Read Falam Chin PUITHIAM HNAṬUANNAK 1 Bible Online

PUITHIAM HNAṬUANNAK 1 - Falam Chin bible

PUITHIAM HNAṬUANNAK 1

¹BAWIPA in Moses cu BAWIPA umnak Puanthlam ihsin a ko ih,

²Israel mi pawl in Pathian hnenih thawinak an pek tikih thlun dingah a hnuailam daan pawl cu a pek. Zokhal BAWIPA hnenih thawinak a pek asile a cawrual sung ihsin, a si lole a tuu le a merual sung ihsin a si pei.

³A cawrual sung ihsin mei-ur thawinak a pek ahcun raitluanmi cawcang a si pei. BAWIPA ih cohlanmi a sinak dingah a cawcang cu BAWIPA umnak Puanthlam sangka ah a rak keng ding.

⁴Cule a cawcang ih lu parah a kut a suang pei; cumi cu BAWIPA in sualngaithiamnak raithawi-ah a cohlan sak ding.

⁵Cutawkah a cawcang cu a that pei ih Aaron fapa puithiam pawl in cawcang ih thisen cu BAWIPA hnenih an pek hnuah Puanthlam sangka ih a ummi biakṭheng ih kap li-ah cun an theh pei.

⁶Cun a cawcang cu a vun a hawk pei ih a sa a can thluh pei.

⁷Aaron fapa puithiam pawl in biakṭheng parah cun zanthing an ret pei ih meisa an muah pei.

⁸Cule can ciami sa cu a lu le a thau pawl thawn meisa parah an ret pei.

⁹Amah in a sungril pawl le a dunglam ke pawl cu a kholh pei ih puithiam in sa cu biakṭheng parah a zatein a ur thluh pei. Himi cu BAWIPA hrangah a rim a thawmi mei-ur thawinak a si.

¹⁰Zokhal a tuurual sungin, a si lole a merual sungin thawinak a pek asile, raitluanmi tuucang, a si lole mecang a si pei.

¹¹Biakṭheng ihsin saklam kapah a ṭilva cu a that pei ih a thisen cu biakṭheng ih kap li-ah puithiam pawl in an theh pei.

¹²Cule a sa cu a can ṭheh hnuah puithiam in a zatein a lu le a thau thawn meisa parah a ret pei.

¹³Amah in a sungril le a dunglam ke pawl a kholh pei ih puithiam in thawinak sa cu BAWIPA ih hnenah a pek pei ih biakṭheng parah cun a zatein a ur pei. Himi cu BAWIPA ih hrangah a rim a thawmi mei-ur thawinak a si.

¹⁴Mi pakhat in vate cu mei-ur thawinakih a pek asile thuro a si lole laileng note a si pei.

¹⁵Puithiam in vate cu biakṭheng ah a keng pei ih a hngawng a merhtan pei ih a lu cu biakṭheng parah a ur pei. A thisen cu biakṭheng ih kap ah kang ko in a thler pei.

¹⁶A cur le a cur sung ummi pawl a lak pei ih vutcam an retnak, biakṭheng ihsin nisuahnak lamah a hlon pei.

¹⁷A thla in a kai pei ih a thla pawl cat lo tein a ruangpi cu a bauh pei ih biakṭheng parah a ur pei. Cumi cu BAWIPA lungawi tertu rimthaw thawinak a si.