Read Falam Chin PUITHIAM HNAṬUANNAK 13 Bible Online

PUITHIAM HNAṬUANNAK 13 - Falam Chin bible

PUITHIAM HNAṬUANNAK 13

¹Moses le Aaron hnenah hi daan pawl cu BAWIPA in a pek.

²Mi pakhatkhat in a vun ah hma a neih ahcun, a thlingmi a si lole, hnai a khuarmi a si lole, a bolmi menmen a si hmanah, misuan thei phaarnat ih a can thei ruangah amah cu Aaron hrin puithiam pakhatkhat hnenah fehpi a si pei.

³Amah cu puithiam in a zoh pei ih a hma sungih hmul pawl a raan ih a hma cu a kiangkapih vun hnakin a thuk deuh asile phaarnat a si. Puithiam in a zoh ṭheh hnuah amah cu mi thiangfai lo a si tiah a than pei.

⁴Asinain a vun a hmami cu a raang ih a kiangkap vun hnakin a thuk deuh cuang lo ih a sungih hmul pawl tla a raan lo ahcun amah cu puithiam in ni sarih sung a dangte in a ret pei.

⁵Ni sarihnak ni ah puithiam in a zoh sal pei ih a hmuhnak ah a hma cu amah keel a si ih a besiat cuang lo a si ahcun ni sarih sung a dangte in a ret sal pei.

⁶Ni sarihnak ah puithiam in a zoh sal lala pei ih a hma cu besia sinsin loin a dam deuh a si ahcun amah cu a thiangfai a si, tiah a than pei. A hma cu hma menmen lawng a si. A hnipuan a sawp thluh pei ih mi thiangfai a si ding.

⁷Sikhalsehla puithiam in a zoh ih a thiangfai a si a ti hnuah a hma a besiat sal a si ahcun puithiam hnenah a feh sal pei.

⁸Puithiam in a rak zoh sal pei ih a hma a karh sinsin a si ahcun mi thiangfai lo a si tiah a than pei. Phaarnat a si.

⁹Mi pakhatkhat phaarnat a neih tikah amah cu puithiam hnenah fehpi a si peh ih,

¹⁰puithiam in a zoh pei. A vun hma cu a raan ih a hma sungih hmul pawl tla a raan ih a hnai a um ahcun,

¹¹a dam thei lomi phaarnat a si. Puithiam in mi thiangfai lo a si tiah a than pei. Mi thiangfai lo a si zo hrangah a dangte ih ret ih zoh a ṭul nawn lo.

¹²Cun a hma cu a zai vivo ih a taksa ruangpi a khah ṭheh ahcun,

¹³puithiam in a zoh sal pei. A taksa ruangpi a khat ṭheh ngaingai a si ti a hmuh ahcun mi thiangfai a si, a ti pei. A vun zatein a raan ṭheh ruangah mi thiangfai a si.

¹⁴Sikhalsehla a titsa ngaingai a hmat ahcun cutiih a hmat vete in amah cu mi thiangfai lo a si.

¹⁵Puithiam in a zoh sal pei ih a titsa a hmami a hmuh ngaingai ahcun amah cu mi thiangfai lo a si, tiah a than pei. A titsa tiangih a hmat ahcun phaarnat a si ruangah amah cu mi thiangfai lo a si, miphaar a si.

¹⁶Asinain a titsa hma a dam ih a raang menmen lawng a si sal ahcun puithiam hnenah a feh pei.

¹⁷Puithiam in amah cu a zoh pei. A titsa hma cu a raang ih a can sal ahcun puithiam in mi thiangfai a si, tiah a than pei ih mi thiangfai ah a cang pei.

¹⁸Mi pakhatkhat khuaihli hma a nei ih a dam hnuah,

¹⁹a damnak hmun ihsin a thling ih a raan a si ahcun, a si lole sen-ngo-thlak in a bol mi a suak sal a si ahcun puithiam hnenah a hmuh-aw pei.

²⁰Puithiam in a zoh pei ih a hma cu a kiangkapih vun hnakin a thuk deuh ih a hma sungih hmul pawl a raan ahcun mi thiangfai lo a si, tiah puithiam in a than pei. Khuaihli hma in a thok naan phaarnat a si.

²¹Sikhalsehla puithiam in a zoh tikah a hma sungih hmul pawl a raang lo ih a kiangkap vun hnakin a hma cu a thuk lo ih a pianzia cu a raang nawn a si ahcun puithiam in amah cu a dangte in ni sarih sung a ret pei.

²²A hma a zai vivo a si ahcun puithiam in mi thiangfai lo a si tiah a than pei.

²³Asinain a hma cu amah keelin a um ih a zai cuang lo a si ahcun khuaihli hma sii lawng a taang a si hrangah amah cu mi thiangfai a si, tiah puithiam in a than pei.

²⁴Mi pakhatkhat meisa in a kang ih a titsa a raan ahcun, a si lole sen-ngo-thlak a si ahcun,

²⁵puithiam in a zoh pei ih a hma sungih hmul pawl a raan ih a kiangkap vun hnakin a thuk deuh ahcun meisa kangnak ihsin a suakmi phaarnat a si ih, puithiam in mi thiangfai lo a si, tiah a than pei.

²⁶Asinain a hma sungih hmul pawl a raang loih a kiangkap vun hnakin a thuk deuh lo a si ih a pianzia a raang nawn a si ahcun, puithiam in amah cu ni sarih sung a dangte in a ret pei.

²⁷Ni sarihnak ni ah puithiam in a zoh sal pei ih a hma cu a zai vivo a si ahcun phaarnat a si hrangah puithiam in mi thiangfai lo a si, tiah a than pei.

