimnak sungah cun an lut cuahco a si. Hi harsatnak caan sungih sin an luatnak ding lamzin a um lo ding.