Read Falam Chin PUITHIAM HNAṬUANNAK 15 Bible Online

PUITHIAM HNAṬUANNAK 15 - Falam Chin bible

PUITHIAM HNAṬUANNAK 15

¹BAWIPA in Moses le Aaron hnenah a tanglam daan pawl cu,

²Israel mi pawl ih thlun dingah a pek. Mi pakhatkhat a zahmawh sungin hnai a dok asile a thiangfai lo a si.

³Cat loih a dok ah siseh, a pih ah siseh, cupa cu a thiangfai lo a si.

⁴A tonak, a si lole a ihnak ihkhun cu a thiangfai lo a si.

⁵Cupa ih ihkhun cu mi pakhatkhat in a tham,

⁶a si lole a rak tonak ih a to asile a thamtu, a si lole a totu in a hnipuan a sawp fai thluh pei ih ti a kholh-aw pei ih cuih sun cu zanlam tiang mi thiangfai lo a si pei.

⁷Hnai dok pa cu mi pakhatkhat in a dai asile a daitu cun amah ih hnipuan a sawpfai thluh pei ih ti a kholh-aw pei ih cuih sun cu zanlam tiang mi thiangfai lo a si pei.

⁸Hnai dok pa in thianfai lonak zianghman a nei lo mi pakhat parah a cil a phui asile cupa cu a hnipuan a sawp fai thluh pei; ti a kholh-aw pei ih cuih sun cu zanlam tiang mi thiangfai lo a si pei.

⁹Hnai dok pa ih tonak rangkung, a si lole tokham cu a thiangfai lo a si.

¹⁰Hi pa ih tonak thil pohpoh a thamtu cu zanlam tiang mi thiangfai lo a si. Hi pa ih tonak a phurtu pohpoh cun amah ih hnipuan a sawpfai thluh pei ih ti a kholh-aw pei ih cuih sun cu zanlam tiang mi thiangfai lo a si pei.

¹¹Hnai dok pa in a kut pawl kholh hmaisa loin mi pakhatkhat a tham a si ahcun cupa cun amah ih hnipuan a sawpfai thluh pei ih ti a kholh-aw pei ih cuih sun cu zanlam tiang mi thiangfai lo a si pei.

¹²Hi pa ih a thammi tlakbeel cu nan khuai pei ih thingkheng a thammi cu nan kholh pei.

¹³Hnai dok pa a dam tikah ni sarih sung a cawl pei ih cuih hnuah a hnipuan a sawpfai pei ih tidai thiang in a kholh-aw pei. Cuticun mi thiangfai ah a cang ding.

¹⁴A ni riatnak ah thuro pahnih a si lole laileng pahnih Thukham retnak Puanthlam sangka ah a keng pei ih puithiam hnenah a pek pei.

¹⁵Puithiam in vate pakhat cu sualthlah thawinakah a pek pei ih a dang pakhat cu mei-ur thawinakah a pek pei. Cuticun puithiam in hnai dok pa ih hrangah thianfaiternak a tuah pei.

¹⁶Mi pakhatkhat a bua a suak asile a pumpuluk in ti a kholh-aw pei ih cuih sun cu zanlam tiang mi thiangfai lo a si pei.

¹⁷Cuih bua a tlaknak, pat in tuahmi siseh, savun in tuahmi siseh, thilri hmuahhmuah cu sawpfai ṭheh ding an si ih zanlam tiang thilri thiangfai lo an si pei.

¹⁸Nu le pa an pawl-awk hnuah an pahnih in ti an kholh-aw pei ih cuih sun cu zanlam tiang mi thiangfai lo an si pei.

¹⁹Nunau in thlatin thi a neih tikah ni sarih sung mi thiangfai lo a si pei. Cuih nunau a daitu cu zanlam tiang mi thiangfai lo a si pei.

²⁰Thi a neih sung a tonak, a si lole a ihnak cu a thiangfai lo a si.

²¹Mi pakhatkhat in a ihkhun a tham ahcun amah ih hnipuan a sawpfai pei ih tidai in a kholh-awk hnuah zanlam tiang mi thiangfai lo a si pei.

²²Mi pakhatkhat in a tonak pakhatkhat a tham ahcun amah ih hnipuan a fawpfai pei ih a kholh-awk hnuah zanlam tiang mi thiangfai lo a si pei.

²³A ihkhun siseh, a tonak pakhatkhat siseh, a tham a si ahcun zanlam tiang mi thiangfai lo a si pei.

²⁴Thi a neih sungih mipa thawn an pawl-awk asile a pawltupa khal mi borhhlawh ah a cang ih ni sarih sung cu mi thiangfai lo a si ve; a ihnak ihkhun khal ihkhun thiangfai lo a si.

²⁵Nunau pakhat in thlatin thi a neih mi hlei ah ni tampi thi a neih ahcun, a si lole nunau daan keel lengih thi a neih ahcun, thi a neih sung hmuahhmuah cu, nunau daan a neih sung vek thotho in mi thiangfai lo a si.

²⁶Cutiih thi a neih sung hmuahhmuah a ihnak le a tonak pawl cu thil thiangfai lo an si thluh.

²⁷Cuih thil pawl a thamtu cu mi thiangfai lo a si ih a hnipuan a sawpfai pei ih ti a kholh-aw pei; cuih sun zanlam tiang cupa cu mi thiangfai lo a si pei.

²⁸A thi a reh hnuah ni sarih sung a zoh-aw hrih pei ih cuih hnuah mi thiangfai a si pei.

²⁹A ni riatnak ah thuro pahnih a si lole laileng pahnih a lak pei ih BAWIPA umnak Puanthlam sangka ih ummi puithiam hnenah a keng pei.

³⁰Puithiam in pakhat cu sualthlah thawinakah a pek pei ih a dang pakhat cu mei-ur thawinakah a pek pei. Cuticun acuih nunau nuih thianfainak cu puithiam in a tuah sak pei.

³¹Israel mi pawl ih thianfai lonak ruangah an riahnak laifangih a ummi BAWIPA umnak Puanthlam an borhhlawhter lonak ding Israel mi pawl sim dingah BAWIPA in Moses a fial. Puanthlam an baalter ngaingai asile thihnak an tong ding.

³²Mipa pakhat a zahmawh ihsin hnai a dokmi, a si lole a bua a suakmi,

³³nunau pakhat thlatin thi a neimi, a si lole mi pakhat nunau thiangfai lo thawn an pawl-awk thu-ih thlun ding pawl cu a tlun lamih daan pawl hi an si.