Read Falam Chin PUITHIAM HNAṬUANNAK 20 Bible Online

PUITHIAM HNAṬUANNAK 20 - Falam Chin bible

PUITHIAM HNAṬUANNAK 20

¹Israel mi hnenih than dingin,

²BAWIPA in Moses hnenah hiti in a sim, “Nanmah lakin siseh, nan lakih a um ramdangmi pawl lakin siseh, Molek khawzing[8] biaknak ah a sungsuak fa a petu cu Israel mipi in lungto in den that a si pei.

³Molek khawzing hnenah a fa a pek ih ka Puanthlam a borhhlawhter ih ka hmin thianghlim a thangsiat ruangah amah cu ka hnong pei ih ka minung ah ka siar nawn lo ding.

⁴Sikhalsehla Israel miphun pumpi in cupa ih tuahnak cu an umsan men ih that loin an zuah a si ahcun,

⁵cupa le a sungkhat hmuahhmuah cu ka hnong ding. Cuih tlunah Molek khawzing biaknak ah cupa hnenih a telmi hlawhhlang phun pawl hmuahhmuah cu keimah hrimhrim in ka hnong ding a si. Cupawl cu ka minung ah ka ruat nawn lo ding.

⁶“Mithi thlarau a kothiamtu pol le tinzoh thiam pawl a lengtu cu keimah in ka hnong pei ih ka miphun sungah ka siarcih nawn lo ding.

⁷Tithianghlim aw uh; ziangahtile keimah cu BAWIPA nan Pathian ka si.

⁸Ka daan thlun uh, ziangahtile BAWIPA ka si ih a lo thianghlimtertu cu Keimah ka si,” a ti.

⁹Cuih tlunah a tanglamih daan pawl hi BAWIPA in an hnenah a pe. A nu siseh, a pa siseh a camtu cu thah a si pei; a nu le a pa a camsiat ruangah a sualnak thisen cu amah ih lu parah a thleng a si.

¹⁰Mi pakhat in midang nupi a sualpi ahcun ṭaangṭawm sualnak a tuahtu nu-le-pa an pahnih in thah an si pei.

¹¹A pa ih nupi pakhatkhat a sualpitu cu a pa a mualphoter ruangah an pahnih in thah an si pei. Anmah ih sual ruangah an thi a si.

¹²A fapa ih nupi a sualpitu pa cu a sualpimi nunau thawn thah an si pei. Sungkhat sualpi tahrat in thil borhhlawh an tuah ruangah an thih cu an sual man a si.

¹³Mipa pakhat cu a dang mipa pakhat thawn an pawl-aw a si ahcun thil fihnung an tuah ruangah an pahnih in thah an si pei. Anmah ih sual ruangah an thi a si.

¹⁴Mi pakhat in nupi a ṭhit ih a nupi ih nu khal a ṭhit fawn a si ahcun thil borhhlawh an tuah ruangah an pathum in meisa in ur that an si pei. Hi bangtuk cu nan lakah nan umter lo pei.

¹⁵Mipa pakhat in ṭilva a pawl a si ahcun amah le cuih ṭilva cu thah an si pei.

¹⁶Nunau pakhat in ṭilva pawl ding a zuam ih an pawl-aw a si ahcun amah le cuih ṭilva cu thah an si pei. Anmah ih sual ruangah an thi a si.

¹⁷Mipa pakhat in a farnu, a si lole a farnuseu a ṭhit a si ahcun misenpi hmaiah ningzak le mualpho in tuah an si hnuah Israel mipi sung ihsin dawihlo an si pei. A farnu a sualpi ruangah hremnak a tuar a ṭul a si.

¹⁸Nunau pakhat nunau daan a neih laiah mipa pakhat in a pawl a si ahcun, thil thiangfai le thiangfai lo hrangih daan a ummi an buar ruangah Israel mipi sung ihsin an pahnih in dawihlo an si pei.

¹⁹Mi pakhat in a ni a sualpi a si ahcun thil fihnung an tuah ruangah an pahnih in hremnak an tuar pei.

²⁰Mi pakhat in a paseu ih nupi a sualpi a si ahcun a paseuih hmin a siatter ruangah an pahnih in hremnak an tuar pei; fa nei loin an thi pei.

²¹Mi pakhat in a unau ih nupi a ṭhit ahcun rocotu fa nei loin an thi ding. A thiangfai lomi thil a tuah ih a unau hmin a siatter a si.

²²BAWIPA in, “Ka lo thlenpinak hi ram hin a lo hnon lonak dingah ka daan le ka thupekmi hmuahhmuah cu thlun uh.

²³Hi ram nan luah theinak dingah hi ram ihsin ka dawimi khawvel pawl ih cin le daan cu thlun ve hlah uh. An thlunmi thil ṭha lo pawl in i ning tuk zo a si.

²⁴Sikhalsehla hi ram, cawhnawi le khuaitizu a luannak ram cu nan luah dingah ka lo kam zo vekin nan hnenah ka lo pe ko ding. Keimah cu BAWIPA nan Pathian ka si ih miphun dang pawl thawn rawi loin um dingah nannih cu a hrante ih ka lo retmi nan si.

²⁵Cuti a si ruangah vate siseh, ṭilva siseh, a thiangfaimi le thiangfai lomi cu feltein thiatdan nan thiam pei. A thiangfai lomi vate le ṭilva cu nan ei lo pei. Sathiangfai lo ka ti zomi an si ih nan ei asile mi thiangfai lo ah nan cang ding.

²⁶Mi thianghlim nan si pei ih keimah lawngih ta nan si pei; ziangahtile keimah cu BAWIPA ka si ih a thianghlimmi ka si. Keimah lawngih ta nan sinak dingah ramdangmi pawl thawn rawi loin a dangte ih ka lo retmi nan si.

²⁷“Mipa siseh, nunau siseh, thimi thlarau a kotu pol le dawi thiam pawl cu lungto in den that an si pei; hibangtuk a tuahtu cu amah ih sual ruangah a thi a si,” tiah a ti.