Read Falam Chin PUITHIAM HNAṬUANNAK 21 Bible Online

PUITHIAM HNAṬUANNAK 21 - Falam Chin bible

PUITHIAM HNAṬUANNAK 21

¹Aaron hrin puithiam pawl sim dingah BAWIPA in Moses hnenah hiti in a sim. “Zovek puithiam khal sisehla,

²a nu a pa, a fapa a fanu, a unau le,

³a innih ummi pasal nei lo a farnu an thi ih an ruak vui ih a tel dah ti lo ahcun a dang ruakvuinak ah tel tahratin mi thiangfai lo ah a cang-awter lo pei.

⁴Pasal a neimi a farnu thih tik khalah a ruak vuinak ah a tel lo pei.

⁵“Zovek puithiam khal in a mithi ngainak langter dingah a lu khui tawk zawn hman a met lo pei; a khahmul khal a met lo pei ih a taksa khal a sun lo pei.

⁶Puithiam cu mi thianghlim a si pei ih ka hmin a thangsiat lo pei. Ka hnenih thawinak petu a si ruangah mi thianghlim a si pei.

⁷Puithiam cun hlawhhlang a rak si dah mi nunau, a si lole falahim a si lomi le pasal thawn a ṭhen-aw zomi nunau cu a nupi ah a ṭhi lo pei. Puithiam cu mi thianghlim a si.

⁸Puithiam cu ka hnenih thawinak petu a si ruangah mi senpi in mi thianghlim ih ruahmi a si pei. Keimah cu BAWIPA ka si; a thianghlimmi ka si ih ka minung pawl khal mi thianghlim ah ka tuah a si.

⁹Puithiam ih fanu hlawhhlang ih a can ahcun a pa a thangsiatter ruangah amah cu meisa in ur that a si pei.

¹⁰“Puithiam Sang, a lu-ih hriakculh ciami le puithiam thilthuam hruk dingah mithianghlim ih tuah ciami cun a mithi ngainak langter dingah a sam hriat loin a um lo pei ih a hnipuan khal a thlek lo pei.

¹¹Ka hnenih hlan ciami a si ruangah a nu le a pa rori an thih hmanah ruak umnak inn sungah lut tahrat in mi thiangfai lo ah cangter-aw hlah seh;

¹²a si lole ka Puanthlam thianghlim suahsan tahratin ruakinn ih a luh ruangah ka Puanthlam cu baalter hlah seh.

¹³Falahim a ṭhi pei;

¹⁴a ṭhitmi cu nuhmei a si lo pei; midang ih ṭhen ciami a si lo pei ih hlawhhlang a rak si dahmi khal a si lo pei. A ṭhitmi cu anmah ih hrinpi sungih falahim a si pei.

¹⁵Cuti a si lo ahcun mithianghlim ih ruah dingmi a fa le pawl cu mithiang lo ah an cang ding. Keimah cu BAWIPA ka si ih keimah in Puithiam Sang si dingah a hrante in ka hrilmi a si,” tiah a ti.

¹⁶Aaron sim dingah,

¹⁷BAWIPA in Moses cu hiti in a ti, “Na tesinfa pawl sungah raitluan lomi cun ka hnenah thawinak an pe lo pei. Himi cu a kumkhuain nan thlun dingmi a si.

¹⁸Taksa kim lonak a neitu cun thawinak a pe lo pei; mitcaw, ke-awl, hmai siatsuahmi, kutke kim lomi,

¹⁹a si lole a kut a ke a zengmi,

²⁰eel a puumi, pacang ih siar tlak lomi mi pate, asilole mitnat neimi, vunnat neimi le tilpermi pawl cun thawinak an pe lo pei.

²¹Aaron tesinfa taksa kimlo mi cun ka hnenah thawinak an pe lo pei.

²²Ka hnenih pekmi thawinak, a thianghlimmi thawinak le, a thianghlim bikmi thawinak tla an ei thei pei;

²³sikhalsehla taksa kim lo an si ruangah puanzar thianghlim le biakṭheng kiangah cun an ra hrimhrim lo pei. Ka hmun thianghlim ih thil pawl cu an borhhlawhter lo pei, ziangahtile keimah cu BAWIPA ka si ih ka thianhlimtermi an si,” tiah a ti.

²⁴Himi cu Aaron le a fapa pawl le Israel mi hmuahhmuah hnenah Moses ih simmi a si.