Read Falam Chin PUITHIAM HNAṬUANNAK 17 Bible Online

PUITHIAM HNAṬUANNAK 17 - Falam Chin bible

PUITHIAM HNAṬUANNAK 17

¹Aaron le a fapa pawl le Israel mi pawl hmuahhmuah hnenih a hnuailam daan pawl sim dingah BAWIPA in Moses hnenah thu a pe.

³Israel mi pakhatkhat in caw siseh, tuu siseh, me siseh, BAWIPA hnenih thawinak a pek tikah BAWIPA umnak Puanthlam sangka siar lo hmun dangih a thah a si ahcun daan buartu a si. Thisen a suahter ruangah amah cu Pathian ih miphun lakah siarcih ding a si nawn lo.

⁵Hi thupekmi ih tican cu - Israel mi pawl in hmun dangdangih an thah ṭheumi ṭilva cu BAWIPA hnenah an rak ken thluh a ṭul tinak a si. Puanthlam sangka ih a rak ummi puithiam hnenah an rak keng pei ih remnak thawinak hrangah an that pei.

⁶Puanthlam sangka kiangih a ummi biakṭheng kimvel ah puithiam in cuih thisen cu a theh pei; cule a thau cu BAWIPA hrangih a thawmi rimhmui si dingah a ur pei.

⁷Israel mi pawl in an ṭilva cu hmun dangdangah that tahrat in me-khawzing pawl hnenih thawinak an pek ruangah BAWIPA ih hmaiah hlawhhlang phun ah an rak cang naón, cubangtuk cu an si nawn lo pei. Hi daan cu Israel mi pawl in san khat hnu san khat an thlun ringring pei.

⁸Israel mi pakhatkhat, a si lole Israel mi lakih a um ramdangmi pakhatkhat in mei-ur thawinak siseh, thawinak dang siseh, BAWIPA hnenih a pek tikah Puanthlam luhnak sangka ah si loin hmun dangah a pek a si ahcun amah cu Pathian ih miphun ah relcih a si nawn lo pei.

¹⁰Israel mi pakhatkhat, a si lole Israel mi lakih a um ramdangmi pakhatkhat in sathi a ei a si ahcun BAWIPA ih mithmai ṭha a tong lo pei ih a miphun sung ihsin suah a si pei.

¹¹Ziangvek ramsa a si khalle a nunnak cu a thisen sungah a um a si. Cuhrangah thisen hmuahhmuah cu minung ih sualthlahnak hrangah biakṭheng parah nan thlet pei, tiah BAWIPA in thu a peknak a si. Nunnak a si mi thisen in sual a thianter.

¹²Curuangah Israel mi siseh, an lakih a um ramdangmi siseh, sathi nan ei lo pei, tiah BAWIPA in a tinak cu a si.

¹³Israel mi pakhatkhat, asilole an lakih a um ramdangmi pakhatkhat in ei thiangmi ramsa siseh, vate siseh a kaih a si ahcun a thisen cu leilung ah a thlet pei ih leidip in a khuh pei.

¹⁴Zianghrangah tile ramsa-ih nunnak cu a thisen sungah a um a si; curuangah sathi nan ei lo pei, sathi a eitu cu a miphun sung ihsin suah siseh tiah BAWIPA in Israel mi pawl a tinak cu a si.

¹⁵Israel mi siseh, ramdangmi siseh, amahte a thi mi ramsa, asilole sahrang ih dehmi sa a ei a si ahcun a hnipuan a sawpfai thluh pei; ti a kholh-aw pei ih cuih zanlam tiang cu mi thiangfai lo a si pei.

¹⁶Cutiih a tuah lo asile mawhphurhnak a tuar pei.