²⁸Sikhalsehla a hma cu a keel in a um ih a zai lo ih a pianzia cu a raang nawn a si ahcun phaarnat a si lo, a thling men a si. Curuangah amah cu puithiam in mi thiangfai a si tiah a than pei; ziangahtile meikang hma sii lawng a si.

²⁹Mipa siseh nunau siseh, a lu ah, asilole a khabe ah, hma a neih asile,

³⁰puithiam in a zoh pei. A hma cu a kiangkap vun hnakin a thuk deuh ih a sungih hmul pawl a aihre ih a fatet ahcun phaarnat a si ih puithiam in mi thiangfai lo a si, tiah a than pei.

³¹Puithiam in a zoh tikah a hma cu a kiangkap vun hnakin a thuk deuh lo naón a hma sung hmul pawl cu hmul keel an si thotho lo ahcun puithiam in ni sarih sung a dangte in a ret pei.

³²Ni sarihnak ni ah puithiam in a zoh sal pei ih a hma cu a zai lo ih a hma sung hmul cu a aihre lo ih tlunah a kapih vun hnakin a thuk sawn lo a si ahcun,

³³mi dam lo pa cun, a hma kapih hmul siar lo, a lu a met-aw pei. Cun puithiam in ni sarih sung a dangte in a ret sal pei.

³⁴Ni sarihnak ni ah puithiam in a zoh sal lala pei ih a hma cu zai loin a kapih vun hnakin a thuk sawn fawn lo a si ahcun puithiam in amah cu mi thiangfai a si, tiah a than pei. Cupa cu a hnipuan a sawp pei ih mi thiangfai ah a cang ding.

³⁵Sikhalsehla mi thiangfai a si, ti hnuah a hma cu a zai sal a si ahcun,

³⁶puithiam in a zoh sal pei. A hma a zai ngaingai a si ahcun a hmul a aihre le aihre lo khal zoh a ṭul nawn lo; mi thiangfai lo a si ko.

³⁷Sikhalsehla puithiam ih hmuhnak ah a hma cu a zai lo ih a hma sungah hmul tla ṭha tein a khoh a si ahcun a hma cu a dam a si ih puithiam in mi thiangfai a si, tiah a than pei.

³⁸Mipa siseh nunau siseh a vun parah a raang ṭhukṭhi a um asile,

³⁹amah cu puithiam in a zoh pei. A raang in a ṭialmi pawl cu a raang duakdi a si ahcun a vun parah a raang in a suak men a si ruangah amah cu mi thiangfai a si.

⁴⁰Mi pakhatkhatih sam cu a hmailam siseh, a dunglam siseh, a tlok khalle mi thiangfai lo a si lo. Lukawng menmen a si.

⁴¹

⁴²Sikhalsehla a lukolh ah sen-ngo-thlak hma a um a si ahcun phaarnat a si.

⁴³Puithiam in amah cu a zoh pei ih sen-ngo-thlak hma a um ngaingai a si ahcun,

⁴⁴puithiam in mi thiangfai lo a si, tiah a than pei. Ziangahtile a lu ah misuan thei hma a nei a si.

⁴⁵Zokhal siseh phaarnat a neimi cu hnipuan tlek a hruk pei, a sam hriat loin a thlah pei ih a hmur hup in, “Mi thiangfai lo ka si, mi thiangfai lo ka si,” tiah a au pei.

⁴⁶Hi nat a neih sung hmuahhmuah cu mi thiangfai lo ringring a si pei ih hnarpawn ah amah lawng a um pei.

⁴⁷Tuuhmul hnipuan siseh, a si lole pat hnipuan siseh, hnipuan a mawr a si ahcun,

⁴⁸a si lole tuuhmul hnipuan siseh, pat hnipuan siseh, hnipuan khuimaw parih a mawr malte a um a si ahcun, a si lole savun parah siseh, savun ih tahmi thilri pakhatkhat parah siseh, a mawr a um a si ahcun,

⁴⁹a pianzia a tangphaw nawn a si lole a sen nawn a si ahcun, a zai mi mawr a si hrangah puithiam hnenah hmuh ding a si.

⁵⁰Puithiam in a zoh pei ih ni sarih sung cuih thil cu a dang tein a ret pei.

⁵¹Ni sarihnak ni ah a zoh sal pei ih a mawrmi cu a zai a si ahcun cuih thil cu thil thiangfai lo a si.

⁵²Puithiam in meisa in a ur pei, ziangahtile a zai thei mi mawr a si hrangah meisa in ur ding a si.

⁵³Sikhalsehla puithiam in a zoh tikah a mawr cu cuih thil parah a zai lo a si ahcun,

⁵⁴cuih thil cu a sawpter pei ih ni sarih sung an ret sal pei.

⁵⁵Cuih hnuah a zoh sal pei ih a zai lo naón a mawr ih pianzia a lamdang cuang lo a si ahcun thil thiangfai lo thotho a si pei. A mawrnak cu dunglam a si khalle hmailam a si khalle cuih thil cu nan ur pei.

⁵⁶Asinain puithiam in a zoh sal tikah a mawr cu a reh zo a si ahcun hnipuan a si lole savun ih a mawrnak zawnte lawnglawng a thlek pei.

⁵⁷Cule a mawr sal lala ih a zai vivo a si ahcun a neitu in a thil cu a ur pei.

⁵⁸A thil cu a sawp ih a mawrnak neh a hlo thei a si ahcun a sawp sal hnuah a thil cu thil thiangfai ah a cang ding.

⁵⁹Himi cu tuuhmul hnipuan siseh, pat hnipuan siseh, hnipuan a mawr tikah, a si lole pat hnipuan siseh, tuuhmul hnipuan ih khuimaw zawn ah siseh, a si lole khuimaw zawnih savun ih tuahmi thil a mawr tikah siseh, tuah dingmi daan a si.