Read Falam Chin PUITHIAM HNAṬUANNAK 16 Bible Online

PUITHIAM HNAṬUANNAK 16 - Falam Chin bible

PUITHIAM HNAṬUANNAK 16

¹[3] BAWIPA hnenah a thianghlim lomi mei-ur thawinak an pek ruangih Aaron fapa pahnih an thih hnuah BAWIPA in Moses hnenah hiti in thu a sim.

²“Na u Aaron kha ṭhatein sim awla puanzar dungih Hmun Thianghlim Bik ahcun a tikcu caan lawngah luh ding a si, ziangahtile cutawk cu Thukam Kuang sin tlunah mero sungin ka langnak hmun a si. Ka sim vekih a thlun lo asile a thi rori ding.

³Sualthlah thawinak hrangah cawcangte le mei-ur thawinak hrangah tuucang a rak ken hnu lawngah Hmun Thianghlim Bik ahcun a lut thei ding a si,” tiah a ti.

⁴Cule BAWIPA in a hnuailam ih daan pawl hi a pek. Hmun Thianghlim Bik sungih a luh hlanah Aaron cu a kholh-awta pei ih a puithiam thilthuam - korfual mankhung, sunghruk pawl, taikhap le lupawng pawl cu a hruk pei.

⁵Israel mipi in Aaron hnenah sualthlah thawinak hrangah mecang pahnih le mei-ur thawinak hrangah tuucang pakhat an pe pei.

⁶Amah ih sualthlahnak le a innsang pawl ih sualthlahnak ah cawcang pakhat thawinakah a pe pei.

⁷Cuih hnuah BAWIPA umnak Puanthlam sangka ah mecang pahnih cu a keng pei.

⁸Cutawkah cun, “BAWIPA hrangah,” timi le “Azazel[4] hrangah,” tiih khenmi lungto pahnih in camcawh fung zuhnak a tuah pei.

⁹BAWIPA hrangih hrilmi mecang pakhat cu Aaron in sualthlah thawinak hrangah a pe pei.

¹⁰Cule Azazel khawsia hrangih hrilmi mecang cu a nung in BAWIPA hnenah hlan a si pei ih, Israel miphun sualthlahnak dingah nelrawn khawsia Azazel hnenah a thlah pei.

¹¹Aaron in amah ih sualthlahnak le a innsang sualthlahnak ih cawcang thawinak a pek tikah,

¹²biakṭheng ihsin meilingvam kheng khat le rimhmui thaw ṭhuam hnih a lak pei ih Hmun Thianghlim Bik ahcun a keng pei.

¹³Cutawkih BAWIPA umnak hmunah cun rimhmui cu a ur pei ih rimhmui khu in Thukam Kuang sin cu a zeel ding; cuticun Thukam Kuang sin cu a hmu lo ding ih a thi lo ding a si.

¹⁴Cawcang ih thisen hrekkhat cu a lak pei ih a mehtok in kuangsin ih hmailam kap cu a theh pei; cule a hrekkhat cu Thukam Kuang ih hmailam kapah voi sarih tiang a theh fawn pei.

¹⁵Cuih hnuah Israel mi ih sualthlahnak hrangah me cu a that pei ih a thisen cu Hmun Thianghlim Bik ah a keng pei. Cule cawcang thisen a theh bangtuk in cuih thisen cu Thukam Kuangsin ah le hmailam kapah a theh pei.

¹⁶Cubangtuk in Israel miphun ih thianhlim lonak le sualnak ihsin Hmun Thianghlim Bik cu thianfaiter dingah thawinak a tuah pei. A thiangfai lomi riahnak laifangih a um ruangah Aaron in Puanthlam cu cubangtuk in a thianfaiter pei.

¹⁷Thianfaiter dingah Hmun Thianghlim Bik ah Aaron a luh ih a suah sal hlan lo zohman Puanthlam sungah an um lo pei. Amah ih hrang, a innsang hrangah le Israel mipi hrangih thianfaiternak a tuah thluh hnuah,

¹⁸Hmun Thianghlim Bik ihsin a suak pei ih mei-ur thawinak peknak hmunah biakṭheng thianfaiter dingah a feh pei. Cawcang ih thisen hrekkhat le mecangih thisen hrekkhat cu a keng pei ih biakṭheng par a kil ih a ummi ki pali pawl cu a kimvel in a hnih thluh pei.

