Read Falam Chin PUITHIAM HNAṬUANNAK 12 Bible Online

PUITHIAM HNAṬUANNAK 12 - Falam Chin bible

PUITHIAM HNAṬUANNAK 12

¹A tanglam ih daan pawl hi Israel mi hrangah BAWIPA in,

²Moses hnenah a pek. Nunau pakhat in fapa a hrin tikah, thlatin a neihmi thi ruangih mi thiangfai loih rel a si bangtuk in ni sarih sung mi thiangfai lo a si.

³Ni riatnak ni-ah a fapa cu serhtan a si pei.

⁴Nunau nu cun a thianfai lai hlan lo ni sawmthum le ni thum a hngak hrih pei. A thianfaiter awknak caan a kim lai hlan lo a thianghlimmi thil zianghman a tham lo pei ih Puanthlam thianghlim sung khalah a lut lo pei.

⁵Fanu a hring asile thlatin a neihmi thi ruangih mi thiangfai lo a si bangtuk in ni hleili sung mi thiangfai lo a si. A thi suahnak ihsin a thianfai lai hlan lo ni sawmruk le ni ruk sung a hngak pei.

⁶Fapa a hring ih, a si lole fanu a hring ih a thianfaiter awknak caan a kim tikah kum khat a timi tuufa pakhat mei-ur thawinak hrangah BAWIPA umnak Puanthlam luhnak sangka ih um puithiam hnenah a rak keng pei. Laileng pakhat a si lole thuro pakhat khal sualthlah thawinak hrangah a rak keng pei.

⁷A kenmi thawinak cu puithiam in BAWIPA hnenah a pek pei ih a borhhlawhnak cu tlengfai dingah a thawi pei; culawng ah nunau thiangfai ah a cang ding. Himi cu nau neih borhhlawh thianfainak ah nunau in a tuah ṭulmi daan a si.

⁸Nunau in tuufa pakhat hman a nei lo a si ahcun thuro pahnih a si lole laileng pahnih, pakhat cu mei-ur thawinak hrangah, a dang pakhat cu sualthlah thawinak hrangah a keng pei. A borhhlawhnak tlengfai dingah puithiam in thawinak a tuahsak pei ih cu nu cu mi thiangfai ah a cang ding.