Read Falam Chin PUITHIAM HNAṬUANNAK 2 Bible Online

PUITHIAM HNAṬUANNAK 2 - Falam Chin bible

PUITHIAM HNAṬUANNAK 2

¹Mi pakhat in BAWIPA hnenih thlairawl thawinak a tuah tikah hmaisabik ah a fang cu a rial dip thluh pei ih sangphut ah a cang ding. Cuih hnuah olif siti le rimhmui a toih pei ih,

²Aaron hrin puithiam pawl ih hnenah a keng pei. Rialdip ciami sangphut cu puithiam in zate-khat in a lak pei ih, siti le rimhmui pawl thawn BAWIPA hnenih pekmi a si, ti langternak ah biakṭheng parah a ur pei. Cutiih fang urmi rim cu BAWIPA hrangah rimthaw a si.

³A taangmi sangphut cu puithiam pawl ih ta a si. BAWIPA hnenih pekmi sangphut sung ihsin lakmi a si ruangah a thiangmi a si.

⁴BAWIPA hnenih an pekmi thlairawl thawinak cu rawhnak ih rawh ciami sangrawh a si ahcun thilnu rawi lomi a si pei. Olif siti thawn rawimi a sah zetmi sang, asilole olif siti hnihmi a paa zetmi sang a si pei.

⁵Cun an pekmi sang cu uhkang ih reumi sang a si ahcun olif siti thawn rawimi sangphut ih tuahmi a si pei; thilnu tel lomi thotho a si pei.

⁶BAWIPA hnenih nan pek tikah sangreu cu nan nuai dip thluh pei ih siti nan toih pei.

⁷An pekmi cu beelih kanmi sang a si ahcun sangphut le olif siti ih tuahmi a si pei.

⁸BAWIPA hnenah rak keng uhla puithiam hnenah pe uh; cule puithiam in biakṭheng ah a fehpi pei.

⁹A zatein BAWIPA hnenih pekmi a si, ti langternak dingah puithiam in sang malte in a lak pei ih biakṭheng parah a ur pei. Cutiih urmi rawlrim cu BAWIPA ih hrangah rimthaw a si.

¹⁰Thlairawl thawinak sung ihsin a taangmi pawl cu Aaron le a fapa pawl ih ta a si; BAWIPA hnenih pekmi rawl sung ihsin lakmi a si hrangah a thiang zetmi a si.

¹¹BAWIPA hnenih thlairawl thawinak nan pekmi hmuahhmuah cu thilnu rawi lomi an si thluh pei. BAWIPA hnenih mei-ur thawinak nan pekmi cu thilnu siseh, khuaitizu siseh rawi lomi hlir an si pei.

¹²Kumtin tein thlaithar nan pek tikah BAWIPA hnenah nan rak keng pei; asinain biakṭheng parah nan ur lo pei.

¹³Thlairawl thawinakih nan pekmi fang hmuahhmuah cu ci nan phulh thluh pei; ziangahtile ci cu Pathian le nanmah karlakih thukamnak nan tuahmi khihhmuhnak a si. Thawinak nan pekmi hmuahhmuah ci phulh ṭheh uh.

¹⁴Thlaithar hmaisa bikmi thlairawl thawinak BAWIPA hnenih nan pek tikah nan kan ciami, a si lole nan den ciami a si pei.

¹⁵Cuih tlunah olif siti nan toih pei ih rimhmui tla nan toih pei.

¹⁶BAWIPA hnenih mei-ur thawinak pekmi a si, ti langternak dingah nan pekmi sangphut hrekkhat le siti le rimhmui hmuahhmuah cu puithiam in a ur ṭheh pei.