¹⁹A kutzung in cuih thisen hrekkhat thawn biakṭheng cu voi sarih tiang a theh pei. Cuticun Israel miphun ih sualnak ihsin biakṭheng cu a thianfaiter ding ih a thianghlimmi-ah a cang ding.

²⁰Aaron in Hmun Thianghlim Bik le BAWIPA umnak Puanthlam sung hmuahhmuah le biakṭheng tla thianfaiter dingih thawinak a tuah ṭheh tikah a nungmi mecang, Azazel hrangih timi, cu BAWIPA hnenah a hlan pei.

²¹Cuih me lu parah a kut pahnih in a suang pei ih cuih lu parah cun Israel miphun ih siatnak, sualnak le Pathian an dodalnak pawl hmuahhmuah cu a phuang thluh pei ih cuticun mecang parah a thlenter thluh pei. Cule an tirh mipa in mecang cu nelrawn ah a dawihlo pei.

²²An sualnak hmuahhmuah cu mecang cun zohman um lonak ramṭhing ah a phur thluh ding.

²³Cule Puanthlam sungah Aaron cu a lut pei ih Hmun Thianghlim Bik sung a luh hlanih a hrukmi puithiam thilthuam pawl cu a phuak pei ih cutawkah a ret pei.

²⁴Hmun thianghlim ah ti a kholh-aw pei ih amah ih hnipuan a hruk pei. Cuih hnuah a va suak pei ih Israel miphun ih sualnak le amah ih sualnak pawl thlahnak dingah mei-ur thawinak a tuah pei.

²⁵Sualthlah thawinak ṭilva ih thau cu biakṭheng parah a ur pei.

²⁶Nelrawn khawsia Azazel hnenih mecang a dawi hlotu an tirhmi pa in Israel miphun umnak hmunih a ra kir hlanah ti a kholh-awta pei ih a hnipuan pawl a sawpfai thluhta pei.

²⁷Sualthlahnak dingah an thahmi cawcang le mecang, sualthlah thawinak hrangih an thisen Hmun Thianghlim Bik ih an kenmi cu an riahnak ihsin khawlengah an suah pei ih an ur pei. An vun siseh, an sa siseh, an sungril tla siseh, ur thluh an si pei.

²⁸A urtupa cu riahnak hmunih a kir hlanah a hnipuan a sawpfai thluh pei ih tidai in a kholh aw pei. Cuih hnu lawngah riahbuk ah a kir sal pei.

²⁹A hnuailam ih daan pawl cu a kumkhua ih nan thlun dingmi an si. Thla sarih thla[5] ni hra ni ah Israel mi hmuahhmuah le anmah lakih a ummi ramdangmi pawl cu rawl an ul pei ih hna zianghman an ṭuan lo pei.

³⁰Cuih ni ahcun an thianhlimnak dingah le an sualnak hmuahhmuah ihsin an thianfainak dingah thianternak an tuah pei.

³¹Cuih ni cu ni thianghlim ngaingai a si pei; rawl an ul pei ih zohman hna an ṭuan lo pei. Hi daan cu kumkhua-in an thlun pei.

³²A pa-ih hnaṭuan sawngtu dingah felteih sahriak culhmi le Pathian hnenih hlanmi Puithiam Sang in thianfaiternak cu a tuah pei. Puithiam thilthuam a hruk pei ih,

³³Hmun Thianghlim Bik, BAWIPA umnak Puanthlam sung hmuahhmuah, biakṭheng, puithiam pawl le Israel mipi an zate hrangah thianfaiternak cu a tuah pei.

³⁴Hi daan cu hmailam sanmureng tiang thlun ding a si. Hi thianfaiternak cu Israel mi pawl an sualnak thlah dingah le thianfaiter dingah kum khatah voi khat tuah a si pei. BAWIPA ih thupek bangtuk in Moses[6] in a tuah ṭheh.