Read Falam Chin PUITHIAM HNAṬUANNAK 10 Bible Online

PUITHIAM HNAṬUANNAK 10 - Falam Chin bible

PUITHIAM HNAṬUANNAK 10

¹Aaron ih fapa Nadab le Abihu in meiling laknak thirkheng an lak veve ih meiling an ret ih rimhmui an pa ih hnuah BAWIPA hnenah an pek. Asinain hi meisa cu a thiang lomi a si, ziangahtile annih ih tuah dingah BAWIPA ih thupekmi a si lo.

²Hmakhatte-ah BAWIPA ih hmai ihsin meisa alh a suak ih meisa cun a kaang hai ih an thi.

³Cutikah Moses in Aaron hnenah, “BAWIPA in, ‘Ka hna a ṭuantu hmuahhmuah in ka thianhlimnak an upat pei; ka miphun pawl hnenah ka huham ka langter ding,’ a ti tikah a ti duhnak cu himi sokhaw a si,” a ti. Sikhalsehla Aaron cu zianghman a ṭong lo.

⁴Cutikah Moses in Aaron ih paseu Uzziel ih fapa Mishael le Elzafan a ko ih, “Ra uhla nan unau ruak pawl hi Puanthlam thianghlim ihsin lak uhla riahnak lengah va ret uh,” tiah a ti.

⁵A ti vek cun an ra ih ruak pawl cu an hnipuan in an khai ih Moses ih thupek bangtuk in riahnak lengah an ret.

⁶Cutikah Moses in Aaron le Aaron ih fapa Eleazar le Ithamar pawl hnenah, “Mithi ngai tahratin nan hnipuan thlek in nan sam khal hriat loin um hlah uh. Nan sam tla nan hriat lo ih nan hnipuan nan thlek a si ahcun nan thi ding ih BAWIPA cu Israel miphun zate parah a thin a heng ding. Sikhalsehla BAWIPA ih thlentermi meisa in a kang thatmi mithi pawl hi nan phunpi Israel midang pawl cun an ngai thei ding.

⁷Puanthlam sangka ihsin suak hlah uh; nan suah ahcun nan thi tengteng ding; ziangahtile BAWIPA ih hriakculhnak siti thawn thianhlimtermi nan si zo,” tiah a ti. Moses ih sim vek cun an tuah.

⁸BAWIPA in Aaron hnenah,

⁹“Sabitti siseh zu siseh in tahratin ka umnak Puanthlam sungah nangmah le na fapa pawl nan lut lo pei. Nan lut asile nan thi ding. Hi daan cu nan tesinfa hmuahhmuah in an thlun pei.

¹⁰BAWIPA ih ta a si mi le senpi ih hmantlang dingmi thil pawl cu nan thleidan thiam a ṭul a si; thil thiang le thil thiang lo khal nan theihthiam a ṭul a si.

¹¹Moses hnen ihsin ka lo pekmi daan hmuahhmuah cu Israel mi pawl na zirh thluh pei,” a ti.

¹²Moses in Aaron le a nunglaimi a fapa pahnih Eleazar le Ithamar hnenah, “BAWIPA hnenih pekmi rawl sung ihsin a taangmi thlairawl thawinak cu lak uhla cumi cun thilnu tel lo sang tuah in biakṭheng kiangah ei uh, ziangahtile himi cu a thiangzetmi thawinak a si.

¹³Hmun thianghlim sungah ei uh; BAWIPA hnenih pekmi rawl sung ihsin nanmah le nan fapa pawl ih covo a si. Himi cu BAWIPA in ka hnenih thu i pekmi a si.

¹⁴Asinain nanmah le nan sungkhat pawl cun puithiam pawl hrangih BAWIPA hnenah a hleice ih pekmi pawl, a kawng le a ir cu nan ei thei ding. Cumi cu a thiannak hmun ah nan ei pei. Israel mi pawl in remnak thawinak an pekmi sung ihsin nanmah le nan tefa pawl covo-ah himi cu an pek zo a si.

¹⁵BAWIPA hnenah thawinak an tuah ih a thau pawl tla an pek tikcu ah a kawng le a ir cu a hleice ih pekmi ah an rak keng pei. BAWIPA ih thupekmi bangtuk in hi nan covo pawl cu nanmah le nan tefa pawl in a kumkhua in nan co ding a si,” tiah a ti.

¹⁶Sualthlah thawinak ding hrang timi me thu cu Moses in a suh tikah meisa in an ur zo ti kha a thei. Cutikah Aaron ih fapa pahnih Eleazar le Ithamar parah Moses cu a thin a heng ngaingai ih,

¹⁷“Ziangah so sualthlah thawinak sa cu hmun thiang sungah nan ei lo? Israel miphun an sualthlahnak hrangah BAWIPA in nan ei dingah a lo pek zomi a si ih a thianghlim zetmi a si.

¹⁸A thisen cu Puanthlam thianghlim sungih kenmi a si lo hrangah ka lo sim cia vekin hi thawinak sa cu hmun thianghlim ih nan ei ding hrimhrim a si,” tiah napi in a kawk hai.

¹⁹Aaron in, “Israel mi pawl in tuihsun ah BAWIPA ih hnenah an sualthlah thawinak le an mei-ur thawinak pawl an pe zo. Ka parah hivek thusia a thlen laiah hin sualthlah thawinak sa cu kei in rak ei ningla BAWIPA cu a lung a awi cuang ding maw?” tiah a ti.

²⁰Cumi Moses ih a theih tikah a lung a kim sal.