Read Falam Chin PUITHIAM HNAṬUANNAK 19 Bible Online

PUITHIAM HNAṬUANNAK 19 - Falam Chin bible

PUITHIAM HNAṬUANNAK 19

¹Israel mipi hnenih sim dingah,

²BAWIPA in Moses hnenah hiti in a fial, “Keimah ka thianhlim bangtuk in thianghlim uh; BAWIPA nan Pathian ka si.

³Zozo khal in mahih pa le nu cu nan upat ciar pei ih ka thupekmi bangtuk in sabbath ni nan ul pei. Keimah cu BAWIPA nan Pathian ka si.

⁴“Ka hnen ihsin tlan tahratin milem nan bia lo pei; daar in pathian lem tuah tahratin nan bia lo pei. Keimah cu BAWIPA nan Pathian ka si.

⁵“Remthawinak hrangih ṭilva nan thah tikah ka lo pek zomi daan pawl nan thlun pei ih cuticun nan pekmi thawinak cu ka saang ding.

⁶Nan thahmi sa cu nan thah ni ah, a si lole a thaisun ah, nan ei pei. A ni thumnak ih a taangmi sa cu meisa in nan ur pei;

⁷ziangahtile sathiang lo a si ih mi pakhatkhat in a ei asile nan pekmi thawinak cu ka saang lo ding.

⁸Ka hnenih pek ciami a ei ruangah thil thianghlim ziang hmanih siar lo ah a cang ih mimawh a si. Curuangah amah cu ka miphun sungih siarcih nawn lo ding a si.

⁹“Nan lo ih rawl nan khawm tikah lorii tiang la hlah uh; nan taantami rawl leep khal va hawl sal hlah uh.

¹⁰Nan hrelhmi sabit rah, a si lole leilungih a tlami sabit rah pawl hawl sal dingah nan sabit hmuan ah va feh sal hlah uh. Cu pawl cu mifarah le mikhual sukso pawl hrangah tanta uh. Keimah cu BAWIPA nan Pathian ka si.

¹¹“Ruk ru hlah; mi bum hlah; thuphan per hlah.

¹²Thlun na tum lomi thukamnak ka hmin in tuah hlah; ka hmin na siatter a si. Keimah cu BAWIPA nan Pathian ka si.

¹³“Nangmah ih hlawknak hrangah mi va nekrawk hlah; midang thil va ru hlah. Midang ih hlawhman cu zan khat sung hman hreng hlah.

¹⁴Hnasetmi va camsiat hlah; mitcaw pa bah seh tiah a hmaiah thil pakhatkhat ret hlah. Keimah hi i ṭihzah aw, BAWIPA na Pathian ka si.

¹⁵“Midang ih thu na ṭhen tikah ṭanmi bul nei loin dik zet le ding zetin rel aw; mifarah va ṭan cuang hlah; milian khal va ṭih cuang hlah.

¹⁶Thuphan thu va rel sin vivo hlah; mi pakhatkhatih nunnak le thihnak thu an ṭhen tikah na thusimmi a ṭhahnem ding a si ahcun hmaisong loin sim aw. Keimah cu BAWIPA ka si.

¹⁷“Na laicinpi a thup in huatmi nei hlah; amah ruangah misual na si lonak dingin a mawh na ti asile fiangtein sim sawn aw.

¹⁸Zo ih par hmanah phuba la hlah; mi na huatnak kha na thinlung ah taapter ringring hlah; nangmah na duhdawt-aw vekin midang duhdaw ve aw. Keimah cu BAWIPA ka si.

¹⁹“Ka thupekmi thlun uh. Innzuat ṭilva phun dangdang faate nei dingin pawl-awter hlah uh. Lo pakhat sungah thlai phun hnih ciing tlang hlah uh. Pat phun hnih ih tahmi hnipuan hruk hlah uh.

²⁰“Mi pakhat in midang pakhat hrangih hammi salnu a sualpi a si ahcun, cuih salnu ih man a pek hrih lo hmanah, cuih salnu le a sualpitu pa cu hremnak an tuar pei; an pahnih in thah ding an si lo. Salnu a si hrih thotho ih a luat hrih lo ruangah hremnak lawng pek ding an si.

²¹Cupa cun tuucang pakhat mawhthawinakah ka umnak Puanthlam ih sangka-ah a keng pei ih,

²²cumi thawn a sualthiannak dingah puithiam in thianternak a tuah pei ih Pathian in a ngaidam ding.

²³“Kanaan ram nan thlen ih thingkung nan phun tikah a rah hmaisa bik kum ihsin kum thum sung cuih thingrah cu a thiang lomi thingrah ah nan ruat pei ih nan ei lo pei.

²⁴A kum litnak ah thingrah hmuahhmuah cu keimah nan BAWIPA parih lungawinak langternak ah ka hnenah nan hlan thluh pei.

²⁵Cule a kum nganak ah a rah pawl cu nan ei pei. Hi bangtuk ih nan tuah asile nan thingkung pawl cu tam sinsin an rah ding. Keimah cu BAWIPA nan Pathian ka si.

²⁶“Thisen a telmi sa cu nan ei lo pei. Pol siseh, dawi siseh nan tuah lo pei.

²⁷Mithi ngai ruangah nan bak sam nan tan thluh lo pei, nan khahmul khal nan meet thluh lo pei.

²⁸Mithi ngai in nan hmai nan ṭelh lo pei, nan taksa khal nan sun lo pei. Keimah cu BAWIPA ka si.

²⁹“Nan fanu pawl cu khuavang biaknak biakinn ih hlawhhlang[7] ah tuah tahratin an thang siatter hlah uh. Cutiih nan tuah asile an khawzing pawl hnenih tlan nan si ding ih hi ram cu nupasual borhhlawhnak in a khat ding.

³⁰Sabbath ni ul uh; keimah in biaknak ka hmun thianghlim cu upat uh. Keimah cu BAWIPA ka si.

³¹“Mithi thlarau a kothiamtu pol le tinzoh thiam pawl kha va leeng hlah uh. Nan va leen asile mi thiangfai lo nan si ding. Keimah cu BAWIPA nan Pathian ka si.

³²“Kum upa pawl upat uhla hmaizahnak pe uh. Cule keimah hi i ṭihzah uh. Keimah cu BAWIPA ka si.

³³“Na ram sungih a um vemi hrindangmi pawl hrem hlah uh.

³⁴Israel mi fingfing nan zoh ton-awk bangtuk in zoh ve hai uh. Nanmah ih zawn nan ruah bangtuk in an zawn ruat ve uh. Izipt ram ih miphun dang hrin nan rak si lai kha hngilh hlah uh. Keimah cu BAWIPA nan Pathian ka si.

³⁵“A tawi a sau tahnak ah siseh, a rit a zaang khai nakah siseh, a tam a mal siarnak ah siseh, thil dik lomi hmang tahratin mi va bum hlah uh.

³⁶A tawi a sau tahnak ah a dikmi thil hmang uh; a rih a zaan khai nakah a dikmi cuai hmang uhla, a tam a mal siarnak ah a dikmi thil hmang uh. Keimah cu BAWIPA nan Pathian ka si ih Izipt ram ihsin a lo suahtu ka si.

³⁷Ka daan le ka thupekmi hmuahhmuah thlun uh. Keimah cu BAWIPA ka si,” tiah a ti.